Read kinyarwanda Izayi 19 Bible Online

Izayi 19 - kinyarwanda bible

Izayi 19

¹[49] Iteka ryaciriwe ku gihugu cya Misiri. Dore Uhoraho aragendera mu bicu byihuta: aje mu Misiri. Ibigirwamana byaho bizahinda umushyitsi imbere ye, na Misiri ubwayo icike intege.

²Nzateranya Abanyamisiri basubiranemo, buri muntu arwane n’umuvandimwe cyangwa umuturanyi we, umugi urwane n’undi, n’ingoma zisubiranemo.

³Abanyamisiri bazata umutwe, bityo mburizemo umugambi wabo. Nuko biyambaze ibigirwamana byabo, abacunnyi, abashitsi n’abapfumu babo.

⁴Nzabateza ubutegetsi bw’igitugu, umwami w’umunyamaboko azabategeke. Uwo ni Nyagasani Uhoraho, Umugaba w’ingabo, ubivuze.

⁵Amazi y’inyanja azarigita, uruzi rukame hume,

⁶imigezi izahinduka umunuko, amashami y’uruzi rwa Misiri azagabanuka, akame, bityo imbingo n’imfunzo zumirane.

⁷Urufunzo rwo ku nkombe za Nili, n’urw’aho yirohera mu nyanja, mbese ibimera byose ku nkombe y’uruzi bizume, bishireho, he kugira na kimwe gisigara.

⁸Abarobyi bazashavura, abarobesha indobani muri Nili baganye, n’abatega imitego mu mazi bazongwe bose.

⁹Abahinzi b’ibihingwa bivamo ubudodo bazashoberwe, abadozi n’ababoshyi b’imyenda basuherwe,

¹⁰abategura ibinyobwa bazakuke umutima, n’abenga amayoga bacikemo igikuba.

¹¹Abatware b’i Tanisi ni ibigoryi rwose, inama y’abajyanama ba Farawo ni amanjwe. Mushobora mute kubwira Farawo, muti «Ndi umuhanga, ndi uwo mu nkomoko y’abami ba kera» ?

¹²Abahanga bawe se bari hehe? Nibakwigishe rero, kandi bakumenyeshe umugambi w’Uhoraho, Umugaba w’ingabo, werekeye Misiri.

¹³Abatware b’i Tanisi bahindutse ibigoryi, ab’i Memfisi bibereye mu nzozi, bariho barayobya Misiri, kandi ari bo gahuzamiryango.

¹⁴Uhoraho yabatesheje umutwe, bityo bayobya Misiri mu byo ikora byose, boshye umusinzi wigaragura mu birutsi bye.

¹⁵Kuva ku muntu wo hejuru kugera ku uciye bugufi mu Misiri, kuva ku bakomeye kugera ku boroheje, nta n’umwe uzagira icyo ageraho kimufitiye akamaro.

¹⁶[50] Uwo munsi, Abanyamisiri bazamera nk’abagore, bazahahamuka kandi batengurwe, nibabona Uhoraho Umugaba w’ingabo, abanguye ukuboko kugira ngo abatsembe.

¹⁷Igihugu cya Yuda kizahora gikangaranya Abanyamisiri, buri gihe uko bazajya babwirwa amateka yacyo bahinde umushyitsi, kubera umugambi w’Uhoraho Umugaba w’ingabo, werekeye Misiri.

¹⁸Uwo munsi kandi, imigi itanu yo mu Misiri izavuga igihebureyi, bityo igirane isezerano n’Uhoraho Umugaba w’ingabo. Umwe muri iyo migi ukazitwa Iri‐Haheresi, ari byo kuvuga ngo: umugi w’uburimbuke.

¹⁹Uwo munsi, hazubakwa urutambiro rw’Uhoraho rwagati mu gihugu cya Misiri, n’inkingi yeguriwe Uhoraho ahagana ku mupaka.

²⁰Icyo kizaba ikimenyetso n’intangamugabo ko Uhoraho, Umugaba w’ingabo, ari mu gihugu cya Misiri. Igihe bazatakambira Uhoraho bugarijwe n’ababisha, azaboherereza umukiza ubatabara, ababohoze.

²¹Uhoraho azimenyesha Abanyamisiri, uwo munsi na bo bamumenye. Bazamutura ibitambo n’andi maturo, bagirire Uhoraho amasezerano kandi bayakomeze.

²²Nuko rero, niba Uhoraho yarahannye bikomeye Abanyamisiri, noneho agiye kubakiza: bazagarukire Uhoraho uzabababarira, akabakiza.

²³Uwo munsi hazaboneka umuhanda uhuza Misiri na Ashuru, Abanyashuru bajye mu Misiri, n’Abanyamisiri baze muri Ashuru. Abanyamisiri bazasenga Imana ya Israheli kimwe n’Abanyashuru.

²⁴Uwo munsi rero, Israheli izaza ari iya gatatu kuri Misiri na Ashuru, ari na yo,

²⁵Uhoraho Umugaba w’ingabo, azaheramo isi umugisha muri aya magambo : Nigire umugisha Misiri igihugu cyanjye, na Ashuru igikorwa cy’ibiganza byanjye, na Israheli umugabane wanjye!