Read kinyarwanda Izayi 18 Bible Online

Izayi 18 - kinyarwanda bible

Izayi 18

¹[46] Uragowe ! Wa gihugu we cyuzuye urusaku rw’amababa y’udukoko[47] turi ku nzuzi z’i Kushi,

²wowe wohereza intumwa zinyuze mu nyanja, zikaza mu mato y’imfunzo hejuru y’amazi. Nimwihute, ntumwa zabuhiriye, mutahe iwanyu[48] muri kiriya gihugu cy’abantu barebare b’umubiri unogereye, igihugu gitinywa kugera ku mpera z’isi, igihugu gikomeye kandi gishikamira abanzi, kikaba cyambukiranyijwe n’inzuzi.

³Yemwe, bantu batuye isi mwese, ubwo ikimenyetso kizigaragaza ku musozi, muzacyitegereze ! Naho ihembe nirivuga, muzatege amatwi.

⁴Kuko Uhoraho yambwiye ati «Nzigumira hamwe, maze nitegerereze aho ntuye, mere nk’ubushyuhe hejuru y’urumuri, cyangwa nk’urwokotsi, igihe cy’ubushyuhe bw’isarura.

⁵Nuko ahagana igihe cy’isarura, ururabyo ruhunduye, amahundo amaze guhisha, imbuto bazitemesha umuhoro, naho amashami adafite akamaro akajugunywa,

⁶ibyo byose bizagabizwe inkongoro zo ku misozi n’inyamaswa z’inkazi. Inkongoro zizahamara impeshyi yose, inyamaswa z’inkazi zose, zihugame itumba.»

⁷Icyo gihe, mu gihugu cy’abantu barebare b’umubiri unogereye, igihugu gitinywa kugera ku mpera z’isi, igihugu gikomeye kandi gishikamira abanzi, kikambukiranywa n’inzuzi, kizazanira amaturo Uhoraho, Umugaba w’ingabo ku musozi wa Siyoni aho aganje.