Read kinyarwanda Indirimbo ihebuje 7 Bible Online

Indirimbo ihebuje 7 - kinyarwanda bible

Indirimbo ihebuje 7

¹Garuka, garuka, mukobwa w’Abashulami[20], garuka, garuka, tukwirebere! Kuki mwitegereza Umushulamikazi, nk’abareba umudiho w’ingamba ebyiri?

²Byaba byiza ibirenge byawe mu nkweto zabyo, mukobwa w’igikomangoma! Amatako yawe ni nk’umutako wahanzwe n’umuhanga.

³Umukondo wawe ni nk’agakebano katabura divayi ihumura. Inda yawe ni nk’akarundo k’ingano gakikijwe n’amalisi.

⁴Amabere yawe yombi ni nk’inyagazi ebyiri, zavutse ku isha ari impanga.

⁵Ijosi ryawe ni nk’umunara wubatswe n’amahembe y’inzovu. Amaso yawe ni nk’ibyuzi bya Heshiboni, iruhande rw’umuryango w’uwo mugi utuwe cyane. Izuru ryawe ni nk’umunara wa Libani, bagenzuriramo ibituruka i Damasi.

⁶Umutwe wawe wemye nka Karumeli, n’imisatsi iwutenderaho ni nk’umwenda w’umuhemba; umwami yafatiwe mu mapfundo yayo.

⁷Waba mwiza, watera ubwuzu, rukundo rwanjye, mukobwa utera kunezerwa!

⁸Mu gihagararo usa n’umukindo, amabere yawe ameze nk’amahundo y’umuzabibu.

⁹Naravuze nti «Nzurira umukindo, maze nywusingire amaseri.» Reka amabere yawe ambere nk’amahundo y’umuzabibu, umwuka wawe umbere nk’impumuro y’amapera,

¹⁰n’akanwa kawe nka divayi yahebuje . . . Yisuke igana uwo nkunda, itembe ku minwa y’abahunikira.

¹¹Ndi uw’uwo nkunda, kandi ni jye ararikira.

¹²Ngwino, musore nakunze, twigire ku gasozi! Dukeshe ijoro mu midugudu,

¹³tuzindukire mu mirima y’imizabibu kureba ko imizabibu yapfunduye, cyangwa ko yarabije, cyangwa ko amatunda yabaye uruyange, ni ho nzaguhera urukundo rwanjye[21].

¹⁴Ubu ngubu imikunde iratama imibavu yayo, no ku irembo ryacu hari imbuto zose z’akataraboneka, iza vuba n’iza kera; ncuti yanjye, narazikuzigamiye.