Read kinyarwanda Izayi 44 Bible Online

Izayi 44 - kinyarwanda bible

Izayi 44

¹Ariko noneho, tega amatwi, Yakobo, mugaragu wanjye, Israheli, nihitiyemo.

²Avuze atya Uhoraho wakuremye, uwaguhanze kuva ukiri mu nda ya nyoko, kandi n’ubu akaba akigufasha: Witinya, Yakobo, mugaragu wanjye, uwo nishumbushije kandi nihitiyemo,

³kuko uwishwe n’inyota nzamuha amazi, uwumiranye mubere isoko idudubiza ; nzasendereza umwuka wanjye mu rubyaro rwawe, n’umugisha wanjye ku nkomoko yawe.

⁴Bazakura nk’ibyatsi mu gihe cy’imvura, cyangwa nk’urufunzo ku nkombe z’imigezi.

⁵Umwe azavuga ati «Neguriwe Uhoraho», undi azitwe izina rya Yakobo, undi na we yandike ku kiganza cye, ati «Ndi uw’Uhoraho», kandi yihimbe izina rya Israheli.

⁶Avuze atya Uhoraho, Umwami wa Israheli, uwayicunguye, Uhoraho, Umugaba w’ingabo: Ni jye ntangiriro, nkaba n’iherezo, nta yindi mana ibaho, itari jye.

⁷Ni nde uhwanye nanjye? Ngaho nafate ijambo, avuge uko biri, kandi anabinsobanurire! Ibyabaye kuva kera nabivuge uko biteye, ahereye ubwo nshyizeho imbaga nyamwinshi, n’ibigomba kuzaza na byo abibarondorere!

⁸Mwihinda umushyitsi, kandi mwitinya! Narabibabwiye, mbibamenyesha kuva kera! Si mwebwe se bagabo bo kubihamya? Hari indi mana yindi ibaho, itari jye? Kandi nta rundi Rutare rubaho, naba ntazi!

⁹[115] Abakora ibigirwamana bose, nta cyo bari cyo, ibyo bashushanya na byo nta cyo bimaze ; ababiramya na bo ntibagira icyo babona cyangwa ngo bumve, bigatuma bakorwa n’isoni.

¹⁰Ni nde wigeze kubumba ikigirwamana, agashongesha ishusho ryacyo nta nyungu akuramo?

¹¹Ababiyobotse bose bazakorwa n’ikimwaro, kuko ababikora ari abantu gusa. Nibiyegeranye, maze biyerekane : bose icyarimwe bazahinda umushyitsi, kandi bakorwe n’isoni !

¹²Umucuzi w’icyuma abanza kugikata, akagishyira mu makara yaka, akagicurisha inyundo, akoresheje ingufu z’ukuboko kwe. Ariko se iyo ashonje bigenda bite ? Agwa isari. Naho se iyo atanyoye amazi? Agwa agacuho.

¹³Umubaji w’amashusho y’ibiti akoresha umugozi, agashushanya icyo ashaka, akagikatisha imakasi. Ariko nanone, akoresha icyuma cyabigenewe, akagiha imisusire nk’iy’umuntu, n’ubwiza bw’uruhanga rw’umuntu, kugira ngo agishyire mu ngoro.

¹⁴Yihitiramo isederi kugira ngo ayiteme, afata gereveriya cyangwa umushishi yari yararetse ngo bikure mu bindi biti by’ishyamba, cyangwa se agafata pinusi yari yarateye, maze igakuzwa n’imvura.

¹⁵Ubusanzwe izo ni inkwi zo gucana; uwo muntu na we azifataho maze akazicana, akisusurutsa, akazitekesha umugati. Nyuma y’ibyo, ibisigaye akabikoramo ikigirwamana akagipfukamira, agakuramo ishusho, akaryunamira.

¹⁶Igice kimwe cy’igiti agicanisha umuriro, akawugerekaho inyama zo kwirira; akarya, agahaga; agasusuruka maze akavuga ati «Yayaaaa, noneho nshize imbeho! Mbega ukuntu ari byiza kureba umuriro!»

¹⁷Mu giti gisigaye, agakoramo imana ye, ikigirwamana yunamira, akanagipfukamira, akagisenga, agira ati «Ngoboka, kuko ari wowe mana yanjye!»

¹⁸Bene abo bantu nta kenge na mba, ntibazi gusesengura ibintu, kuko amaso yahumye, ku buryo batabona na busa, imitima yabo na yo iranangiye nta cyo yumva.

¹⁹Nta n’umwe ugarura umutima, ngo yumve, anasesengure ku buryo yagira ati «Igice kimwe nakimariye mu muriro, nteka umugati ku makara, notsa inyama maze ndazirya; none igisigaye singiye kugikoramo ishyano, ngo nuname imbere y’ingeri y’igiti !»

²⁰Ahubwo yiziritse ku ivu, umutima we wacuramye uramuyobya, nta bwo azigera agobotorwa! Ntanarushya yibaza ati «Aho iki mfite mu ntoki si amanjwe ?»

²¹Yakobo we, ibuka ibi ngibi, Israheli, uri umugaragu wanjye, narakwihangiye ngo umbere umugaragu, wowe Israheli, sinzakwibagirwa.

²²Nahanaguye ubugome bwawe nk’igicu, ibyaha byawe mbimaraho nk’igihu ; ngarukira kuko nakwicunguriye.

²³Ijuru nirisabwe n’ibyishimo, kuko Uhoraho yakoze, ikuzimu mu nsi y’isi nihirangire, imisozi ndetse n’ishyamba kumwe n’ibiti byaryo byose nibitere urwamo rw’ibyishimo, kuko Uhoraho yacunguye Yakobo, akagaragaza ikuzo rye muri Israheli.

²⁴Avuze atya Uhoraho, umurokozi wawe, uwakwihangiye kuva ukiri mu nda ya nyoko : Ni jye Uhoraho, uwahanze ibintu byose! Naguye ijuru, jyewe jyenyine, ndambura isi nta n’umwe twari kumwe.

²⁵Noneho rero, ibinyoma by’abacunnyi mbihinduye ubusa, abapfumu mbateye kuvugishwa, abahanga mbashubije inyuma, n’ubuhanga bwabo mbuhinduye amanjwe.

²⁶Mpaye agaciro gakomeye ijambo ry’umugaragu wanjye, umugambi w’intumwa zanjye nywuzuze. Ku byerekeye Yeruzalemu ndavuze nti «Niturwe», n’imigi ya Yuda nti «Niyongere yubakwe, ibyasenyutse nzabisana.»

²⁷Mbwiye inyanja nti «Kama, imigezi yawe ngiye kuyumutsa!»

²⁸Kuri Sirusi[116] ndavuze nti «Ni umushumba wanjye.» Ibinshimisha byose, azabigeraho, atangaze kuri Yeruzalemu, ati «Niyongere yubakwe», naho ku Ngoro ati «Niyubakwe bundi bushya!»