Read kinyarwanda Izayi 1 Bible Online

Izayi 1 - kinyarwanda bible

Izayi 1

¹Ibyo Izayi mwene Amosi yabonye byerekeye Yuda na Yeruzalemu ku ngoma ya Oziya, iya Yotamu, iya Akhazi n’iya Hezekiya, abami ba Yuda[1].

²Umva, wa juru we! Nawe wa si we, tega amatwi! Uhoraho avuze atya: Nareze abana, ndabakuza, ariko bo barangomera!

³Ikimasa kimenya nyiracyo, n’indogobe ikamenya aho irira kwa shebuja, ariko Israheli yo nta cyo izi, umuryango wanjye nta cyo witaho.

⁴Uragowe! Wa gihugu we cy’abacumuzi, wa muryango we wuje ubugome, bwoko bw’abagiranabi, bana b’inkozi z’ibibi! Mwimuye Uhoraho, muhinyura Nyirubutagatifu wa Israheli, mumutera umugongo!

⁵Murashaka se kandi ko babahana bate, mwebwe mukomeza gukabya ubwigomeke? Umutwe wanyu wose urarwaye, n’umutima wanyu umeze nabi.

⁶Kuva mu bworo bw’ikirenge kugera ku mutwe, nta hakiri hazima: ahubwo ni inguma nsa, ibisebe, ibikomere bivirirana, bitarakandwa, bitarapfukwa cyangwa ngo byogeshwe amavuta.

⁷Igihugu cyanyu cyahindutse amatongo, imigi yanyu ikongorwa n’umuriro; abanyamahanga barabanyaga igihugu mubareba, none gitsiratsijwe nk’ikigaruriwe n’ingabo z’ahandi.

⁸Umwari wa Siyoni[2] asigaye ameze nk’akaruri kari mu mizabibu, ameze nk’indaro iri mu murima w’amadegede, mbese nk’umugi ugoswe n’ingabo.

⁹Iyo Uhoraho, Umugaba w’ingabo, atajya kuturokoramo bamwe bahonotse[3], twari kuba aka Sodoma, tukamera nka Gomora.

¹⁰Nimwumve ijambo ry’Uhoraho, mwe batware ba Sodoma, mutege amatwi inyigisho y’Imana yanyu, bantu ba Gomora !

¹¹Uhoraho avuze atya: Ibitambo byanyu bitagira ingano bimbwiye iki ? Ibitambo bitwikwa bya za rugeyo n’urugimbu rw’inyana, maze kubihaga; amaraso y’ibimasa, ay’intama n’ay’amasekurume, sinkibishaka!

¹²Iyo muje kunshengerera, ni nde uba yababwiye kuza kumvogerera Ingoro ?

¹³Nimusigeho kuzana amaturo y’imburamumaro, umwotsi wayo narawuzinutswe. Imboneko z’ukwezi, amasabato n’andi makoraniro, iminsi mikuru ivanze n’ubugome, singishobora kubyihanganira!

¹⁴Imboneko z’ukwezi n’ibirori byanyu ndabyanze, kuko bindemerera, nkaba ntagishoboye kubyihanganira.

¹⁵Iyo muntegeye ibiganza, mbima amaso; mwakungikanya amasengesho, sinyatege amatwi, kuko ibiganza byanyu byuzuye amaraso.

¹⁶Nimwiyuhagire, mwisukure, nimumvane imbere ibikorwa bibi byanyu, kandi muherukire aho kugira nabi!

¹⁷Nimwige gukora ikiri icyiza, muharanire ubutabera, murenganure urengana, murwane ku mpfubyi, mutabare umupfakazi.

¹⁸Uhoraho avuze atya: Nimuze, tuburane! N’aho ibyaha byanyu byatukura nk’indubaruba, bizahinduka urwererane nk’urubura. Naho niba byatukuraga nk’umuhemba, bizererana nk’ubwoya bw’intama.

¹⁹Niba kandi mwemeye kumvira, muzarya ku byiza byeze mu gihugu.

²⁰Naho niba mubyanze, mugakomeza kuganda, inkota ubwayo ni yo izabarya. Uwo ni Uhoraho ubivuze.

²¹Ni ko ye, umugi wari indahemuka, uganje ubutabera, ubutungane ariho bubarizwa, waje kugwa ute mu bwiyandarike, none ukaba wuzuye ubwicanyi?

²²Feza yawe yahindutse uruhumbu, divayi yawe nziza ihinduka amaganura.

²³Abatware bawe ni abagome n’ibyitso by’abajura, bakunda amaturo, bose bagakurikirana ruswa ; ntibarenganura imfubyi kandi ntibumva amaganya y’umupfakazi.

²⁴Ni cyo gitumye Nyagasani, Umugaba w’ingabo, Umunyembaraga wa Israheli, avuze atya: Muragowe! Kuko nzaruhuka nihimuye abandwanya, kandi abanzi banjye, nzabahore.

²⁵Nzakugaruraho amaboko yanjye, nshongeshe uruhumbu rukuriho, nguhanagureho ubwandure bwawe.

²⁶Nzahindura imico y’abacamanza bawe bamere nka kera, n’abajyanama bawe bamere nko mu ntangiriro, maze uzitwe Umugi w’Ubutabera, Umurwa udahemuka.

²⁷Siyoni izarokorwa n’ubutabera, abahindutse bayo bakizwe n’ubutungane.

²⁸Abagome n’abanyabyaha bose bazavunagurirwa icyarimwe, abimura Uhoraho bazarimburwe.

²⁹Muzakozwa isoni bitewe n’imishishi[4] mwakundaga, mumwazwe n’ubusitani bwanyu bwabashimishaga,

³⁰kuko muzamera nk’umushishi w’amababi yumiranye, cyangwa nk’ubusitani butagifite amazi.

³¹Umunyambaraga azahinduka ubusabusa, ibyo akora bibe nk’agashashi k’umuriro, maze byose bigurumanire hamwe, kandi habure ubizimya.