Read kinyarwanda Izayi 32 Bible Online

Izayi 32 - kinyarwanda bible

Izayi 32

¹[84] Nuko hazime umwami utegekana ubutabera, n’abatware bakurikira amategeko.

²Buri muntu muri bo, azamera nk’ubuhungiro bw’umuyaga, n’ubwugamo igihe cy’imvura n’imirabyo. Bazamera nk’amazi atemba ku butaka bwumiranye, cyangwa igicucu cy’urutare runini, mu gihugu cy’ubutayu.

³Amaso y’abashishozi ntazongera guhuma ukundi, n’amatwi y’abumva abahanuzi yumve kurushaho.

⁴Abatatekerezaga, bazazirikana kugira ngo bumve, ab’ururimi rudidimanga, bavuge bwangu, kandi ku buryo bwumvikana.

⁵Igipfamutima ntikizitwa umunyabuntu, n’indyarya ntizitwa umugiraneza.

⁶Koko kandi, uw’igipfamutima avuga ibinyabasazi, mu mutima we agatekereza ibibi; akora ibidatunganye kandi agatuka Uhoraho, ntagaburire umushonji, cyangwa ngo ahe icyo kunywa ufite inyota.

⁷Naho uw’indyarya yitwaza ubwicanyi; ashakisha amayeri yo kwicisha abanyabyago, ababeshyera, mu gihe abo bakene bo barwanaga ku burenganzira bwabo.

⁸Ariko umunyabuntu atekereza ibitunganye, ntagire ikindi yakora, kitari igikorwa cyiza.

⁹[85]Bagore b’abadabagizi, nimuhaguruke munyumve! Bakobwa b’abapfayongo, nimutege amatwi ibyo ngiye kubabwira!

¹⁰Nyuma y’umwaka muzaba muhagaritse umutima, mwa bapfayongo mwe, kuko imizabibu yanyu izaba yararumbye, maze ntimugire n’icyo musarura.

¹¹Nimuhinde umushyitsi, mwa badabagizi mwe, namwe bapfayongo, muhagarike umutima; nimwiyambure imyambaro yanyu, mukenyere ibigunira!

¹²Muzikomanga ku gituza, muririra imirima yabanezezaga, n’imizabibu yanyu yarumbukaga.

¹³Muzaririra ubutaka bw’umuryango wanjye, igihe buzaba bumeraho ibihuru by’amahwa, muririre n’amazu meza yose mwishimiragamo, mu murwa w’umunezero.

¹⁴Kuko ingoro y’umwami yatereranywe, umugi wari utuwe, ukaba uhindutse amatongo. Akarere ka Ofeli n’umunara w’abarinzi bizaba iteka ryose ubuvumo bw’indogobe z’ishyamba, n’urwuri rw’amatungo . . .

¹⁵. . . kugeza ko umwuka uturutse mu ijuru udusenderaho. Nuko ubutayu buhinduke ubusitani burumbuka, naho ubusitani burumbuka bwitwe ishyamba.

¹⁶Ubutungane buzatura mu butayu, ubutabera buture mu busitani burumbuka.

¹⁷Amahoro azaba imbuto y’ubutabera, ubutabera burumbuke ituze n’umutekano iteka ryose.

¹⁸Umuryango wanjye uzatura ahantu h’amahoro, mu mazu akomeye, ahantu hatuje kandi h’uburuhukiro.

¹⁹Ariko ishyamba rizarimburwa n’urubura, naho umugi usenyuke.

²⁰Murahirwa mwe muzaba mwarabibye imbuto ahari amazi hose, mukareka ibimasa n’indogobe bikishyira bikizana.