Read kinyarwanda Izayi 62 Bible Online

Izayi 62 - kinyarwanda bible

Izayi 62

¹[150] Sinzigera ntererana Siyoni, sinzareka guhihibikanira Yeruzalemu, kugeza ubwo ubutungane bwayo butangaje nk’icyezezi, n’umukiro wayo ukakirana nk’urumuri.

²Bityo, amahanga azabone ubutungane bwawe, abami bose babone ikuzo ryawe. Nuko bazakwite izina rishya, rizatangazwa n’Uhoraho.

³Uzamera nk’ikamba ribengerana mu kiganza cy’Uhoraho, nk’igisingo mu ntoki z’Imana yawe.

⁴Ntibazongera kukwita «Nyirantabwa», n’igihugu cyawe ngo cyitwe «Itongo», ahubwo uzitwa «Inkundwakazi», n’igihugu cyawe cyitwe «Umugeni», kuko Uhoraho azaba agukunze, igihugu cyawe akibengutse.

⁵Uko umusore ashaka umugeni w’isugi, ni ko Uwaguhanze azakubenguka; kandi nk’uko umukwe yishimira umugeni we, Imana yawe ni ko izakwishimira.

⁶Ku nkike zawe, Yeruzalemu, nahashyize abarinzi; amanywa n’ijoro ntibazigera baceceka na rimwe. «Mwebwe, abibutsa Uhoraho ibya Yeruzalemu, ntimukaruhuke!

⁷Ntimukamuhwemere kugeza ubwo azaba yasubiranyije Yeruzalemu, akayigira ’Ikuzo ry’isi’.»

⁸Uhoraho yarahije indyo ye, ukuboko kwe k’ububasha, ati «Sinzongera gutanga ingano zawe nzigaburira abanzi bawe, abanyamahanga ntibazongera kukunywera divayi waruhiye.

⁹Ariko rero, abasaruzi b’ingano bazaziryaho, maze basingize Uhoraho; ababengera divayi na bo bazayinywaho, bari mu bikari by’Ingoro yanjye.»

¹⁰Nimusohoke! Nimusohoke munyure mu marembo, nimwagure inzira y’umuryango wanjye. Nimuringanize, mutegamishe umuhanda, muvanemo amabuye, muzamure ibendera imbere y’amahanga.

¹¹Dore ibyo Uhoraho atangaza kugera ku mpera z’isi: Nimubwire umukobwa wa Siyoni, muti «Dore Umukiza wawe araje, azanye iminyago, abo yatabaye bamubanje imbere.

¹²Bazabita ’Umuryango mutagatifu’, ’Abacunguwe n’Uhoraho’. Naho wowe bazakwite ’Agahebuzo’, ’Umugi utaratereranywe’.»