Read kinyarwanda Izayi 28 Bible Online

Izayi 28 - kinyarwanda bible

Izayi 28

¹[69] Uragowe! Wowe kamba ry’ubwibone bw’abasinzi b’i Efurayimu. Uzabona ishyano, wowe wubatswe hejuru y’ikibaya kirumbuka, kuko umeze nk’indabyo zumiranye, zitatse ku mutwe w’abazahajwe na divayi.

²Dore umurwanyi ukomeye[70], aturutse kuri Uhoraho, ameze nk’amahindu y’urubura n’inkubi y’umuyaga urimbura, cyangwa se umuhengeri utumbagira amazi akarenga inkombe, azatsemba byose n’ingufu nyinshi.

³Azaribata rya kamba ry’ubwibone bw’abasinzi b’i Efurayimu,

⁴na za ndabyo zumiranye zitatse ku mutwe w’abatuye hejuru y’ikibaya kirumbuka. Bazamera nk’imbuto y’umutini, ihishije mbere y’icyi : uyirabutswe wese, agahera ko ayifata akayimira.

⁵Uwo munsi, Uhoraho Umugaba w’ingabo, azaba ikamba ribengerana, urugori n’umutako, bitatse ku mutwe w’abasigaye b’umuryango we.

⁶Ni we mwuka w’ubutabera w’abaca imanza zitabera, akaba ubutwari bw’abirukana umwanzi mu marembo y’umugi.

⁷Abaherezabitambo n’abahanuzi barayobye kubera divayi, baradandabirana kubera ibinyobwa bikaze, ibiyobyabwenge birabayobeje na divayi irabatabitse, baradandabirana kubera ibinyobwa bikaze, barayoba mu ibonekerwa ryabo, bakibeshya igihe bahanura.

⁸Ameza yabo yuzuyeho ibirutsi binuka, imyanda yabo bayikwije ahantu hose.

⁹Barabazanya bati «Mbese ni bande uriya muhanuzi ashaka kwigisha ? Ni bande yaba ashaka gusobanurira iby’ibonekerwa rye ? Ni abana se bamaze gucuka, cyangwa ni abakiri ku ibere,

¹⁰ku buryo yatinyuka kutubwira ngo ’Ca aha, icara, gira utya, tatata, dadada[71]’?

¹¹Nyamara kandi, ni muri iyo mvugo ididimanga, muri urwo rurimi rw’amahanga, Uhoraho azavugana n’umuryango we.

¹²We wari warababwiye ati «Dore ikiruhuko, nimureke unaniwe aruhuke, aha ni ahantu h’uburuhukiro.» Nyamara ntibashatse kumwumva.

¹³Bityo ijambo ry’Uhoraho kuri bo, rizabe rya rindi: «Ca aha, icara, gira utya, tatata, dadada!» Nibaba bagenda, bazitura hasi, babirinduke, bavunike umugongo, bafatwe n’umutego ubutazawuvamo.

¹⁴[72]Nuko rero, nimutege amatwi ijambo ry’Uhoraho, mwe bashungerezi, bategeka uyu muryango w’i Yeruzalemu.

¹⁵Muravuga muti «Twagiranye isezerano n’urupfu, duhana igihango n’ab’ikuzimu. N’ubwo haza icyorezo gikaze nticyadushyikira, kuko dufite ikinyoma ho ubuhungiro, uburyarya bukaba ubwugamo bwacu.»

¹⁶Nyamara, Nyagasani Imana avuze atya: Dore nshyize muri Siyoni ibuye rikomeye, ibuye ry’insanganyarukuta[73] kandi ry’agaciro gakomeye, kugira ngo ribabere ifatizo. Uzaryishingikiriza wese, nta bwo azanyeganyega.

¹⁷Ubutungane buzambera inago yo gupimisha, ubutabera bumbere imbaho y’amazi. Urubura ruzakubura ubuhungiro bw’ikinyoma, amazi ahitane ubwugamo bwanyu.

¹⁸Isezerano ryanyu n’Urupfu rizasibangana, igihango cyanyu n’ikuzimu ntikizafata. Icyorezo gikaze rero nikiza, kizabayogoze.

¹⁹Buri gihe uko kije kizabageraho, kuko kizahita buri gitondo, ku manywa na nijoro, igihe muzacyumva muzagira ubwoba bukabije.

²⁰Uburiri buzaba bugufi, ku buryo umuntu atarambya, ikiringiti kibe gito, ku buryo yiyorosa ntikimukwire[74].

²¹Uhoraho agiye guhaguruka, uko yabigenje ku musozi wa Perasimu, arakare nko mu kibaya cya Gibewoni, kugira ngo arangize igikorwa cye kidasanzwe, asoze umurimo we w’agatangaza.

²²None rero, ntimukongere ukundi kumuseka, hato ingoyi zanyu zitarushaho kubakanaga, kuko Nyagasani, Uhoraho Umugaba w’ingabo, ambwiye ko yamaze gufata umugambi wo kurimbura igihugo cyose.

²³Nimutege amatwi munyumve! Nimwitonde, mwumve amagambo yanjye!

²⁴Mbese umuhinzi ujya guhinga umurima we, amarira igihe cye cyose mu kurima, gutabira, cyangwa se mu gucoca amasinde gusa?

²⁵Ntageza aho agasanza ubutaka bwe, hanyuma akabibamo umurama w’icyatsi gihumura neza, ingano nini n’inkori, n’andi moko yose y’imbuto, n’ibigori ku ruhande.

²⁶Nuko rero, Imana ni yo imwerekera, ikamwigisha.

²⁷Icyatsi gihumura neza ntigihurishwa imashini, cyangwa ngo gihonyozwe inziga z’amagare, ahubwo icyatsi gihumura neza gihurishwa ikibando kigahonyozwa inshyimbo.

²⁸Ingano se zo zihurwa ku buhe buryo? Iyo bazihura ntibazisya burundu, bazinyuza hejuru imashini n’igare riyikurura, ariko bakirinda kuzimenagura.

²⁹Ibyo na byo bikomoka kuri Uhoraho, Umugaba w’ingabo, wigaragaza nk’umujyanama mwiza, n’umuhanga mu kumenya gukora.