Read kinyarwanda Indirimbo ihebuje 5 Bible Online

Indirimbo ihebuje 5 - kinyarwanda bible

Indirimbo ihebuje 5

¹Ninjiye mu busitani bwanjye, uwanjye umbereye umugeni, nasoromye imibavu yanjye n’ububani bwanjye, nariye ikinyagu cyanjye n’ubuki bwanjye, nanyoye divayi yanjye n’amata yanjye. Incuti, nimurye, munywe musinde urukundo!

²Nari nsinziriye ariko umutima wanjye uri maso. Numvise ijwi ry’uwo nkunda, nguwo arakomanze[14] ati «Nkingurira, muvandimwe wanjye, ncuti yanjye, kanuma kanjye, muziranenge wanjye, kuko umutwe wanjye watonzweho n’ikime, n’imisatsi yanjye yuzuye ibitonyanga by’ijoro.»

³Mbese ko nari niyambuye ikanzu yanjye, nayisubizamo nte? Ko nari noze ibirenge, nabyanduza nte?

⁴Uwo nkunda yanyujije ikiganza mu mwenge w’urugi[15], maze umutima wanjye urashiguka kubera we.

⁵Jyewe nabyutse ngo nkingurire uwo nkunda, maze ibiganza byanjye bitonyanga imibavu, n’intoki zanjye ziyagirana imibavu[16] y’amazi itonyangira ku byuma bikinga urugi.

⁶Jyewe nakinguriye uwo nkunda, ariko uwo nkunda yari yakimiranye arigendera. Nataye umutwe nsanze yagiye; naramushatse sinamubona, naramuhamagaye ntiyanyitaba.

⁷Abarinzi twahuye, bamwe barara irondo mu mugi, bankubise barankomeretsa; banyambuye igishura, babandi barinda inkike y’umugi.

⁸Bari b’i Yeruzalemu, ndabibasabye, nimuhura n’uwo nkunda, muramubwira iki? Ko nazonzwe nzira urukundo.

⁹Mbese uwo ukunda arusha iki abandi, wowe gitego mu bakobwa? Rwose ni iki uwo ukunda arusha abandi, ngo urinde kutwinginga utyo?

¹⁰Uwo nkunda ni izuba[17], ni inzobe idahanda, mu bihumbi icumi ni we wagaragara.

¹¹Umutwe we ni nka zahabu iyunguruye, agasatsi ke kanoze nk’imikindo, kandi kirabura nk’icyiyone.

¹²Amaso ye ni nk’ay’inuma ku nkombe y’imigezi, zoga amata, ntizirenge inkombe.

¹³Imisaya ye ni nk’akarima kera imibavu, kakera ibihumura. Iminwa ye ni indabo z’amalisi, ivubura imibavu ishashagira.

¹⁴Ibiganza bye ni imibumbe ya zahabu, iharaze amabuye meza y’i Tarishishi. Umubyimba we ni ihembe ry’inzovu, ritatse safiri.

¹⁵Amaguru ye ni inkingi zera de, zihagaze ku bitereko bya zahabu iyunguruye. Uburanga bwe ni Libani nzima, ni rudasumbwa nk’amasederi!

¹⁶Mu kanwa ke ni uburyohere busa, uko aremye wese atera kwifuza. Nguwo uwo nkunda, ngiyo incuti yanjye, bari ba Yeruzalemu.