Read kinyarwanda Izayi 15 Bible Online

Izayi 15 - kinyarwanda bible

Izayi 15

¹Iteka ryaciriwe igihugu cya Mowabu: Ari‐Mowabu yarazimanganye, itsembwa mu ijoro rimwe! Kiri‐Mowabu na yo yarimbutse nijoro, ishiraho!

²Barazamutse bagiye ahirengeye, ku ngoro ya Diboni kuririrayo. Abamowabu bararirira ku musozi wa Nebo n’i Medeba[42], imitwe yabo barayikomboje, n’ubwanwa bwose barabwogosha.

³Mu nzira baragenda bambaye ibigunira, bose baraborogera hejuru y’amazu no ku karubanda.

⁴Ab’i Heshiboni n’i Eleyale barataka bikagera i Yahasi, ingabo za Mowabu ziravuza induru, umutima wabo washengutse.

⁵Mowabu irambabaje: dore abantu bayo barahunga bagana i Sowari n’i Egalati‐Shelishiya. Bazamutse umusozi wa Luhiti barira, induru yabo ndende irumvikanira ku nzira igana i Horonayimu.

⁶Amazi y’i Mimirimu yarakamye, ubwatsi bwaragwengeye, ntibukiharangwa.

⁷None ubutunzi bari basigaranye, babwimuriye hakurya y’umugezi w’inturusu.

⁸Induru ni yose, impande zose z’igihugu cya Mowabu, imiborogo irumvikanira i Egalayimu, ikagera no ku mariba y’i Elimu.

⁹Amazi y’i Diboni yuzuyemo amaraso, kandi i Diboni hiyongereyeho n’ikindi cyago, intare igiye gutanyagura abarokotse ba Mowabu, abazaba basigaye mu gihugu.