Read kinyarwanda Izayi 3 Bible Online

Izayi 3 - kinyarwanda bible

Izayi 3

¹[7] Dore Nyagasani, Imana, Umugaba w’ingabo, azima Yeruzalemu na Yuda inkunga iyo ari yo yose, abime icyitwa umugati n’amazi cyose,

²abagomwe intwari n’umutabazi, umucamanza n’umuhanuzi, umupfumu n’umukuru w’umuryango,

³umukuru w’ingabo n’umunyacyubahiro, umujyanama, umunyabukorikori n’umuhanga mu by’ubushitsi.

⁴Nzabaha abasore[8] ho abatware, bazategekwe n’abana bato!

⁵Abantu bazagirirana nabi, umwe arenganye undi, umwana akangaranye umusaza, umutindi asuzugure umunyacyubahiro.

⁶Umuntu azafata umuvandimwe wo mu nzu ya se, agira ati «Ubwo wowe ufite umwambaro, utubere umutware, n’aya matongo abe ari wowe uyategeka!»

⁷Nuko undi azatere hejuru ati «Sinshoboye kubabera umukiza, iwanjye nta mugati, nta n’umwambaro: ntimushobora rero kungira umutware wa rubanda!»

⁸Yeruzalemu iradandabiranye, naho Yuda iratembye. Amagambo n’ibikorwa byabo bibangamira Uhoraho, bigasuzuguza ikuzo rye.

⁹Imisusire yabo ni yo ibashinja, beruye ibyaha byabo nka Sodoma, ntibakibihisha. Nibigorerwe! Bo bikururiye amakuba.

¹⁰Nimuvuge muti «Intungane irahirwa, kuko izanezezwa n’imbuto z’ibikorwa byayo;

¹¹umugome agushije ishyano, kuko azahanwa hakurikijwe ibikorwa bye.»

¹²Muryango wanjye, urenganywa n’umwana, ugategekwa n’abagore[9]! Muryango wanjye, abagutegeka barakuyobya, bakakunyuza inzira itaboneye!

¹³Uhoraho arahagurutse ngo ace urubanza, arahagaze ngo ashinje amahanga.

¹⁴Uhoraho agiye gucira imanza abakuru n’abatware b’umuryango we: «Ni mwebwe mwayogoje umuzabibu murawutsemba, kandi mubitse mu mazu yanyu, imicuzo y’abakene.

¹⁵Ni iki gituma mushikamira umuryango wanjye, kandi mukanyukanyuka abakene?» Uwo ni Nyagasani Uhoraho, Umugaba w’ingabo ubivuze.

¹⁶[10]Uhoraho avuze atya: Kubera ko abakobwa b’i Siyoni bishyize ejuru, bakagenda bagamitse amajosi, bica amaso, kubera kugendera ikimero, bacinya amayugi bambaye ku maguru yabo,

¹⁷Nyagasani azateza ibihushi imitwe y’abakobwa b’i Siyoni, maze bimyore uruhanga rwabo.

¹⁸Uwo munsi, Nyagasani azabambura imirimbo yose: amayugi, inigi n’ibirezi,

¹⁹amasaro, ibitare n’ibitambaro byo mu mutwe,

²⁰ingori n’imikufi, imikandara iboshye, imyeko n’impigi,

²¹impeta zo ku ntoki n’izo ku zuru,

²²imyambaro y’umunsi mukuru, ibishura, imyitero n’amasakoshi,

²³indorerwamo, amashati y’ubwoya, udutambaro bazinguriza ku mutwe n’amakamba.

²⁴Umubavu uzasimburwa n’umunuko, umweko uhinduke umugozi, ahari inweri hazaba ibiharanjongo, imyenda inyerera isimburwe n’ibigunira, ahari uburanga hahinduke inkovu y’icyasha.

²⁵Abagabo bawe bazamarwa n’inkota, intwari zawe zigwe ku rugamba.

²⁶Inkike zawe zizacura imiborogo, ziganye, kandi muri ubwo butindi, uzicare mu mukungugu.