Read kinyarwanda Izayi 33 Bible Online

Izayi 33 - kinyarwanda bible

Izayi 33

¹[86] Uragowe! Wowe urimbura kandi utarabigiriwe; wowe ugwa abandi gitumo, kandi utarabikorewe. Igihe uzahosha kurimbura, nawe uzaherako urimburwa; igihe uzareka kugwa gitumo, nawe uzatungurwa.

²Uhoraho, tugirire impuhwe! Turakwiringiye. Utubere imbaraga buri gitondo, n’agakiza igihe cy’amage.

³Iyo uranguruye ijwi, ibihugu birahunga, wahaguruka, amahanga agatatana.

⁴Iminyago bayirohaho, boshye inzige ziteye, ibyawe bakabyikwiza, boshye ibihore mu mirima.

⁵Uhoraho arakuzwa, kuko atuye mu bushorishori bw’ijuru, akaba yarasendereje kuri Siyoni ubutungane n’ubutabera.

⁶Bityo uzagira umutekano iminsi yawe yose; ubuhanga n’ubumenyi ni byo bukungu bukiza, kugirira Uhoraho igitinyiro, ngubwo ubukire bwawe!

⁷[87]Dore abo mu mugi wa Ariyeli[88] baraborogera mu mayira, intumwa z’amahoro zirarira zahogoye.

⁸Imihanda nyabagendwa irimo ubusa, nta bagenzi bakirangwa mu mayira. Amasezerano yasheshwe, imigi yatereranywe, nta muntu n’umwe ukitaweho.

⁹Igihugu kirababaye, cyahwereye. Imisozi ya Libani yamanjiriwe, irarabiranye. Ikibaya cy’i Sharoni kibaye ubutayu. Ibiti by’i Bashani n’iby’i Karumeli byakokotse.

¹⁰None rero, Uhoraho avuze atya: Ngiye guhaguruka ubu nonaha, aka kanya ngiye kwemarara, ubu noneho ngiye gukuzwa.

¹¹Muzasama ibishogoshogo, mubyare ibyakatsi, umwuka wanyu ubabere umuriro ubatwika.

¹²Amahanga azatwikwa nk’amatanura y’ishwagara, azakongoke, boshye amahwa yatemwe agashyirwa mu muriro.

¹³Nimwumve ibyo nkoze, mwe abari kure; aba bugufi namwe, mumenye ko ndi umunyabubasha.

¹⁴Muri Siyoni, abanyabyaha bagize ubwoba, abahemu barahinda umushyitsi, bakabazanya bati «Ni nde muri twe uzahangara uwo muriro utwika? Ni nde muri twe uzahangara iryo tanura ritazima?»

¹⁵— Ni umuntu ukurikiza ubutabera, akavuga ukuri, ni umuntu wanga amahugu, akigizayo abamushukisha amaturo, akica amatwi ngo atumva amagambo y’ubwicanyi, agahumbya amaso kugira ngo atareba ikibi.

¹⁶Uwo ni we uzatura mu bushorishori, ibitare bikomeye bikazamubera ubwihisho, akazahabwa umugati, ntazabure n’amazi yo kunywa.

¹⁷[89]Amaso yawe azitegereza uburanga bw’Umwami[90], azarebe n’igihugu, mu bwisanzure bwacyo.

¹⁸Uzazirikana ibyajyaga bigutera ubwoba, uvuge uti «Mbese ari hehe, uwanyinjaga? Ari ahagana he, uwangenzuraga? Uwabaruraga imigi ikomeye yagannye he?»

¹⁹Ntuzongera kubona ukundi ihanga ry’abanyagasuzuguro[91], ihanga ry’imvugo itumvikana, imvugo y’amanjwe kandi idasobanutse.

²⁰Itegereze Siyoni, umurwa w’iminsi mikuru yacu, amaso yawe narebe Yeruzalemu, ahantu h’ituze, ihema ritazasenywa ukundi, n’imambo zaryo ntizishingurwe, imigozi yaryo ntiyongere gupfundurwa.

²¹Aho ni ho Uhoraho azatwerekera ikuzo rye, hakazaba akarere k’imigezi n’inzuzi ngari; ariko nta bwato bugashywa buzayanyuramo, nta n’amato manini azambuka ako karere.

²²Ni koko, Uhoraho ni we mucamanza wacu, ni we muyobozi wacu. Uhoraho ni we Mwami wacu, ni we gakiza kacu.

²³Imigozi yawe iradohotse, ntigifashe ku giti, bituma batagishobora ukundi kuzamura ibendera. Nuko bazagabane iminyago itagira ingano, ndetse n’abacumbagira bazayigireho umugabane.

²⁴Nta muturage uzongera kuvuga ati «Ndarwaye», imbaga yose ituye Yeruzalemu izababarirwa icyaha yakoze.