Read kinyarwanda Izayi 37 Bible Online

Izayi 37 - kinyarwanda bible

Izayi 37

¹Umwami Hezekiya amaze kubyumva ashishimura imyambaro ye, yambara ibigunira, hanyuma ajya mu Ngoro y’Uhoraho.

²Ubwo yohereza umutegeka w’ingoro Eliyakimu, umwanditsi Shebuna n’abakuru bo mu baherezabitambo, bose bari bambaye ibigunira, basanga umuhanuzi Izayi mwene Amosi,

³baramubwira bati «Hezekiya yadutumye ngo uyu munsi ni umunsi w’umubabaro, w’igihano n’ugushinyagurirwa. Abana bageze igihe cyo kuvuka, ariko ba nyina ntibafite imbaraga zo kubabyara!

⁴Uwazana ngo Uhoraho Imana yawe yumve amagambo yavuzwe n’umufasha w’ingando, ayatumwe n’umwami w’Abanyashuru, ngo atuke Imana nzima. Icyazana ngo Uhoraho Imana yawe abahanire ayo magambo yumvise! Ngaho takambira Uhoraho, usabira aka gasigisigi kagihumeka!»

⁵Abagaragu b’umwami Hezekiya basanga Izayi,

⁶arababwira ati «Ubutumwa muza kugeza kuri shobuja ni uko Uhoraho avuze ati ’Ntuterwe ubwoba n’amagambo wumvanye abagaragu b’umwami w’Ashuru, n’ibitutsi bantutse.

⁷Ngiye kumushyiramo undi mutima, yumve inkuru ituma asubira mu gihugu cye, maze nagerayo nzamwicishe inkota.’»

⁸Umufasha w’ingando aratahuka, amenye ko umwami w’Abanyashuru yavuye i Lakishi, amusanga i Libuna aho yarwaniraga.

⁹Koko rero, umwami w’Abanyashuru yari yumvise inkuru yerekeye Tiruhaka, umwami wa Kushi, ivuga ngo «Dore yakoranyije ingabo zo kukurwanya!» Umwami w’Abanyashuru yongera gutuma kuri Hezekiya, ngo bamubwire bati

¹⁰«Imana yawe wizera cyane ntizagushuke ngo ikwizeze, ikubwira ko Yeruzalemu itazafatwa n’umwami w’Abanyashuru.

¹¹Wowe ubwawe, wiyumviye uko abami b’Abanyashuru bagenjeje ibihugu byose, barabirimbuye; none se ni wowe uzarokoka ?

¹²Ubwo abasokuruza banjye barimburaga imigi ya Gozani, Harani, Resefu, na bene Edeni bari i Telasari, hari ubwo imana zabo zabakijije?

¹³Umwami w’i Hamati, uw’Arupadi, uw’i Layini, uw’i Sefaruwayimu, uw’i Hena n’uwa Hiwa ubu bari hehe?»

¹⁴Hezekiya yakira ibaruwa ayishyikirijwe n’intumwa, arayisoma, hanyuma arazamuka ajya mu Ngoro y’Uhoraho. Aramburira iyo baruwa imbere y’Uhoraho,

¹⁵maze asenga Uhoraho, agira ati

¹⁶«Uhoraho, Mugaba w’ingabo, Mana ya Israheli, wowe wicaye ku bakerubimu, ni wowe Mana wenyine y’abami bose bo ku isi, kuko ari wowe waremye ijuru n’isi.

¹⁷Uhoraho, tega amatwi maze wumve; rambura amaso maze witegereze, wumve amagambo ya Senakeribu wohereje abaza gutuka Imana nzima.

¹⁸Mu by’ukuri koko, Uhoraho, abami b’Abanyashuru barimbuye abanyamahanga n’ibihugu byabo,

¹⁹batwika imana zabo kuko zitari Imana y’ukuri, ahubwo ari amashusho yabajwe n’intoki z’abantu mu biti no mu mabuye, bituma Abanyashuru babirimbura.

²⁰None rero, wowe Uhoraho, Mana yacu, tugobotore mu nzara za Senakeribu, kugira ngo abami bose bo ku isi bamenye ko wowe, Uhoraho, ari wowe Mana wenyine!»

