Read kinyarwanda Izayi 27 Bible Online

Izayi 27 - kinyarwanda bible

Izayi 27

¹Uwo munsi, Uhoraho azatabara, afite inkota nini, ityaye kandi ikomeye, atere icyo gikoko Leviyatani[65], ya nzoka yihotagura kandi yihuta, yice Ikiyoka cyo mu nyanja.

²Uwo munsi, muzaririmba umuzabibu[66] utagira uko usa:

³Jye, Uhoraho ndawumenya, nkawuvomerera buri gihe. Ndawurinda amanywa n’ijoro, kugira ngo batawangiza.

⁴Nta bwo njya ndakara, iyo nywubonyemo amahwa n’imifatangwe, ahubwo ndayatema nkayarunda hamwe, maze nkayatwika.

⁵Ariko uzanyiringira, tuzabana mu mahoro, koko amahoro azaba yose hagati yacu.

⁶Mu bihe bizaza, bene Yakobo bazashinga imizi bundi bushya, Israheli izapfundika yere ururabyo, imbuto zarwo zikwire ku isi.

⁷Uhoraho se yaba yarabahannye, uko yahannye ababakubitaga ? Yaba se yarabishe, uko yishe ababicaga ?

⁸Oya! Ahubwo yabaciriye urubanza, abamenesha mu gihugu, yabirukanye umunsi umwe, akoresheje umwuka we ukaze, n’inkubi y’umuyaga uturutse mu burasirazuba.

⁹Ni na ko icyaha cya bene Yakobo kizahanagurwa, maze bagakira ingaruka z’igicumuro cyabo : Amabuye yose yari yubatse urutambiro[67] bazayahindura ivu, boshye ishwagara yashongeshejwe ; ibiti byeguriwe ibigirwamana n’ibishushanyo by’izuba, byoye kuzashingwa ukundi.

¹⁰[68]Umugi wari ukomeye uzasigarire aho, waratereranywe nk’ubutayu butagituwe. Inyana zizahahuka, zinaharare, kandi zirishe amashami y’ibihuru.

¹¹Ayo mashami namara kugwengera, abagore bazayavunagure, maze bayacane. Ni koko uyu muryango ntiwumva ; ni yo mpamvu Uwawuremye atawugiriye impuhwe, Uwawuhanze ntawubabarire.

¹²Uwo munsi, Uhoraho azahura imyaka ye, uhereye ku ruzi rwa Efurati kugeza ku mugezi wa Misiri. Nuko mwebwe Abayisraheli, muzasarurwe mutyo, umwe umwe.

¹³Uwo munsi kandi, ihembe rirangira rizavuga, abatataniye mu gihugu cya Ashuru, hamwe n’abirukanywe mu gihugu cya Misiri, bose baze bapfukamire Uhoraho, ku musozi mutagatifu, i Yeruzalemu.