Read kinyarwanda Izayi 56 Bible Online

Izayi 56 - kinyarwanda bible

Izayi 56

¹[138] Uhoraho avuze atya: Nimuharanire ubutungane, mukurikize ubutabera, kuko umukiro wanjye wegereje, n’ubuntu bwanjye bugiye kwigaragaza.

²Arahirwa umuntu ubigenza atyo, mwene muntu ubikomeraho, akubahiriza isabato, ntayice, akirinda gukora ikibi icyo ari cyo cyose.

³Umunyamahanga[139] wiziritse kuri Uhoraho ntakibwire ngo «Nta kabuza, Uhoraho azantandukanya n’umuryango we», cyangwa se inkone ivuge iti «Dore jye nsanzwe ndi igiti cyumye.»

⁴Kuko Uhoraho avuze atya: Abagabo b’inkone bubahiriza isabato yanjye, bagahitamo gukora ibinshimisha, kandi bagakomera ku Isezerano ryanjye,

⁵nzabazigamira mu Ngoro yanjye i Yeruzalemu inkingi iriho izina ryabo; ibyo bizababere byiza kuruta abahungu n’abakobwa. Nzabaha izina rizahoraho ubutazasibangana.

⁶Naho abanyamahanga bizirika kuri Uhoraho, bakamuyoboka bakunze izina rye kandi bakamubera abagaragu, abo bose bubahiriza isabato, ntibayice, bagakomera ku Isezerano ryanjye,

⁷nzabazana ku musozi wanjye mutagatifu, nzatuma bishimira mu Ngoro yanjye bansengeramo. Ibitambo byabo bitwikwa n’andi maturo, bizakirwa ku rutambiro rwanjye, kuko Ingoro yanjye izitwa «Ingoro yo gusengerwamo n’amahanga yose.»

⁸Uwo ni Uhoraho ubivuze, we utarurukanya abajyanywe bunyago ba Israheli. Uretse n’abo nzaba narakoranyije, nzongera mbakoranyirizeho n’abandi.

⁹Nyamaswa zose zo mu gasozi, nimuze mwirishirize, ndetse namwe mwese, nyamaswa z’ishyamba!

¹⁰Abarinzi ba Israheli ni impumyi, bose uko bakabaye nta cyo bazi; ni nk’imbwa z’ibiragi, zidashobora kumoka, bararotagizwa, bakaryamira, bagahora bahunyiza;

¹¹ariko kandi ni n’imbwa z’ibisambo: ntibazi kuvuga ngo «Turahaze», ngabo abitwa abashumba! Nta cyo biyumvira na mba, buri wese atomera ukwe; buri wese yishakira inyungu ye gusa.

¹²Baravuga bati «Nimuze, tujye gushaka divayi, tunywe ku kayoga gakaze, n’ejo bizagende bityo, ibinyobwa ntibibuze.»