Read kinyarwanda Izayi 51 Bible Online

Izayi 51 - kinyarwanda bible

Izayi 51

¹[129] Nimunyumve, mwe abaharanira ubutabera, mwe mushakashaka Uhoraho. Nimwitegereze urutare mwabajwemo, mutekereze inganzo mwacukuwemo.

²Nimwitegereze so, Abrahamu, na Sara wababyaye. Koko, yari wenyine igihe muhamagaye, nyamara namuhaye umugisha, ngwiza urubyaro rwe.

³Ni koko, Uhoraho ahumurije Siyoni, agiriye impuhwe amatongo yayo yose; ubutayu bw’aho, abuhinduye nka Edeni, amayaga y’aho, ayagira ubusitani bw’Uhoraho. Bazahasanga ibyishimo n’umunezero, indirimbo n’imbyino zo gushimira.

⁴Nimunyumve neza, muryango wanjye, namwe ab’Umurwa wanjye, muntege amatwi: kuko amategeko ari jye aturukaho, imanza zanjye zikaba urumuri rw’amahanga.

⁵Ubutabera bwanjye buregereje, agakiza kanjye kasesekaye, ukuboko kwanjye kugiye gucira amahanga imanza. Ibirwa bizangirira icyizere, bitegereze ububasha bw’ukuboko kwanjye.

⁶Nimwubure amaso murebe ejuru, hanyuma mwuname murebe hasi ku butaka: koko, ijuru rizayoka nk’umwotsi, naho isi isaze nk’umwambaro, abayituye bapfe nk’udukoko. Ariko agakiza kanjye kazabaho iteka ryose, ubutabera bwanjye ntibuzashira.

⁷Nimuntege amatwi, mwe abazi ubutabera, muryango w’abashyinguye amategeko yanjye mu mutima: mwitinya amenyo y’abasetsi, cyangwa ngo ibitutsi byabo bibakangaranye,

⁸kuko bazaribwa n’inzukira boshye umwambaro, umuswa ukabamunga nk’ubwoya bw’intama. Nyamara ubutabera bwanjye n’agakiza kanjye bizabaho iteka ryose, uko ibihe bigenda bisimburana.

⁹Haguruka, haguruka! Wambare ububasha, Uhoraho Munyamaboko! Haguruka nko ku minsi y’ibihe byahise, nko mu bisekuruza bya kera. Si wowe se watemaguye Rahabu[130], ugahinguranya icyo kiyoka?

¹⁰Si wowe se wakamije inyanja, n’amazi yayo magari, ugahanga inzira mu nsi yayo, kugira ngo abarokotse batambuke?

¹¹Abarokotse b’Uhoraho bazagaruka, binjire muri Siyoni baririmba, ibyishimo bidashira bizahora biranga uruhanga rwabo, basabwe n’ibyishimo n’umunezero, kuko amarira n’amaganya bizaba byarangiye.

¹²Ni jyewe, ni jye ubwanjye ubahumuriza: ni iki cyatuma utinya uwagenewe gupfa, mwene muntu, umeze nk’icyatsi?

¹³Waba se waribagiwe Uhoraho waguhanze, akarambura ikirere, agahanga n’isi? Ni iki gituma uhinda umushyitsi umunsi wose ubudatuza, imbere y’uburakari bw’ugutegekesha igitugu, nk’aho afite ububasha bwo kukurimbura ? Uburakari bw’umugome se bushingiye he ?

¹⁴Ni akanya gato uwari yarapfukiranywe, akishyira akizana, ntazapfa cyangwa ngo ajye mu nyenga y’ikuzimu, ntazigera abura umugati wo kurya.

¹⁵Ni jye, Uhoraho Imana yawe, usimbagiza inyanja, imivumba ikoroma, izina ryanjye rikaba: Uhoraho, Umugaba w’ingabo.

¹⁶Nashyize amagambo yanjye mu munwa wawe, nkugamisha mu gicucu cy’ukuboko kwanjye, igihe nashyiragaho ijuru, ngahanga n’isi, ari bwo nabwiraga Siyoni nti «Ni wowe muryango wanjye.»

¹⁷Zanzamuka, zanzamuka, uhaguruke Yeruzalemu ! Wowe Uhoraho yasomeje ku nkongoro y’uburakari bwe ; igikombe cy’ibisindisha, urakinywa, urakiranguza.

¹⁸Mu bahungu wabyaye, nta n’umwe waguhembuye, mu bo wareze ukabakuza, nta n’umwe wagusindagije.

¹⁹Ibyago bibiri kandi bisa birakugarije: isenywa n’ukurimburwa, inzara n’intambara. Ni nde uzakuririra? Ni nde uzaguhumuriza ?

²⁰Abahungu bawe ngabo bararambaraye, barasambagurika ku mayira yose, boshye impongo zafashwe mu mutego, bazira uburakari bw’Uhoraho, n’igihano cy’Imana yawe.

²¹Ubu rero, tega amatwi ibi ngibi, wa nsuzugurwa we y’umusinzi, ariko utabitewe na divayi !

²²Avuze atya Umutegetsi wawe, Uhoraho Imana yawe, we wemera kujya impaka z’umuryango we : Dore nakuye mu biganza byawe igikombe cy’ibisindisha, inkongoro y’uburakari bwanjye, guhera ubu ntuzongera kuyisomaho ukundi.

²³Nzayishyira mu biganza by’abakubuza uburyo, abakubwiraga bati «Rambarara, tubone uko dutambuka», nuko ukabategera umugongo nk’aho uri ubutaka, cyangwa umuhanda waharuriwe abagenzi.