Read kinyarwanda Indirimbo ihebuje 8 Bible Online

Indirimbo ihebuje 8 - kinyarwanda bible

Indirimbo ihebuje 8

¹Iyaba koko wari musaza wanjye[22], ngo ube waronse amabere ya mama, twahuriye ahagaragara nkagusoma, kandi ntihagire ubingaya.

²Nakujyanye, nkakwinjiza mu nzu ya mama, ukanyigisha uko nkwiye kukunyura. Nakunywesheje kuri divayi irimo umubavu, no ku mutobe w’amatunda yanjye.

³Ukuboko kwe kw’imoso kuranseguye, ukw’indyo kurampfumbase.

⁴[23]Nyabuna, bari ba Yeruzalemu, ndabinginze, ntimunkangurire uwo nkunda, ntimumubyutse atarabishaka!

⁵Uriya mukobwa ni nde uzamuka aturuka mu butayu, yiyegamije uwo akunda? Nagukanguriye mu nsi y’igiti cy’ipera, aho nyoko yagusamiye, ni ho yagusamiye uwakwibarutse.

⁶Nshyira mu mutima wawe, mbe nk’ikimenyetso kidasibangana, mbe nk’icyapa giteye no ku kuboko kwawe, kuko urukundo rufite amaboko nk’urupfu; umutima ukunda ukagundira nka rwo, ugurumana nk’ikibatsi cy’umuriro, nk’umuriro w’Uhoraho.

⁷Imivumba y’amazi ntiyashobora gucubya urukundo, n’inzuzi ntizarurengera. Umuntu watanga umutungo w’urugo rwe rwose, akeka ko yawugura urukundo, nta kindi yaronka, uretse umugayo.

⁸Dufite gashiki kacu katarapfundura amabere, tuzakagenzereza dute umunsi batangiye kukarambagiza?

⁹Niba ari urukuta tuzarutamiriza feza; niba ari umuryango tuzawukinga n’imbaho za sederi.

¹⁰Ndi urukuta, n’amabere yanjye ni nk’iminara; ni yo mpamvu mu maso ye ari jye umutera umunezero.

¹¹Salomoni yari afite imizabibu i Behali‐Hamoni, ayigabanya abarinzi, ngo buri wese ajye atanga ku mwero ibiceri igihumbi bya feza by’icyatamurima.

¹²Umuzabibu wanjye, nywigengaho. Wowe Salomoni, dore igihumbi cyawe, n’amagana abiri y’abakurindira imbuto.

¹³Wowe utuye ubusitani, bagenzi bawe bateze ugutwi ijwi ryawe, ngusabye kurinyumvisha.

¹⁴Banguka, ncuti nkunda, use n’isha, cyangwa n’inyagazi y’isha, mu mpinga y’imisozi yera imibavu!