Read kinyarwanda Izayi 26 Bible Online

Izayi 26 - kinyarwanda bible

Izayi 26

¹Uwo munsi, mu gihugu cyose cya Yuda, bazatera iyi ndirimbo, bagira bati «Dufite umurwa ukomeye; Uhoraho, kugira ngo aturengere, yawuzengurukijeho inkike icinyiye.

²Nimwugurure amarembo! Ryinjire, ihanga ry’intungane kandi ry’indahemuka.

³Umugambi wawe ntukuka: Uzabakomeza mu mahoro, kuko amizero yabo ari muri wowe.

⁴Nimwizere Uhoraho iteka ryose, we rutare ruhoraho,

⁵kuko yacogoje abari batuye mu bitwa, umurwa ukomeye arawurimbura, uratsiratsizwa, maze awuziringa mu mukungugu.

⁶Abiyoroshya bazawuribata, n’abanyantegenke bawunyukanyuke.»

⁷Inzira y’umuntu w’intungane iraboneye, nawe Uhoraho, urayimutunganyiriza.

⁸Mu nzira udutegeka kunyuramo, Uhoraho turakwiringira, icyo twifuza, ni ukurata izina ryawe.

⁹Ijoro ryose ndakuzirikana, nkagushakashaka n’umutima wanjye, kuko iyo amategeko yawe akurikizwa ku isi, abayituye bayamenyeraho ubutungane.

¹⁰Ariko iyo bababariye umugome, ntamenya ubutabera icyo ari cyo. Akora nabi mu gihugu cy’ubutungane, ntabone ikuzo ry’Uhoraho.

¹¹Wabanguye ukuboko kwawe, Uhoraho, ntibakubona, nyamara bazabona ishyaka urwanirira umuryango wawe, bakorwe n’isoni, kandi batwikwe n’umuriro wagenewe abanzi bawe.

¹²Ni wowe uduha amahoro, Uhoraho; ukadusohoreza ibyo dukora byose.

¹³Uhoraho, Mana yacu, abandi bategetsi bigeze kudutegeka, ariko ni izina ryawe ryonyine twiyambaza.

¹⁴Ubwo abapfuye batazongera kubaho, ntibazashobora kweguka ukundi, warabateye urabarimbura, urabasibanganya ubutazagira urwibutso.

¹⁵Watugize umuryango ukomeye, wowe Uhoraho, utugira ihanga rikomeye, ugaragaza utyo ikuzo ryawe, kandi wagura imipaka y’igihugu cyacu.

¹⁶Mu mubabaro wacu twarakwirukiye, igihe uduhannye turagutakambira.

¹⁷Imbere yawe, Uhoraho, twari tumeze nk’umugore utwite, uhindagana kuko ari hafi kubyara, agatakishwa n’ububabare.

¹⁸Natwe twari dutwite, turi mu mibabaro y’iramukwa, ariko tumera nk’aho tubyaye umuyaga: nta bwo twazaniye isi agakiza, cyangwa ngo tuyibyarire abaturage bashya.

¹⁹Abawe bapfuye bazongera kubaho, imirambo yabo izazuka. Mwebwe abari mu mukungugu, nimukanguke, nimusabwe n’ibyishimo! Kuko ikime cy’Uhoraho ari urumuri rutonyanga ku isi, bityo abari barapfuye bazagaruke imusozi.

²⁰Muryango wanjye, genda winjire iwawe, kandi ufunge inzugi zombi. Ihishe akanya gato, uburakari bugiye guhita.

²¹Dore Uhoraho asohotse iwe, kugira ngo ahane abatuye isi kubera ubugome bwabo. Isi igiye gutahurwaho amaraso yamennye, kandi ntizongera guhisha imirambo y’abapfuye.