Read kinyarwanda Indirimbo ihebuje 4 Bible Online

Indirimbo ihebuje 4 - kinyarwanda bible

Indirimbo ihebuje 4

¹Mbega ukuntu uri mwiza, ncuti yanjye[11], mbega ukuntu uri mwiza! Amaso yawe ni nk’ay’inuma, aragaragara inyuma y’umwenda witwikiriye. Imisatsi yawe imeze nk’umukumbi w’ihene zimanuka imanga ya Gilihadi.

²Amenyo yawe arera nk’umukumbi w’intama zogoshwe, iyo zikutse umugezi zimaze kwiyuhagira; buri ryinyo rijyana n’iryaryo nk’impanga, kandi nta gihanga kiyabamo.

³Iminwa yawe imeze nk’agashumi k’umuhemba, mu kanwa uteye ubwuzu. Imisaya yawe mu mwenda witwikiriye, ni nk’akabuto k’itunda basatuyemo kabiri.

⁴Ijosi ryawe ni nk’umunara wa Dawudi, wubakiwe kubika intwaro, na ryo ritendetseho ingabo igihumbi, nk’ingabo intwari zikinga ku rugamba.

⁵Amabere yawe yombi ni nk’inyagazi ebyiri zavutse ku isha ari impanga, zikarisha mu ndabo z’amalisi.

⁶Mbere y’agasusuruko, mbere y’uko umwijima utamuruka, ndajya mu mpinga ibyara imibavu, ku musozi wera ububani.

⁷Koko uri mwiza wese, ncuti yanjye, nta nenge ikurangwaho!

⁸Turajyana tuva muri Libani, mugeni wanjye. Urava muri Libani tujyane, urava mu mpinga ya Amana, mu mpinga ya Seniri na Herimoni mu buvumo intare zihishamo, mu misozi ituwe n’ingwe[12].

⁹Uwanjye umbereye umugeni, erega wantwaye umutima[13], wandoye rimwe gusa, mbonye n’isaro rimwe ry’urunigi rwawe, ni bwo wantwaye wese!

¹⁰Mbega ukuntu urukundo rwawe ari rwiza, uwanjye umbereye umugeni! Mbega ukuntu urukundo rwawe rundutira divayi, n’impumuro y’imibavu yawe ikandutira ibihumura byose!

¹¹Iminwa yawe, mugeni wanjye, iratemba ubuki, ururimi rwawe rutwikiriye amata n’ubuki. Imyenda yawe irahumura nka Libani.

¹²Uri umurima uzitiwe, uwanjye umbereye umugeni, uri isoko igipfundikiye n’iriba nagenewe.

¹³Ikimero cyawe ni agashyamba kera amatunda aryohereye,

¹⁴kakera n’ibiti bibyara imibavu y’indobanure, n’amavuta y’impumuro zinyuranye.

¹⁵Uri iriba rivomera imirima, uri isoko y’amazi afutse, uri umugezi uturuka muri Libani!

¹⁶Haguruka, muyaga wa ruguru, banguka, muyaga w’epfo! Huhera mu busitani bwanjye, maze imibavu yabwo itame. Uwo nkunda niyinjire ubusitani, yirire imbuto zabwo ziryoha ukwazo.