Read kinyarwanda Izayi 24 Bible Online

Izayi 24 - kinyarwanda bible

Izayi 24

¹[59] Dore Uhoraho agiye kuyogoza isi no kuyirimbura, ayihindure ukundi, atatanye abayituye:

²abaherezabitambo kimwe n’imbaga, umutware kimwe n’umugaragu, umugore kimwe n’umuja, umucuruzi kimwe n’umuguzi, uguzwa kimwe n’ugurizwa, ugomba kwishyura n’uwishyurwa.

³Isi izarimbuka ishireho burundu, nk’uko Uhoraho yabivuze.

⁴Igihugu kiri mu cyunamo, kirononekara, isi yose iriho irakendera, ijuru na ryo ryacitse intege kimwe n’isi.

⁵Isi yahindanyijwe n’abayituye, kuko baciye ku mategeko, baciye ku mabwiriza, bica isezerano ry’iteka[60] bagiranye n’Uhoraho.

⁶Ni yo mpamvu umuvumo uyogoje isi, ugakururira amakuba abayituye; none abatuye isi bakaba bashizeho, hagasigara mbarwa.

⁷[61]Divayi nshya iri mu mubabaro, umuzabibu urarabiranye, abari bamerewe neza bose baraganya.

⁸Amajwi y’ingoma yanezezaga ararangiye, isahinda ry’abanezerewe rirashize, n’amajwi ashimishije y’inanga arahwekereye.

⁹Nta bakinywa divayi baririmba, ibinyobwa bikomeye bisigaye bibarurira.

¹⁰Umurwa w’akajagari ubaye amatongo, amazu yose akinzwe ubudakinguka.

¹¹Mu mihanda y’umugi barabaririza divayi, umunezero wose wayotse, ibyishimo ntibikirangwa mu gihugu.

¹²Umugi usigaye ari amatongo, n’irembo ryawo ryarimbutse.

¹³Igihugu kirakendereye kimwe n’abagituye, boshye imizeti yahuruweho imbuto, cyangwa imihumbano y’umuzabibu, nyuma y’isarura.

¹⁴Abarokotse ngaho bahanitse amajwi, bararirimba icyubahiro cy’Uhoraho, abo ku nkengero y’inyanja, basabagijwe n’ibyishimo.

¹⁵Mu burasirazuba barasingiza Uhoraho, mu birwa byo mu nyanja bararata izina ry’Uhoraho, Imana ya Israheli.

¹⁶Twumvise n’abo mu mpera z’isi baririmba bati «Nasinginzwe Nyir’ubutungane!» Ariko ndibwira nti «Nta bwo! Ndahejeje! Noneho ndagowe!» Abagambanyi baragambanye! Mbega ubugambanyi! Abagambanyi baragambanye!

¹⁷Ubwoba, umwobo n’umutego, ng’ibyo ibikugarije wowe utuye iki gihugu.

¹⁸Uzahunga urusaku ruteye ubwoba, azagwa mu mwobo; nazamuka mu mwobo, afatwe mu mutego. Ingomero zo mu ijuru zafunguwe, imfatiro z’isi zitangiye kunyeganyega.

¹⁹Isi iriyashije, irataraka, iratigita.

²⁰Isi iradandabiranye nk’umusinzi, irayegayeze boshye inzu ijya gutemba, icyaha cyayo kirayiremereye, yirunze hasi, kandi ntigishoboye kuhiyegura.

²¹Uwo munsi, mu ijuru, Uhoraho azahana ingabo zihari[62], naho ku isi, ahane abami b’aho.

²²Bazarundwa mu mwobo ari imbohe, bashyirwe mu munyururu, ariko nibahamara igihe kirekire, bazashyikirizwe ubucamanza.

²³Nuko ukwezi kuzahindure ibara, gukorwe n’isoni, izuba ryijime, rimware, kuko Uhoraho, Umugaba w’ingabo, ari we mwami w’umusozi wa Siyoni n’uwa Yeruzalemu kandi ikuzo rye rikabengerana mu maso y’abakuru b’umuryango.