Read kinyarwanda Izayi 63 Bible Online

Izayi 63 - kinyarwanda bible

Izayi 63

¹[151] Uwo se yaba ari nde, uturutse Edomu, uhagurutse i Bosira yambaye iby’imihemba? Ntagira uko asa mu myambaro ye myiza, aragenda yemye n’imbaraga ze nyinshi. — Ni jyewe uvugana ubutabera, nkibasira amahanga ngo nkize umuryango wanjye.

²— Uwo mutuku[152] ku myambaro yawe ni uw’iki, ni kuki wambaye nk’abenga imizabibu?

³— Umuvure nawiyengesheje jyenyine, nta n’umwe twari kumwe wo mu muryango wanjye. Nuko mu burakari bwanjye, ndabahonyora, mu mujinya wanjye, ndabaribata, umutobe wabo utarukira ku myambaro yanjye, ibyo nambaye byose birahindana.

⁴Kuko mu mutima wanjye wari umunsi wo kwihorera, none umwaka w’ubucungurwe na wo ukaba utashye.

⁵Nararebye hirya no hino: mbura untabara, nguma aho numiwe: sinabona unkomeza! Nuko ukuboko kwanjye kurangoboka, n’uburakari bwanjye burankomeza.

⁶Mu burakari bwanjye najanjaguye amahanga, mu mujinya wanjye ndabasindisha, amaraso yabo nyasesa hasi.

⁷Nzajya nibuka ibyiza by’Uhoraho n’ibisingizo bimurata, kubera ibyiza byose yadukoreye. Nzogeza ubuntu Uhoraho yagiriye inzu ya Israheli, n’ibyo yabakoreye byose, kubera impuhwe ze.

⁸Yaravuze ati «Koko ni umuryango wanjye, abana batazantenguha!» maze yemera kubabera Umukiza,

⁹mu mibabaro yabo yose. Nta bwo ari umuhagarariye cyangwa intumwa ye, ni we ubwe bwite wabakijije; mu rukundo rwe no mu mpuhwe ze, ni we ubwe wabacunguye. Yarabahagurukije, arabaterura muri iyo iminsi yose ya kera.

¹⁰Ariko bo barijujuse, bababaza umwuka we mutagatifu, ni bwo rero abateye umugongo, maze we ubwe abarwanya nk’umwanzi.

¹¹Nuko bibuka ibyabaye kera mu gihe cya Musa: «Ari hehe uwarohoye mu mazi umushumba w’umuryango we? Yahereye he, uwabashyiragamo umwuka we mutagatifu?

¹²Ari he Nyir’ukuboko kurabagirana, wagendaga iburyo bwa Musa, uwatandukanyije amazi imbere yabo, kugira ngo yiheshe ikuzo?

¹³Ari he uwabanyujije rwagati mu nyanja, boshye ifarasi yiruka mu butayu?

¹⁴Bari bameze nk’amatungo akinagira mu kibaya, Umwuka w’Uhoraho ubageza aho baruhukira.» Nguko uko wayoboye umuryango wawe, kugira ngo wiheshe izina ry’icyubahiro.

¹⁵Itegereze maze urebe, uhereye mu ijuru, no ku Ngoro yawe ntagatifu kandi ibengerana ikuzo. Umwete wawe, n’ubutwari bwawe, kimwe na za mpuhwe zawe byahereye he? Waba se warisubiyeho, ukareka kunkunda?

¹⁶Nyamara ariko, ni wowe Data! Kuko Abrahamu atatumenye, Israheli na we akaba atatuzi; Uhoraho, ni wowe Data n’Umucunguzi wacu. Ng’iryo izina ryawe, kuva kera kose.

¹⁷Uhoraho, kuki ureka duteshuka inzira zawe, tukanangira imitima yacu, kugeza n’aho tutakikubaha? Tugarukire, turi abagaragu bawe, turi n’imiryango y’umunani wawe.

¹⁸Umuryango wawe mutagatifu ntiwaregamye mu murage wawo, ntibyatinze abanzi bacu banyukanyutse Ingoro yawe.

¹⁹Dore igihe kibaye kirekire utakidutegeka, nk’aho tutacyitirirwa izina ryawe. None iyaba wari ukinguye ijuru, ngo umanuke[153], imisozi yose yarindimukira imbere yawe.