Read kinyarwanda Izayi 65 Bible Online

Izayi 65 - kinyarwanda bible

Izayi 65

¹[154] Abatangishaga inama, nararetse baransanga, abatanshakaga, ndabareka barambona, ndavuga nti «Ndi hano, ndi hano», mbwira ihanga ritiyambazaga izina ryanjye.

²Buri munsi nahoraga ndamburiye ibiganza byanjye ku muryango wararutse, ku bantu badakurikira inzira iboneye, bakihambira ku bitekerezo byabo bwite.

³Ni umuryango uhora unsuzugura ku mugaragaro, baturira ibitambo mu busitani bwabo, bagatwikira ububani ku ntambiro z’amatafari;

⁴bibera mu marimbi, bakarara amajoro mu buvumo, barya inyama z’ingurube, bagashyira ku mbehe zabo ibyahumanye!

⁵Nuko bakavuga bati «Igirayo, ntunyegere, kuko wakurizaho gupfa!» Abo ni bo banyuka umwotsi mu mazuru, n’umuriro wabo ugurumana, ukiriza umunsi.

⁶Baritonde, kuko ibyo byose byanditse imbere yanjye, nkaba ndateze guceceka, kugeza ubwo nzaba nabituye, kandi nzabitura ibicumuro byabo, kimwe n’iby’abasekuruza babo,

⁷ku buryo bibagera ku mutima — Uwo ni Uhoraho ubivuze. Abatwikiraga imibavu mu mpinga z’imisozi, bakantuka bahagaze ku tununga, nzabitura nkurikije iyo myifatire yabo, ku buryo bibagera ku mutima.

⁸Uhoraho uvuze atya: Nk’uko bigenda, iyo basanze iseri rihishije ry’umuzabibu, baravuga bati «Ntimuryonone, kuko ririmo umugisha», nanjye ni ko nzagenzereza abagaragu banjye, kugira ngo ntabatsembera icyarimwe.

⁹Nzaha inzu ya Yakobo urubyaro, muri Yuda havuke ingenerwamurage y’imisozi yanjye, intore zanjye zizayitunge, abagaragu banjye bayitureho.

¹⁰Sharoni izaba urwuri rw’amatungo magufi, ikibaya cya Akori kibe ibuga ry’amatungo maremare, kubera ko umuryango wanjye uzaza unshakashaka.

¹¹Ariko mwebwe, abimuye Uhoraho, mukibagirwa umusozi wanjye mutagatifu, mugategurira Gadi[155] ameza, mugasukira Meni inkongoro yuzuye divayi y’imvange,

¹²nzabagenera kwicishwa inkota: mwese muzapfukame, kugira ngo mwicwe. Kuko nabahamagaye, ntimunyitabe; nabavugisha, ntimunyumve. Mwakoreye ikibi mu maso yanjye, kandi muhitamo ibitanshimisha.

¹³Ni yo mpamvu Uhoraho Imana avuze atya: abagaragu banjye bazarya, naho mwebwe mwicwe n’inzara; abagaragu banjye bazanywa, naho mwebwe mwicwe n’inyota; abagaragu banjye bazanezerwa, naho mwebwe mukorwe n’ikimwaro;

¹⁴abagaragu banjye bazavuza impundu umutima wabo, wuzure ibinezaneza; naho mwebwe muvuze induru, umutima usobetse amaganya, munaboroge mufite umutima ushavuye!

¹⁵Intore zanjye zizibuka izina ryanyu zirivume, zigira ziti «Urakicwa n’Imana ihoraho!» Ariko abagaragu banjye bazahabwa irindi zina,

¹⁶maze uzashaka kwiha umugisha ku isi, azawiheshe «Imana y’ukuri», n’uwo ku isi uzashaka kugira indahiro, azarahirishe «Imana y’ukuri», kuko imibabaro ya kera izaba yaribagiranye, ikazaba itakibarwa mu maso yanjye.

¹⁷[156]Dore ngiye kurema ijuru rishya n’isi nshya; bityo, ibya kera byoye kuzibukwa ukundi, kugeza ubwo bitagitekerezwa.

¹⁸Ahubwo ibyo ngiye kurema ni ibyishimo n’umunezero bizahoraho, kuko umunezero nzarema ari Yeruzalemu, ibyishimo bikaba abaturage bayo.

¹⁹Koko nzanezerwa kubera Yeruzalemu, nsagwe n’ibyishimo kubera umuryango wanjye. Ntihazongera kumvikana amarira n’imiborogo.

²⁰Ntihazongera gupfa uruhinja rw’iminsi mike, cyangwa se umusaza utagejeje ku gihe cye; kuko uzapfa ari muto, azaba amaze nibura imyaka ijana, utazagera ku myaka ijana azaba yaravumwe.

²¹Bazubaka amazu bayaturemo, bahinge imizabibu barye imbuto zayo;

²²ntibazongera kubaka ngo itahwe n’undi, ngo nibahinga, biribwe n’utabihinze, kuko umuryango wanjye uzaramba nk’igiti, intore zanjye zizanezwa n’ibyavuye mu maboko yazo.

²³Ntibazongera kuvunikira ubusa, ntibazabyarira gupfusha, kuko bazaba urubyaro Uhoraho yahaye umugisha, ari bo, ari n’abazabakomokaho.

²⁴Ndetse, na mbere y’uko bampamagara, nzabasubiza; ni baba bakivuga, mbe nabumvise hakiri kare.

²⁵Ikirura n’umwana w’intama bizarisha hamwe[157], intare izarishe ubwatsi nk’ikimasa, naho inzoka itungwe n’umukungugu. Nta we uzaba akigira nabi cyangwa ngo akore amahano ku musozi wanjye mutagatifu. Uwo ni Uhoraho ubivuze.