²¹Nuko Izayi mwene Amosi atuma kuri Hezekiya, agira ati «Uhoraho, Imana ya Israheli aravuze ngo ’Kubera isengesho wangejejeho ku byerekeye Senakeribu, umwami w’Abanyashuru,

²²dore icyo Uhoraho amutangajeho: Umwari, umukobwa w’i Siyoni aragusuzuguye, aragusetse; Umukobwa w’i Yeruzalemu akuzungurije umutwe ari inyuma yawe.

²³Ni nde watutse ukamwandagaza? Ni nde wavugishije umurebana agasuzuguro? Ni Nyir’ubutagatifu wa Israheli!

²⁴Watutse Uhoraho ukoresheje abagaragu bawe, uvuga uti ’Mfashijwe n’amagare yanjye y’intambara atagira ingano, narazamutse ngera mu mpinga z’imisozi, mu mirenge itavogerwa yo hagati ya Libani, ntemayo amashami y’amasederi, n’imizonobari miremire cyane, ngera mu mpinga y’imisozi, no mu mashyamba ahatwikiriye.

²⁵Mu mahanga nahafukuye amariba, nywa amazi y’aho ; nkamya inzuzi zose zo mu Misiri, nzikandagijemo ibirenge byanjye.

²⁶Rwose ntuzi ko uwo mugambi nari nywufite kuva kera kose, ko kuva kera na kare nari narawuteganyije, none nkaba ngiye kuwuzuza ? Icyo wowe ushoboye, ni uguhindura amatongo iyo migi ikomeye.

²⁷Abaturage b’aho bafite intege nke, bakutse umutima, bashobewe ; bameze nk’icyatsi cyo mu mirima, nk’akanyatsi ko mu busitani. Bameze nk’utwatsi tumera hejuru y’inzu, cyangwa se nk’ingano zirwaye zikiri nto.

²⁸Wowe ariko, waba wicaye, usohotse cyangwa winjiye, mba mbizi.

²⁹Ubwo rero wanyiteyeho hejuru, agasuzuguro kawe kakangeraho; amazuru yawe nzayafungisha icyuma, maze ngushyire umurunga mu kanwa, nzagutere gusubira iwawe, ngucishije mu nzira wanyuzemo uza.’»

³⁰(Nuko Izayi arongera abwira Hezekiya ati) «Naho wowe, dore ikizakubera ikimenyetso: muri uyu mwaka muzarya ibyasigaye mu bibuba, umwaka ukurikiyeho murye ibyimejeje ubwabyo, ariko mu wa gatatu muzabiba, musarure, kandi muzatera imizabibu, murye imbuto zayo.

³¹Abasigaye batishwe bo mu nzu ya Yuda, bazarokoka nk’igiti gishora imizi mu butaka, kikera imbuto mu mashami yacyo,

³²kuko i Yeruzalemu hazaduka agasigisigi, no ku musozi wa Siyoni hahinguke abazaba bacitse ku icumu. Ibyo bizaba bikozwe n’urukundo rukomeye rw’Uhoraho, umugaba w’ingabo.»

³³Dore ibyo Uhoraho avugiye ku mwami w’Abanyashuru: Ntazinjira muri uyu murwa, ntazaharasa imyambi, ntazanategeka abitwaje ingabo kuwuhangara, n’imbere y’inkike zawo ntazaharunda igitaka.

³⁴Inzira yanyuze aza, ni yo izamusubizayo, ntazagera muri uyu murwa, uwo ni Uhoraho ubivuze.

³⁵Nzarinda uyu murwa nywukize, mbigiriye jye ubwanjye, n’umugaragu wanjye Dawudi.

³⁶Mu ijoro rikurikiyeho, Malayika w’Uhoraho araza yambukiranya ingando y’Abanyashuru, yicamo abantu ibihumbi ijana na mirongo inani na batanu. Mu gitondo bose bari babaye imirambo!

³⁷Senakeribu, umwami w’Abanyashuru, arataha asubira mu murwa we i Ninivi, agumayo.

³⁸Umunsi umwe ari mu ngoro y’ikigirwamana cye Nisiroki asenga, abahungu be Adaramaleki na Saraseri baraza bamwicisha inkota, maze bahungira mu gihugu cya Ararati. Umuhungu we Esarihadoni amuzungura ku ngoma.