Read kinyarwanda Abalevi 18 Bible Online

Abalevi 18 - kinyarwanda bible

Abalevi 18

¹[26] Uhoraho abwira Musa, ati

²«Dore ibyo uzamenyesha Abayisraheli: Ndi Uhoraho Imana yanyu. Ibyakorwaga mu gihugu cya Misiri mwatuyemo, ntimuzabyigane.

³Ibikorwa mu gihugu cya Kanahani ngiye kubatuzamo na byo, ntimuzabyishinge.

⁴Ntimuzakurikize amategeko yabo, ahubwo muzafate imico nabatoje, kandi mwubahirize amabwiriza yanjye. Ndi Uhoraho Imana yanyu.

⁵Muzite ku mategeko yanjye kandi mufate imico yanjye. Umuntu uzubahiriza ibyo, ni we uzagira ubuzima. Ndi Uhoraho.

⁶Ntihazagire n’umwe muri mwe wegera uwo bafitanye isano kugira ngo baryamane. Ndi Uhoraho.

⁷Ntuzaryamane na nyoko; kuko kumwambika ubusa byaba ari ukubahuka so, na nyoko wakubyaye.

⁸Ntuzaryamane na muka so, kuko kumwambika ubusa byaba ari ukubahuka so.

⁹Ntuzaryamane na mushiki wawe, n’iyo muhuje so cyangwa nyoko gusa, yaba yaravukiye mu nzu yawe cyangwa yaravukiye ahandi.

¹⁰Ntuzaryamane n’umwuzukuru wawe, kuko kumwambika ubusa, byaba ari ukwiyubahuka ubwawe.

¹¹Ntuzaryamane n’umwana wa muka so; kuko so aba yaramubyaye, aba ari mushiki wawe nyine.

¹²Ntuzaryamane na nyogosenge, kuko aba asangiye umubiri umwe na so.

¹³Ntuzaryamane na nyoko wanyu, kuko aba asangiye umubiri umwe na nyoko wakubyaye.

¹⁴Ntuzaryamane n’umugore wa so wanyu, kuko waba wubahutse umuvandimwe wa so.

¹⁵Ntuzaryamane n’umukazana wawe, kuko aba ari umugore w’umuhungu wawe, ntuzamwambike ubusa.

¹⁶Ntuzaryamane n’umugore w’umuvandimwe wawe; kuko kumwambika ubusa byaba ari ukubahuka umuvandimwe wawe ubwe.

¹⁷Nuba waryamanye n’umugore, ntuzasambanye umukobwa we; ndetse uzirinde kwegera abuzukuru be kuko baba basangiye umubiri umwe na we. Ubikoze byaba ari ishyano.

¹⁸Umugore wawe naba akiriho, ntuzarongore umukobwa bava inda imwe, kuko wabatera amahari.

¹⁹Umugore uri mu mihango y’abakobwa, aba yanduye, ntimuzaryamane.

²⁰Ntuzasambane n’umugore wa mugenzi wawe, byagukururira kwandura.

²¹Ntuzagire n’umwe mu bana bawe utura Moleki[27] umumutwikira, kandi ntuzasuzugure izina ry’Imana yawe. Ndi Uhoraho.

²²Umugabo ntazaryamane n’undi mugabo nk’uko aryamana n’umugore. Byaba ari ishyano.

²³Ntuzasambanye inyamaswa, byagutera kwandura. Ntihazagire kandi umugore uryamana na yo, byaba ari ukwitesha agaciro.

²⁴Ntimuzakurikize iyo migenzereze bitazabaviramo kwandura. Ni yo yanduje abanyamahanga nzirukana bakabahunga.

²⁵Igihugu cyabo cyaranduye, ni yo mpamvu nagihannye, nkaba ngiye kucyirukanamo abaturage bacyo.

²⁶Mwebwe, ari umunyagihugu kavukire cyangwa umunyamahanga ubatuyemo, muzirinde ayo mahano, maze mwite ku mategeko yanjye kandi mufate imico nabatoje.

²⁷Igihugu cya Kanahani cyahumanyijwe n’amahano abantu bababanjirijemo bakoze.

²⁸Mwebwe nimutagihumanya, sinzakibakuramo nk’uko nagenjereje abagituye mbere yanyu.

²⁹Ariko rero, umuntu wese uzakora na rimwe muri ayo mahano, azacibwe mu muryango we.

³⁰Muzakurikize amategeko yanjye, mwirinde iyo mico iteye isoni y’abababanjirije, kugira ngo bitabaviramo kwandura. Ndi Uhoraho Imana yanyu.»