Read kinyarwanda Abalevi 11 Bible Online

Abalevi 11 - kinyarwanda bible

Abalevi 11

¹Uhoraho abwira Musa na Aroni, ati

²«Muzabwire Abayisraheli mutya: Mu nyamaswa zose ziri ku isi, dore izo muzashobora kurya:

³izifite ikinono gisatuye, kandi zuza.

⁴Mu nyamaswa rero zuza kandi zifite ibinono, dore izo mutazarya: Ingamiya, kuko yuza ariko ntigire ibinono; ntimuzayirye, yabanduza.

⁵Impereryi, kuko yuza ariko ntigire ibinono; murayizira; yabanduza.

⁶Urukwavu, kuko rwuza ariko ntirugire ibinono; muraruzira, rwabanduza.

⁷Ingurube, kuko ifite ibinono bisatuye, ariko ntiyuze; murayizira, yabanduza.

⁸Izo nyamaswa zose, muzira inyama zazo no gukora ku ntumbi zazo, kuko zabanduza.

⁹Dore mu nyamaswa ziba mu mazi, izo muzashobora kurya: inyamaswa yose iba mu mazi, haba mu nyanja cyangwa mu mugezi, niba ifite amababa yogesha n’isharankima, mushobora kuyirya.

¹⁰Cyakora, inyamaswa zose, zitagira amababa zogesha n’isharankima, ari udusimba two mu mazi, ari n’ibindi biba mu nyanja cyangwa mu migezi, byose murabizira.

¹¹Birabujijwe ntimuzigere na rimwe murya inyama zabyo, kandi ntihazagire n’ukora ku ntumbi zabyo.

¹²Inyamaswa yose yo mu mazi idafite amababa yogesha n’isharankima, murayizira.

¹³Mu nyoni, dore izo mutazakoraho kandi ntimuzirye kuko muzizira: kagoma, icyanira, icyaruzi,

¹⁴sakabaka, amoko yose y’ibyanira,

¹⁵amoko yose y’ibikona,

¹⁶mbuni, igishihanyi, rushorera, agaca n’amoko yako yose,

¹⁷igihunyira, sarumfuna, igihunyira cy’amatwi,

¹⁸inyange, igishondabagabo, ikizu,

¹⁹itanangabo, samusure n’agacurama, hamwe n’uruyongoyongo n’amoko yarwo yose.

²⁰Igisimba cyose kiguruka kandi kikagira amaguru ane, ni umuziro kuri mwe.

²¹Cyakora muri ibyo bisimba biguruka kandi bikagira amaguru ane, ibyo mushobora kuzarya, ni ibifite amaguru atuma bisimbagurika ku butaka.

²²Ibyo mushobora kurya rero, ni inzige, isanane, amajeri, hamwe n’amoko yabyo yose.

²³Bityo rero, igisimba cyose kiguruka kandi kikagira gusa amaguru ane ariko ntigisimbagurike, murakizira.

²⁴Izo nyamaswa zose rero zirahumanya; uzakora ku ntumbi yazo azaba yanduye kugeza nimugoroba.

²⁵Uzaterura intumbi yazo wese, azamese imyenda ye, kuko azaba yanduye kugeza nimugoroba.

²⁶Inyamaswa zose zifite ibinono bidasatuye cyangwa ntizuze, izo murazizira. Uzikozeho aba yanduye.

²⁷Byongeye, mu nyamaswa zose zigenza amaguru ane, izidafite ibinono zikandagiza amajanja, murazizira. Uzakora ku ntumbi yazo wese, azaba yanduye kugeza nimugoroba.

²⁸Uzaterura intumbi yazo wese, azamese imyenda ye, kuko aba yahumanye kugeza nimugoroba.

²⁹Mu dusimba tujagata ku butaka twose, utwo muzira ni utu: ifuku, umushushwe, amoko yose y’umuserebanya,

³⁰umukara, umucamano, icyugu hamwe n’uruvu.

³¹Ngutwo utuzira mu dusimba twose. Uzakora ku ntumbi yatwo wese, azaba yanduye kugeza nimugoroba.

³²Igikoresho cyose intumbi yatwo izagwaho, kizaba cyanduye. Cyaba igikoresho cyo mu giti, umwambaro, uruhu se cyangwa isaho, mbese igikoresho icyo ari cyo cyose, ibyo byose bizogeshwa amazi kuko biba byanduye kugeza nimugoroba. Nyuma y’ibyo, ni ho bizaba bisukuye.

³³Bene ako gasimba nikagwa mu gikoresho cy’ibumba, ibikirimo bizaba byanduye, n’icyo gikoresho kigomba kumenwa.

³⁴Ibiribwa byose n’ibinyobwa byose bizatarukirwa n’amazi yari muri ibyo bikoresho, bizaba byanduye.

³⁵Ikintu cyose intumbi y’utwo dusimba izagwaho, kizaba cyanduye. N’aho cyaba iziko cyangwa amashyiga, muzakimenagure, kuko kiba cyanduye kandi muzakizira.

³⁶Nyamara isoko cyangwa iriba ryafukuriwe kubika amazi, byo ntibishobora guhumana, naho ubundi ukoze ku ntumbi y’utwo dusimba aba yanduye.

³⁷Nanone kandi intumbi yatwo nigwa ku ntete zigenewe kuzabibwa, nta bwo zizahumana.

³⁸Cyakora, iyo mbuto niba yageze mu mazi, maze intumbi y’utwo dukoko ikayigwaho, izaba ishobora kubanduza.

³⁹Inyamaswa yose mushobora kurya niyipfusha, uzakora ku ntumbi yayo azaba yanduye kugeza nimugoroba.

⁴⁰Uriye ku ntumbi yayo na we kandi, arahumana kugeza nimugoroba. Agomba rero kumesa imyambaro ye. Ni kimwe n’uwayiteruye, na we agomba kumesa imyambaro ye, kuko aba yahumanye kugeza nimugoroba.

⁴¹Udusimba twose tujagata ku butaka, muratuzira, ntimuzaturye.

⁴²Twaba utugendesha inda, utugendesha amaguru ane cyangwa arenga, ntimuzaturye kuko mutuzira.

⁴³Ntimuzihumanye maze ngo mwiyanduze kubera utwo dusimba twikurura hasi.

⁴⁴Ndi Uhoraho Imana yanyu, muzisukure mube abatagatifu nk’uko nanjye ndi umutagatifu. Mwebwe ubwanyu, ntimuzihumanye ku mpamvu ya turiya dusimba tujagata ku butaka.

⁴⁵Ndi Uhoraho, wabakuye mu gihugu cya Misiri kugira ngo mbabere Imana. Mugomba rero kuba abatagatifu kuko nanjye ndi umutagatifu.

⁴⁶Ayo ni yo mategeko yerekeye inyamaswa, inyoni hamwe n’utundi dusimba twose twoga mu mazi cyangwa tujagata ku butaka.

⁴⁷Ayo mategeko azatuma mushobora gutandukanya icyanduza n’ikitanduza, kandi mumenye inyamaswa ziribwa n’izitaribwa.