Read kinyarwanda Izayi 13 Bible Online

Izayi 13 - kinyarwanda bible

Izayi 13

¹[37][38] Iteka ryaciriwe Babiloni, uko Izayi mwene Amosi yarihawe.

²Nimushinge ikimenyetso ku musozi w’agasi, murangurure amajwi, mubarembuze, binjire mu marembo y’abanyacyubahiro.

³Ni jyewe ubwanjye wihamagarije abanyobotse, nitumiriza ingabo zanjye z’intwari, zitabira uburakari bwanjye, zigaharanira ishema ryanjye.

⁴Nimwumve uwo muririmo uri mu misozi, wagira ngo ni igitero cy’abantu benshi. Nimutege amatwi urwo rusaku rw’amahanga yakoranye: Uhoraho, umugaba w’ingabo, aranyura hagati y’ingabo zigiye ku rugamba.

⁵Baturutse mu gihugu cya kure, iyo riterwa inkingi, bitabiriye uburakari bw’Uhoraho, baje kurimbura igihugu cyose.

⁶Nimuganye, muboroge, kuko umunsi w’Uhoraho wegereje, nk’umunsi w’uburimbuke, butewe n’Umugaba w’ingabo.

⁷Ni cyo gitumye amaboko yose adandabirana, buri muntu agacika intege.

⁸Ngaho barakangaranye, bafashwe n’ububabare bw’amoko yose, bararibwa nk’umugore uramutswe. Bararebana bakumirwa, bakagira isoni mu maso.

⁹Nguyu uraje umunsi w’Uhoraho, umunsi utimirwa, uzanye n’uburakari bw’igikatu, buje kurimbura igihugu, bukagitsembamo abanyabyaha.

¹⁰Inyenyeri zo ku ijuru n’ubwinshi bwazo, ntizizongera kumurika ukundi, izuba rizijima rikirasa, ukwezi koye kumurika.

¹¹Nzahana isi kubera ubugome bwayo, inkozi z’ibibi nzihore ibicumuro byazo. Nzakuraho ukwikuza kw’abibone, nzacogoze ubwirasi bw’abategetsi b’abagome.

¹²Nzagabanya abantu batube nka zahabu igogoye, babe ingume kurusha zahabu y’i Ofiri.

¹³Ijuru rizahubangana, isi ihinde umushyitsi, bitewe n’ubukana bw’Uhoraho, Umugaba w’ingabo, ku munsi azagaragarizaho uburakari bwe.

¹⁴Bityo rero, bazamere nk’isha ikurikiwe n’umuhigi, cyangwa nk’umukumbi utagira umushumba. Buri wese azirukanke asanga umuryango we, ahungire mu gihugu cye.

¹⁵Abo bazahura bose babahinguranye n’imyambi, abo bazafata, babamarire ku nkota.

¹⁶Abana babo bazahonyorerwa mu maso yabo, basahure amazu yabo ; bigabize abagore babo ku gahato.

¹⁷Ngiye kubateza Abamedi, bo batitaye kuri feza, na zahabu ntibashishikaze.

¹⁸Abasore bazarimbuzwa imiheto, ntibazababarira impinja zikivuka, n’ibitambambuga ntibazabigirira impuhwe.

¹⁹Babiloni, yari umutako w’abami n’ingoma zabo, ikaba umurato w’akataraboneka ku Bakalideya, izarimbuka nk’uko Imana yagenjeje Sodoma na Gomora.

²⁰Ingoma ibihumbi idatuwe ukundi, izagume ityo, uko ibihe bigenda bisimburana. Ndetse n’abangara ntibazahashinga ihema ryabo, n’abashumba ntibazahahagarara.

²¹Inturo zizahagira indiri yazo, amazu atahwe n’ibihunyira. Za mbuni zizahagira intaho yazo, n’ibikoko bihabyinire.

²²Impyisi zizahumira mu minara yabo, imbwebwe zimokere mu ngoro z’ibyishimo. Igihe cyayo kiregereje, iminsi yayo irabaze.