Read kinyarwanda Indirimbo ihebuje 3 Bible Online

Indirimbo ihebuje 3 - kinyarwanda bible

Indirimbo ihebuje 3

¹Ijoro ryose naraye nshatse ku buriri bwanjye, uwo umutima wanjye ukunda. Namushatse ndamubura[8].

²Reka mbyuke, nirukanke umugi, imihanda n’amayirabiri, nshakashake uwo umutima wanjye ukunda. Namushakashatse ariko namubuze.

³Nahuye n’abarinzi, bamwe barara irondo mu mugi; ndababwira nti «Mbese ntimwabonye uwo umutima wanjye ukunda?»

⁴Twari tugitandukana gato, mbona uwo umutima wanjye ukunda; ndamufata nanga kumurekura, ntamwinjije mu nzu ya mama, mu cyumba cy’uwanyibarutse.

⁵Nyabuna, bari ba Yeruzalemu, ndabinginze, mbarahije amasha n’amasirabo y’agasozi, muramenye ntimunkangurire urukundo, ntimurubyutse rutarabishaka.

⁶Uriya ni nde[9] uzamuka aturuka mu butayu, asa n’inkingi y’umwotsi, atama imibavu n’ububani, n’udufu duhumura neza tumwe tubunzwa n’abaducuruza?

⁷Nimwirebere ingobyi ya Salomoni, ishagawe n’abagabo mirongo itandatu barobanuwe mu ntwari za Israheli;

⁸bose bitwaje inkota, bamenyereye intambara, buri wese afatiye inkota ku itako ku mpamvu y’akamu ka nijoro.

⁹Umwami Salomoni yiyubakiye indaro mu biti byo muri Libani.

¹⁰Inkingi yazicuze muri feza, ahegamirwa ahataka zahabu, ahicarwa ahataka umuhemba, mu mbere, abari ba Yeruzalemu bahataka urukundo.

¹¹Nimusohoke[10], bari ba Siyoni, mwitegereze umwami Salomoni, mutangarire ikamba Nyina yamwambitse umunsi w’ubukwe bwe, umunsi umutima we wari wuje umunezero.