Read kinyarwanda Izayi 21 Bible Online

Izayi 21 - kinyarwanda bible

Izayi 21

¹[53] Iteka ryaciriwe ku butayu bwo ku nyanja[54] Ng’uwo araje, aturutse mu butayu, mu gihugu giteye ubwoba, arahutera nk’inkubi y’umuyaga yambukiranya Negebu.

²Ni ibintu biteye ubwoba neretswe: «Umugambanyi ariho aragambana, umurimbuzi ararimbura. Elamu, ngaho zamuka utere; namwe, Bamedi, nimufate umugi! Kuko ngiye guhoza abari mu maganya bose.»

³None ndumva impyiko zimbaga, nafashwe n’ububabare nk’umugore uramutswe. Meze nabi bituma ntumva, mfite n’ubwoba simbona.

⁴Nataye ubwenge, ndatengurwa kubera ubwoba, amafu y’umugoroba nifuje, ampindukiyemo iterabwoba.

⁵Ameza yateguwe, ibirago byadanduwe, bariho bararya kandi baranywa[55] . . . ‥ . . Nimuhaguruke, batware b’imitwe ! Musige amavuta ingabo zanyu z’imitamenwa.

⁶Kuko Nyagasani yambwiye ati «Genda, ushyireho umunetsi, abamenyeshe ibyo areba.

⁷Nabona igare rikururwa n’amafarasi abiri, cyangwa ugendera ku ndogobe no ku ngamiya, azitonde kandi yitegereze neza !»

⁸Nuko umunetsi atera hejuru, ati «Shobuja, umunsi wose mba ndi ku izamu, nkarara mpagaze ijoro ryose nkora uwo murimo.

⁹None dore ibyo mbona: Haje umuntu uri ku igare rikururwa n’amafarasi abiri.» Arongera ati «Babiloni iratsinzwe, iraneshejwe Babiloni, n’ibishushanyo by’ibigirwamana byayo bishiriye ku butaka, bihindutse ivu.»

¹⁰Muryango wanjye, wowe Uhoraho yahondaguye, boshye imyaka bahurira ku mbuga ; ibyo ni byo numvanye Uhoraho, Umugaba w’ingabo, Imana ya Israheli, none ndabikumenyesheje.

¹¹Iteka ryaciriwe kuri Duma. Ijwi riturutse i Seyiri rirabaza riti «Yewe wa munyezamu we, ijoro rigeze he ? Mbese ijoro ryaba rigeze he, wa munyezamu we ?»

¹²Umunyezamu arasubiza ati «Bugiye gucya, ariko bwongere bwire. Niba mushaka kongera kumbaza, muze kugaruka.»

¹³Iteka ryaciriwe kuri Arabiya. Bagenzi b’i Dedani mwe, mu bihuru byo muri Arabiya ni ho muzarara.

¹⁴Naho mwe, baturage b’i Tema, nimujye gusanganira abishwe n’inyota, nimubashyire amazi yo kunywa. Nimusanganire impunzi, muzishyire umugati,

¹⁵kuko ziriho zihunga inkota, inkota yakuwe mu rwubati, zirahunga imiheto ifoye, zigahunga n’amakuba y’intambara.

¹⁶Nyamara dore ibyo Nyagasani yambwiye : Hasigaye umwaka umwe gusa, utarengaho n’umunsi n’umwe, maze ikuzo ryose ry’i Kedari rikarangira,

¹⁷hakazasigara mbarwa mu banyamiheto b’ingabo z’i Kedari. Uwo ni Uhoraho, Imana ya Israheli ubivuze.