Read kinyarwanda Umubwiriza 8 Bible Online

Umubwiriza 8 - kinyarwanda bible

Umubwiriza 8

¹Ni nde wamera nk’umunyabuhanga, akamenya ukuri kw’ibintu? Ubuhanga bw’umuntu bumutera gucya mu maso, bukamumara umunya.

²Uzubahirize itegeko ry’umwami kubera amasezerano wagiriye Imana.

³Ntukihutire kuryitarutsa, cyangwa ngo wange kuva ku izima; kuko icyo umwami ashaka akigeraho,

⁴kandi ijambo rye rikaba iteka ridakuka, hakaba nta wamutinyuka ngo agire ati «Urakora iki?»

⁵Ukurikiza itegeko, nta kibi kimugeraho, kandi umutima w’umunyabuhanga uba uzi igihe uzacirirwa urubanza.

⁶Ni koko, ikintu cyose gifite umwanya w’urubanza rwacyo, kuko ubugome bw’umuntu buzamugaruka.

⁷Mu by’ukuri ntaba azi ibizaba, n’uko bizagenda; none se ni nde wabimuhishurira?

⁸Nta muntu utegeka umwuka w’ubuzima, kugira ngo awubuze gushira, nta we utegeka umunsi w’urupfu, kandi nta wasonewe urwo rugamba, n’ubugome ntibukiza nyirabwo.

⁹Ibyo byose nabibonye nitegereje ibibera ku isi, mu gihe umuntu akandamiza mugenzi we, ashaka kumugirira nabi.

¹⁰Nabonye abagome bikoreye bajya kubahamba, bakabatambagiza umugi, bakiyibagiza ko bagize nabi. Ibyo na byo ni ubusa.

¹¹Kubera ko icyemezo cyo guhana ikibi kitaziraho, umutima w’abantu urarikira kugira nabi.

¹²N’iyo umunyabyaha yacumuye incuro ijana, kandi akaramba, sinshidikanya ko ihirwe ari iry’abubaha Imana, kuko bayitinya.

¹³Nyamara ariko umunyabyaha nta hirwe azagira, azahita vuba nk’igihu, kuko adatinya Imana.

¹⁴Hari ikindi kintu cy’impfabusa ku isi: intungane zimwe zigira ibyago byagombaga kugwirira abanyabyaha, hakaba n’abanyabyaha baronka ibyiza byagombaga guhabwa intungane. Ndemeza ko n’ibyo ari amashyengo.

¹⁵Jyewe rero nakunze ibyishimo, kuko nta kindi kinyura umuntu ku isi atari ukurya, akanywa hanyuma agatengamara. Ndetse iyaba ibyo yabihoranaga mu miruho ye yose, igihe agifite ubuzima Imana yamuhaye ku isi.

¹⁶Nahagurukiye kumenya ubuhanga no gucengera ibikorerwa ku isi, nsanga umuntu atigera aruhuka haba ku manywa cyangwa nijoro;

¹⁷ubwo maze kwitegereza ibikorwa byose by’Imana, nahise ntahura ko nta washobora kumenya ibikorerwa ku isi, ko nta wasobanura impamvu umuntu atagera ku cyo avunikira. Ndetse n’umunyabuhanga wikekaho kumenya byinshi, na we ntashobora kubigeraho.