Read kinyarwanda Izayi 8 Bible Online

Izayi 8 - kinyarwanda bible

Izayi 8

¹Uhoraho arambwira ati «Fata igisate kinini cy’ibuye, wandikeho aya magambo, ukoresheje itindo isanzwe: Kuri Maheri‐Shalali‐Hashi‐Bazi, (Minyago‐iri hafi‐Isahura‐iregereje).

²Nuko ibyo birangiye, mfata Uriya umuherezabitambo, na Zekariyahu mwene Yeberekiyahu, abagabo b’abahamya kandi bemewe.

³Hanyuma nsanga umuhanuzikazi (ari we mugore wanjye), asama inda maze abyara umuhungu. Uhoraho arambwira ati «Uwo mwana, mwite Maheri‐Shalali‐Hashi‐Bazi,

⁴kuko mbere y’uko amenya kuvuga ngo ’data’ cyangwa ’mama’, bazaba bashyikirije umwami wa Ashuru ubukungu bw’i Damasi, n’iminyago y’i Samariya.

⁵Uhoraho arongera ambwira muri aya magambo :

⁶Kubera ko uyu muryango wanze amazi ya Silowe[25] atembana ituze, ugakangarana imbere ya Rasoni na mwene Remaliyahu,

⁷kubera iyo mpamvu, Uhoraho azawuteza amazi menshi, afite imivumba y’uruzi rwa Efurati (yavugaga umwami wa Ashuru n’ikuzo rye ryose), azasohoke mu kiryamo cyayo, arenge inkombe zayo zose.

⁸Azagera kuri Yuda amusendereho, amugere mu ijosi, yagure inkombe zayo yuzure igihugu cyawe, wowe Emanuweli!

⁹Miryango, nimwumve kandi muhinde umushyitsi! Nimutege amatwi, namwe mahanga yose ya kure! Nimukindikize intwaro zanyu, nyamara muzaneshwa!

¹⁰Nimujye imigambi, ariko izapfa ubusa. Muvuge ayo mushatse yose, ariko nta cyo bizabamarira, kuko «Imana turi kumwe».

¹¹Uhoraho yamfashe akaboko, antegeka kudakurikira inzira y’uwo muryango, muri aya magambo:

¹²Ntimukite ubugambanyi, ibyo uwo muryango wita ubugambanyi byose. Ntimugaterwe ubwoba n’ibyo batinya, kandi ntibikabakange.

¹³Ahubwo mumenye ko Uhoraho Umugaba w’ingabo, ari we muzita Intungane, ni we mugomba gutinya, ni we ushobora kubakanga.

¹⁴Inzu zombi za Israheli, azazibera Ingoro, ibuye basitaraho n’urutare batembaho, abere urushundura n’umutego ab’i Yeruzalemu.

¹⁵Benshi bazasitara kuri urwo rutare bikubite hasi, bashenjagurike, bagwe mu mutego ubutazawuvamo.

¹⁶(Uhoraho arambwira ati) «Inyigisho zanjye, uzizigame neza, uzikomeze mu mitima y’abigishwa banjye.»

¹⁷Ahasigaye ntegereza Uhoraho wimaga amaso inzu ya Yakobo, mba ari we niringira.

¹⁸Jyewe n’abana Uhoraho yampaye, turi ibimenyetso n’impanuro muri Israheli, biturutse kuri Uhoraho, Umugaba w’ingabo, utuye ku musozi wa Siyoni.

¹⁹Nibababwira bati «Nimubaze abagirwa n’abapfumu[26], bavugiriza, bakavugira no mu matamatama», bakababaza ngo «Ese ntibikwiye ko umuryango ubaza imana zawo n’abapfuye bawo, ubigirira abazima?»

²⁰Nibababaza batyo, muzabasubize muti «Amategeko n’amabwiriza y’Uhoraho, ni byo mugomba gukurikiza.» Baragowe abatazakurikiza iryo jambo, kuko batazongera kubona umuseke weya!

²¹Ahubwo bazambuka igihugu, ari imbabare n’abashonji, maze kubera iyo nzara, barakare, bavume umwami wabo n’Imana yabo. Bazarangamira hejuru,

²²hanyuma buname barebe hasi, babone ububabare n’umwijima, n’ubwire buteye inkeke. Ni iryo joro bazaba bajugunywemo.

²³Nta mwijima ukirangwa mu gihugu cyarimo umubabaro. Kuko mu gihe cyahise, Uhoraho yasuzuguje igihugu cya Zabuloni n’icya Nefutali, ariko hanyuma aha ikuzo inzira igana ku nyanja, hakurya ya Yorudani n’intara y’abanyamahanga[27].