Read kinyarwanda Izayi 64 Bible Online

Izayi 64 - kinyarwanda bible

Izayi 64

¹Waza nk’umuriro utwika, amazi akatura, ukamenyesha izina ryawe mu bagutambamira; amahanga yose yahinda umushyitsi imbere yawe,

²kubera ibintu biteye ubwoba waba ukoze tutabyiteguye.

³Nta na rimwe bigeze babyumva, nta na rimwe bigeze babibwirwa, nta n’ijisho ryigeze ribona indi mana ikora ityo, ngo irengere uwayizeye, uretse wowe.

⁴Usanganira abishimira gukurikira ubutabera, bakwibuka, bagakurikira inzira zawe: None waraturakariye, kuko twagucumuyeho, ariko kandi tuzakizwa n’uko tugarutse mu nzira zawe.

⁵Twese twari nk’abahumanye, n’ibikorwa byacu by’ubutabera bimeze nk’umwenda urimo imyanda; twese twararabiranaga nk’amababi yahungutse, ibicumuro byacu bikatugurukana nk’umuyaga.

⁶Nta n’umwe wari ukiyambaza izina ryawe, ngo yisubireho maze akwizirikeho, kuko wari wadukuyeho amaso, ukatugabiza ibicumuro byacu.

⁷Nyamara kandi Uhoraho, ni wowe Mubyeyi, turi ibumba ribumbwa na we, twese turi igikorwa cy’ibiganza byawe.

⁸Uhoraho, wirakara birenze urugero, ntukomeze kwibuka ibibi twakoze, ahubwo utwitegereze, twese turi umuryango wawe.

⁹Imigi yawe mitagatifu yabaye amatongo, Siyoni na yo ihinduka ubutayu, Yeruzalemu iribagirana.

¹⁰Ingoro yacu ntagatifu kandi itagira uko isa, aho abasekuruza bacu baririmbiraga ibisingizo byawe, yahindutse umuyonga, n’ibyo twakundaga byose byarangiritse.

¹¹Uhoraho, ushobora se kwihanganira ibyo byose? Wakomeza se kwicecekera, ukadukoza isoni bene ako kageni?