Read kinyarwanda Indirimbo ihebuje 1 Bible Online

Indirimbo ihebuje 1 - kinyarwanda bible

Indirimbo ihebuje 1

¹Indirimbo ihebuje yahimbwe na Salomoni.

²[1]Nansome uko umunwa we usanzwe unsoma! Kuko urukundo rwe rundutira divayi.

³Imibavu yawe ifite impumuro nziza, izina ryawe ni impumuro itamye, ni na yo mpamvu abakobwa bagukunda.

⁴Reka nkujye inyuma unyijyanire, ngaho twirukanke! Umwami[2] yanyinjije mu byumba bye. Tunezerwe tukwishimire, duhimbaze urukundo kurusha divayi. Erega bazi ubwenge abakwikundira!

⁵Ndi umuyumbu ariko mfite igikundiro, bari ba Yeruzalemu[3], nsa n’amahema ya Kedari nsa n’inyegamo zo kwa Salima[4].

⁶Ntimungaye ibara ngo ndirabura: ni izuba ryambabuye. Bene mama barandakariye; banyohereza kubarindira imizabibu, ariko iyanjye mizabibu sinayirinda.

⁷Mbwira se, wowe umutima wanjye ukunda, aho ujyana umukumbi wawe kurisha, mbwira aho uwujyana kubyagira, ntava aho nsa n’ubwerabwera, hafi y’imikumbi ya bagenzi bawe.

⁸Niba utabizi, wowe gitego mu bakobwa, sohoka ukurikire umukumbi wawe, maze abana b’ihene ubajyane kurisha iruhande rw’ibiraro by’abungeri.

⁹Ncuti yanjye, nakugereranya n’imwe mu mafarasi y’ingore, amwe akurura amagare ya Farawo.

¹⁰Imisaya yawe ni ihogoza, itatse amasaro[5], kimwe n’ijosi ryawe ritamirije inigi.

¹¹Turagutungira inigi za zahabu, duharagemo amabara ya feza.

¹²[6]— Igihe umwami bamushagaye, ni bwo akarabo kanjye gatama impumuro nziza,

¹³Uwo nkunda ni nk’agapfunyika k’umubavu kegama hagati y’amabere yombi.

¹⁴Uwo nkunda ni nk’agashandiko k’indabo hagati y’imizabibu ya Enigadi.

¹⁵— Koko uri mwiza, mukobwa nkunda, koko uri mwiza! Amaso yawe ni nk’ay’inuma.

¹⁶— Uri mwiza, muhungu nkunda, koko uteye ubwuzu. Uburiri bwacu ni ubwatsi butoshye.

¹⁷— Inkingi z’inzu yacu ni sederi, n’imishoro yayo ni imizonobari.