Read kinyarwanda Izayi 31 Bible Online

Izayi 31 - kinyarwanda bible

Izayi 31

¹[82] Baragowe! Abamanuka bajya mu Misiri gutabaza! Barishingikiriza amafarasi, bakiringira amagare y’intambara kuko ari menshi, n’abanyamafarasi kuko ari abanyamaboko, ariko ntibite kuri Nyirubutagatifu wa Israheli, ntibashakashake Uhoraho.

²Nyamara ariko na we azi gushishoza: ashobora guteza amakuba, kandi ntiyivuguruze. Ahagurukiye gutera agatsiko k’abagome, n’abagiranabi bahururijwe gutabara.

³Umunyamisiri ni umuntu, ariko si Imana, amafarasi ye ni inyamaswa zigenda, si imbaraga z’Imana. Igihe Uhoraho azaba abanguye ukuboko kwe, utabaye azasitara, naho utabawe yiture hasi, nuko bombi bahinduke ivu.

⁴Dore rero uko Uhoraho yambwiye: Igihe intare cyangwa icyana cyayo itontomera ku muhigo, n’ubwo haba abashumba benshi bayihururijwe, ntikangwa na busa n’urusaku rwabo, cyangwa ngo icogozwe n’induru yabo. Uhoraho, Umugaba w’ingabo, ni ko azamanukira kuri Siyoni, umusozi we, kugira ngo aharwanire.

⁵Nk’uko ibisiga birambura amababa yabyo, Uhoraho, Umugaba w’ingabo, azabigenza atyo, bityo arengere Yeruzalemu; azayirengera kandi ayitabare; azayirinda kandi ayikize.

⁶Bayisraheli, nimugarukire Uwo mwagomeye!

⁷Uwo munsi, buri wese azajugunya ibigirwamana bye bya feza n’ibya zahabu, byakozwe n’ibiganza byanyu, bikabaviramo gucumura.

⁸Ashuru izamarwa n’inkota itari nk’iy’umuntu, izarimburwa n’inkota y’Ubasumbye, ntizayihunga; maze abasore bayo bakoreshwe imirimo y’uburetwa.

⁹Urutare[83] rwayo ruzarimbuka, rushireho, abatware bayo bacike intege, batererane ibendera ryabo. Uwo ni Uhoraho ubivuze, we ucanye ikome ry’umuriro i Siyoni, n’itanura i Yeruzalemu.