Read kinyarwanda Indirimbo ihebuje 2 Bible Online

Indirimbo ihebuje 2 - kinyarwanda bible

Indirimbo ihebuje 2

¹— Ndi akarabo k’amarebe y’i Saroni ndi umwangange wariboye wo mu mibande.

²— Mu bandi bakobwa, uwo nkunda ameze nka lisi mu mahwa.

³— Nk’ipera mu biti by’ishyamba, ni ko uwo nkunda ameze mu bana b’abahungu. Nicaye mu gicucu cye uko nabirarikiye, akabuto ke kandyohera mu kanwa.

⁴Yanyinjije mu rwengero rwe, anshyiraho ikimenyetso cy’urukundo rwe.

⁵Nimumpembuze agatsima k’imizabibu, nimundamize akabuto k’ipera, dore nzonzwe nzira urukundo.

⁶Ukuboko kwe kw’imoso kuranseguye, ukw’iburyo kurampfumbase.

⁷— Nyabuna, bari ba Yeruzalemu, ndabinginze, mbarahije amasha n’amasirabo y’agasozi, muramenye ntimunkangurire uwo nkunda, ntimumubyutse atarabishaka.

⁸Ndumva ijwi ry’uwo nkunda! Nguyu araje[7], arataraka mu mpinga, arasimbuka imisozi.

⁹Uwo nkunda ameze nk’isha cyangwa ishashi y’impara. Dore nguyu ari inyuma y’inkike yacu, ararungurukira mu madirishya, arahengereza mu mbariro.

¹⁰Uwo nkunda yateruye kuvuga, arambwira ati «Haguruka, ncuti; iyizire, mwiza wanjye,

¹¹Dore itumba rirashize, imvura irahise yaracitse.

¹²Indabo zakwiriye igihugu, igihe cy’inkera cyageze, ijwi ry’inuma ryumvikanye mu gihugu.

¹³Umutini waturitse imbuto zawo za mbere, n’imizabibu yarabije, iratama impumuro zayo nziza. Cyo haguruka, ncuti; iyizire, mwiza wanjye.

¹⁴Kanuma kanjye kibera mu mitutu y’urutare, mu bwihisho bw’imanga, reka nirebere mu maso yawe, niyumvire n’akajwi kawe, kuko ijwi ryawe rishimishije n’uburanga bwawe bugatera ubwuzu!»

¹⁵Nimudufatire imihari, bya byana by’imihari byonona imizabibu, kandi imizabibu yacu ari uruyange.

¹⁶Uwo nkunda ni uwanjye, nanjye ndi uwe. Aragira mu ndabo z’amalisi.

¹⁷Garuka, ncuti yanjye, mbere y’agasusuruko, mbere y’uko umwijima utamuruka; sa n’isha cyangwa ishashi y’impara, mu mpinga z’imisozi ya Beteri.