Read kinyarwanda Izayi 11 Bible Online

Izayi 11 - kinyarwanda bible

Izayi 11

¹Umumero uzashibuka ku gishyitsi cya Yese[34], inkomoko ye izamuke ku muzi wacyo,

²Umwuka w’Uhoraho uzamwururukiraho, umwuka w’ubuhanga n’uw’ubushishozi, umwuka w’ubujyanama n’uw’ubudacogora, umwuka w’ubumenyi n’uw’ukubaha Uhoraho,

³kandi unamutoze gutinya Uhoraho. Ntazaca imanza akurikije igihagararo, cyangwa ngo azikemure akurikije amabwire.

⁴Intamenyekana azazicira imanza zitabera, azarenganure abakene bo mu gihugu. Umugome azamukubitisha inkoni y’ijambo rye, umwuka wo mu munwa we awicishe umugiranabi.

⁵Azakindikirisha ubutabera nk’umukandara, akenyeze ubudahemuka nk’umweko.

⁶Ikirura kizabana n’umwana w’intama[35], ingwe iryame iruhande rw’umwana w’ihene. Inyana n’icyana cy’intare bizagaburirwa hamwe, biragirwe n’akana k’agahungu.

⁷Inka n’igicokoma bizarisha mu rwuri rumwe, ibyana byabyo bibane mu kiraro kimwe, intare irishe ubwatsi nk’ikimasa.

⁸Umwana ukiri ku ibere azakinira ku kiryamo cy’inshira, igitambambuga cyinjize ikiganza mu mwobo w’impiri.

⁹Nta we uzaba akigira nabi, cyangwa ngo akore amahano ku musozi wanjye mutagatifu, kuko igihugu kizasakarwamo n’ubumenyi bw’Uhoraho, nk’uko amazi yuzura inyanja!

¹⁰[36]Uwo munsi ni bwo inkomoko ya Yese, izashyirwa ejuru nk’ibendera ry’igihugu, amahanga yose akazayigana, aho atuye hakazabengerana ikuzo.

¹¹Uwo munsi kandi, Uhoraho azongera abangure ukuboko kwe, kugira ngo agobotore udusigisigi tw’umuryango we, abazaba bakiri muri Ashuru no mu Misiri, i Patorosi, n’i Kushi, i Elamu, n’i Shimeyari, i Hamati no mu birwa byo ku nyanja.

¹²Azashinga ikimenyetso kimenyesha amahanga, ko agiye gukorakoranya abajyanywe bunyago ba Israheli, abumbire hamwe abatatanye bo muri Yuda, abakuye mu mpande zose z’isi.

¹³Ishyari rya Efurayimu rizashira, n’abanzi ba Yuda batsembwe. Efurayimu ntizongera ukundi kugirira Yuda ishyari, na Yuda ye kuzongera ukundi kugirira nabi Efurayimu.

¹⁴Bazirohera icyarimwe ku misozi y’Abafilisiti b’iburengerazuba, bishyire hamwe basahure abatuye iburasirazuba. Bazabangura ukuboko kwabo kuri Edomu na Mowabu, naho bene Amoni bazabayoboke.

¹⁵Uhoraho azakamya ikigobe cy’inyanja yo mu Misiri, abangure ukuboko akwerekeje kuri Efurati, ku bw’imbaraga z’umwuka we, ayigabanyemo amashami arindwi, ku buryo bazashobora kuyambuka n’ibirenge.

¹⁶Hazabaho inzira imwe ku barokotse b’umuryango we, abazaba basigaye muri Ashuru, nk’uko byagenze ku Bayisraheli, umunsi bazamutse bava mu gihugu cya Misiri.