Read kinyarwanda Izayi 50 Bible Online

Izayi 50 - kinyarwanda bible

Izayi 50

¹Uhoraho avuze atya: Ruri hehe urwandiko rw’ubusende, ruhamya ko nirukanye nyoko? Cyangwa se, ni nde mbereyemo umwenda, nkaba naramubahayeho ubwishyu? Nuko rero, mwagurishijwe ku mpamvu y’ibyaha byanyu, na nyoko asendwa kubera imyivumbagatanyo yanyu.

²Bishoboka bite! Naraje sinagira n’umwe mbona! Mpamagaye, ntihagira unyitaba? Mbese, ukuboko kwanjye kwaba ari kugufi cyane, ku buryo kutabasha kubakiza? Ni ukuvuga se ko ntabona imbaraga zo kubacungura? Dore ngiye gukamya inyanja n’igitero cyanjye, imigezi na yo nyihindure ubutayu, amafi yicwe n’icyorezo kuko yabuze amazi.

³Ijuru nzaryambika ibyirabura, maze ndyorose ibigunira.

⁴[128]Nyagasani Uhoraho yampaye ururimi, ambwira icyo mvuga kugira ngo menye kuramira uwarushye. Buri gitondo arankangura, akanyigisha gutega amatwi nk’abigishwa.

⁵Nyagasani Uhoraho yanzibuye amatwi, nanjye sinabyangira, ndetse sinatezuka.

⁶Nategeye umugongo abankubitaga, imisaya yanjye nyitegeza abamfuraga ubwanwa; uruhanga rwanjye sinaruhisha abantukaga, bancira mu maso.

⁷Cyakora Nyagasani Uhoraho arantabara, agatuma ibitutsi bitanca intege. Uruhanga rwanjye ndarukomeza nk’ibuye, kandi nzi ko ntazakorwa n’ikimwaro.

⁸None se ko undenganura ari hafi, ni nde watinyuka kumburanya ? Naze tujyane imbere y’umucamanza! Ni nde uzanshinja mu rubanza ? Ngaho niyigaragaze, maze anyegere!

⁹Ni byo rwose, Nyagasani Uhoraho arantabara; ni nde rero wanshinja icyaha ? Koko abo bose bazasaza nk’umwambaro, maze bazaribwe n’inzukira.

¹⁰Mbese muri mwe haba hari utinya Uhoraho, agatega amatwi ijwi ry’umugaragu we, none akaba agenda mu mwijima, ntagire urumuri na busa abona ? Uwo nguwo niyiringire izina ry’Uhoraho, yishingikirize Imana ye.

¹¹Naho mwebwe abacana umuriro, mukitwaza imyambi igurumana, nimujye mu gishyito cy’umuriro wanyu, rwagati mu nkongi y’umuriro mwicaniye. Kuko ibyo muzabigirirwa n’ikiganza cyanjye, mukazapfana umubabaro.