Read kinyarwanda Izayi 46 Bible Online

Izayi 46 - kinyarwanda bible

Izayi 46

¹Beli irasukuma, ngiyo na Nebo[118] igiye kurunduka! Ibishushanyo byazo bihekeshejwe amatungo. Imitwaro iremereye mwajyaga mwikorera ngiyo ihetswe n’amatungo yananiwe.

²Arasukuma ndetse agiye gutemba, ntagishoboye no kuramira imitwaro yikoreye, na yo ubwayo ajyanywe bunyago.

³Nzu ya Yakobo, nimuntege amatwi, abarokotse mwese bo mu muryango wa Israheli, mwebwe nitayeho mukiri mu nda, nkabaheka mukivuka.

⁴Nzakomeza kubagenzereza ntyo kugeza mu busaza bwanyu, mbashyigikire kugeza ubwo muzamera imvi. Ni jye ubatabara, nkanabaterura, ni jye uzabavunikira kandi nkanabarengera.

⁵Mbese ubu mwandeshyeshya na nde, mukaba mwanyitiranya na we ? Ni nde mwangereranya na we, mukaba mwavuga ko dusa ?

⁶Bamwe bapfusha ubusa zahabu yabo, bagapima feza ku munzani, bagahemba umucuzi ngo abakorere ikigirwamana, nuko bakacyunamira, bakanagipfukamira.

⁷Ni bo bagishyira ku ntugu bakagiheka ; bakakigeza aho kiruhukira. Kiguma aho ubutanyeganyega ntikive mu mwanya wacyo, ugitakambiye ntikimusubize, cyangwa ngo kimukize umubabaro we.

⁸Nimwibuke ibyo kugira ngo murusheho kwibaza, nimwisubireho, mwa bahemu mwe;

⁹mwibuke ibyababayeho mbere, igihe cya kera : Koko ni jye Mana, nta yindi ibaho, ndi Imana, ibindi byose ni amanjwe ubigereranyije nanjye.

¹⁰Kuva mu ntangiriro, natangaje uko bizakurikirana, mu bihe byahise navuze ibitari byakorwa. Nuko ndavuga nti «Umugambi wanjye uzahoraho, n’ikinshimisha cyose nzagikora.»

¹¹Nzahamagaza iburasirazuba igisiga kiryana[119], n’uwo nageneye kurangiza umugambi wanjye, muhamagaze mu gihugu cya kure, narawutangiye kandi nzawusohoza, narabyiyemeje, nkazabikora.

¹²Nimutege amatwi mwe, ab’imitima inangiye, kandi mukagendera kure ubutabera:

¹³Ubutabera bwanjye ngubu buri hafi, buregereje, n’umukiro wanjye ntugitinze ; nzashyira muri Siyoni umukiro wanjye, Israheli nyihe ubwiza bw’ikuzo ryanjye.