Read kinyarwanda Izayi 29 Bible Online

Izayi 29 - kinyarwanda bible

Izayi 29

¹[75] Yewe Ariyeli, Ariyeli[76]! Wowe murwa Dawudi yigaruriye! Murangize umwaka, mufatire undi, n’iminsi mikuru muyikorere igihe cyayo,

²ariko amaherezo nzahana Ariyeli; izasigare irangwa n’amarira n’imiborogo. Kuri jye, izaba imeze nk’urutambiro batwikiraho ibitambo.

³Nk’uko Dawudi yabigize, nanjye nzashinga ingando impande zawe zose, nzakuzengurutseho ibikudindiza, nkurundeho ibyuma bigusenyure.

⁴Umaze kugwa uzavugira hasi; nuvuga, ijwi ryawe rijwigire rizamuke mu mukungugu, rivugire mu butaka rijwigira, rizamuke ikuzimu boshye iry’umuzimu.

⁵Abanzi bawe batabarika bazatumuka nk’umukungugu, abanyagitugu bamere nk’umurama utwawe n’umuyaga.

⁶Ako kanya, Uhoraho, Umugaba w’ingabo, azahita akurenganura, amanutse mu muhindagano w’inkuba, mu mutingito, mu rusaku rukomeye, no mu nkubi y’umuyaga, mu muhengeri no mu ndimi z’umuriro utwika.

⁷Ubwo imbaga y’abantu batabarika izaba iteye Ariyeli, abazaba bakurwanya, abakugose n’abagushikamiye, bizababere urujijo, nk’inzozi za nijoro.

⁸Bizabamerera nk’umushonji urota arya, nyamara akaramukana inzara, cyangwa uwishwe n’inyota, akarota anywa, ariko akaramuka ananiwe n’umuhogo wumiranye. Ni ko bizagendekera n’iyo mbaga y’abantu, izaba irwanya umusozi wa Siyoni[77].

⁹[78]Nimutangare kandi mwumirwe, muhinduke impumyi ubudahunyeza, mube abasinzi, ariko mutasomye kuri divayi, mudandabirane, ariko mutanyoye ibisindisha,

¹⁰kuko Uhoraho yabasutseho umwuka ubasinziriza, akabahuma amaso, mwe bahanuzi, agapfuka imitwe yanyu, mwe bashishozi.

¹¹Ibi mweretswe, bibabereye nk’amagambo y’umuzinge ufungishije kashe, bahereje umuntu uzi gusoma bamubwira bati «Soma ibi ngibi», we agasubiza ati «Sinabishobora, kuko umuzinge ufungishije kashe.»

¹²Noneho bawuhereza utazi gusoma bamubwira bati «Soma ibi ngibi», arasubiza ati «Nta bwo nzi gusoma.»

¹³Uhoraho aravuga ati «Uyu muryango unyubahisha ururimi gusa, bakampesha ikuzo iminwa misa, ariko umutima wabo ukaba kure yanjye. Icyubahiro bampa ni icyahimbwe n’abantu, kimeze nk’isomo bigishijwe.

¹⁴Ni cyo gitumye ngiye gukomeza kuwubera urujijo, ku buryo ubuhanga bw’abahanga babo buzazima, n’ubwenge bw’abanyabwenge babo bukajijwa.»

¹⁵Baragowe, abakorera mu bwihisho, bagakinga Uhoraho imigambi yabo, bakagambana mu mwijima, bavuga bati «Ni nde utubona cyangwa se ngo atumenye ?»

¹⁶Mbega ngo muracurika ibintu! Umubumbyi se ushobora kumufata nk’ibumba ? Noneho se, igikoresho cyabwira uwagikoze kiti «Nta bwo ari wowe wankoze!» Ikibindi kikabwira uwakibumbye kiti «Wamaze iki ?»

¹⁷Bigenze bityo se, mu gihe gito ishyamba rya Libani ntiryaba ryahindutse umurima w’imbuto ziribwa, naho umurima w’imbuto ziribwa ugahinduka ishyamba ?

¹⁸Uwo munsi, ibipfamatwi bizumva amagambo y’igitabo, n’impumyi zizasohoke mu mwijima w’icuraburindi, maze zibone.

¹⁹Abaciye bugufi bazarushaho kwishimira Uhoraho, n’abakene banezerwe kubera Nyirubutagatifu wa Israheli.

²⁰Kuko uwo munsi uzaba ari iherezo ry’abategetsi b’abagome, abashungerezi bagakozwa isoni, n’abashaka gukora nabi bose bakarimburwa.

²¹Bizagendekera bityo abagambanira abandi mu mvugo yabo, abatega abandi imitego mu manza, n’aboshya intungane gukora nabi.

²²Ni cyo gitumye Uhoraho, Imana y’inzu ya Yakobo, we warokoye Abrahamu, avuze atya: Umuryango wa Yakobo ntuzongera gukozwa isoni ukundi, n’uruhanga rwe ntiruzongera kwijima.

²³Kuko abana babo, babonye ibyo nakoreye muri bo, bazatagatifuza izina ryanjye, batagatifuze Nyirubutagatifu wa Yakobo, bityo bazatinye Imana ya Israheli.

²⁴Imitima yahabye izahabuka, n’abatavaga ku izima bemere kwigishwa.