Read kinyarwanda Abalevi 23 Bible Online

Abalevi 23 - kinyarwanda bible

Abalevi 23

¹[36] Uhoraho abwira Musa, ati

²«Dore ibyo uzamenyesha Abayisraheli: Iminsi mikuru y’Uhoraho nigera, muzajya muhamagaza amakoraniro matagatifu. Ayo makoraniro tuzajya duhuriramo ni aya:

³Muzajya mumara iminsi itandatu mwikorera imirimo yanyu, ariko uwa karindwi, muwuharire isabato. Aho muzaba mutuye hose, kuri uwo munsi muzahamagaza ikoraniro ritagatifu. Ntimuzagire undi murimo mukora. Ni umunsi w’ikiruhuko, umunsi w’isabato y’Uhoraho.

⁴Iminsi mikuru[37] y’Uhoraho ni iyi ikurikira. Kuri iyo minsi yateganijwe kandi, ni ho muzajya muhamagaza amakoraniro matagatifu.

⁵[38] Mu kabwibwi k’umunsi wa cumi n’ine w’ukwezi kwa mbere, ni Pasika y’Uhoraho.

⁶Ku munsi wa cumi n’itanu w’uko kwezi, hatangira iminsi mikuru y’imigati idasembuye, yagenewe Uhoraho. Muzamara iminsi irindwi murya imigati idasembuye.

⁷Ku munsi wa mbere muzahamagaza ikoraniro ritagatifu, kandi mwoye kugira umurimo unaniza mukora.

⁸Buri munsi muri iyo irindwi, muzatura Uhoraho igitambo cy’ibiribwa bikongejwe burundu. Ku munsi wa karindwi, ni ho muzahamagaza ikoraniro ritagatifu kandi mwoye kugira umurimo unaniza mukora.»

⁹[39] Uhoraho abwira Musa, ati

¹⁰«Dore ibyo uzamenyesha Abayisraheli: Nimumara kugera mu gihugu nabahaye, maze mukeza imyaka, muzazanire umuherezabitambo umuba w’amahundo ya mbere y’umusaruro wanyu.

¹¹Ku munsi ukurikira Sabato, umuherezabitambo azaturira uwo muba imbere y’Uhoraho kugira ngo muwushimirwe.

¹²Umunsi muzamurika uwo muba, muzature Uhoraho igitambo gitwikwa cy’umwana w’intama w’umwaka umwe kandi utagira inenge.

¹³Icyo gitambo kandi kizaherekezwa n’ituro ry’utwibo tubiri tw’ifu ivanze n’amavuta, hamwe n’igitambo giseswa cya kimwe cya kane cy’ikibindi cya divayi. Icyo ni cyo gitambo gikongokeye Uhoraho burundu kandi gifite impumuro imwurura.

¹⁴Uwo munsi wo kumurika ituro ry’Imana yanyu nuba utaragera, muzirinde kurya ari imigati, ari amahundo yokeje cyangwa amabisi. Kuva ku gisekuruza kugera ku kindi, iryo rizababere itegeko ridakuka aho muzaba mutuye hose.

¹⁵[40] Kuva ku munsi ukurikira isabato, mbese kuva ku munsi muzaba mwatuye Uhoraho umuba w’amahundo ya mbere, muzatangire kubara ibyumweru birindwi byuzuye.

¹⁶Nimugeza ku isabato ya karindwi mubara, umunsi uzakurikiraho uzaba ari uwa mirongo itanu.

¹⁷Aho muzaba mutuye hose, muzasanga Uhoraho, mumuture imigati ibiri isembuye kandi ikoze mu ifu yuzuye utwibo tubiri. Uwo ni wo muganura ugomba guhabwa Uhoraho.

¹⁸Uretse iyo migati kandi, Uhoraho muzamutura igitambo gitwikwa kigizwe n’ibi bikurikira: ikimasa kimwe, hamwe n’amasekurume y’intama abiri. Icyo gitambo gitwikwa kizaherekezwa n’ituro hamwe n’igitambo giseswa byategetswe. Icyo ni igitambo cy’ibiribwa gikongokeye Uhoraho burundu, kandi bifite impumuro yurura Uhoraho.

¹⁹Ubundi kandi hari isekurume y’ihene izaturwaho igitambo cy’impongano y’icyaha, hamwe n’abana b’intama babiri b’umwaka umwe, bakazaba ab’igitambo cy’ubuhoro.

²⁰Ibyo byose, umuherezabitambo azabimurikira Uhoraho, maze ba bana b’intama babiri baherezwe hamwe na ya migati y’umuganura. Ibyo byose kandi ni amaturo matagatifu y’Uhoraho; ni umugabane w’umuherezabitambo.

²¹Kuri uwo munsi nyine, muzahamagaze ikoraniro ritagatifu, kandi mwoye kugira umurimo unaniza mukora. Kuva mu gisekuruza kugera mu kindi, iryo rizababere itegeko ridakuka aho muzaba mutuye hose.

²²Nimusarura imirima yanyu, ku mbibi mujye muhasiga, kandi ntimuzasubire inyuma ngo muhumbe ibyasigayemo. Mujye mubiharira abakene n’abasuhuke. Ndi Uhoraho Imana yanyu.»

²³[41] Uhoraho abwira Musa, ati

²⁴«Dore ibyo uzamenyesha Abayisraheli: Ku munsi wa mbere w’ukwezi kwa karindwi, muzajye muruhuka. Ni umunsi w’urwibutso, ukaba kandi uwo guhimbaza Uhoraho mu ikoraniro ritagatifu.

²⁵Icyo gihe muzajya mutura Uhoraho igitambo cy’ibiribwa bikongejwe burundu, kandi mwoye kugira umurimo unaniza mukora.»

²⁶[42] Uhoraho abwira Musa, ati

²⁷«Dore ibyo uzamenyesha Abayisraheli: Umunsi wa cumi w’uko kwezi kwa karindwi, ni umunsi mukuru w’imbabazi. Muzahamagaza ikoraniro ritagatifu, mwirinde kurya, kandi muture Uhoraho igitambo cy’ibiribwa bikongokeye Uhoraho burundu.

²⁸Ntimuzagire umurimo unaniza mukora, kuko ari umunsi mukuru w’imbabazi, ukaba ari na wo mukorerwaho umuhango ubahanaguraho ibyaha imbere y’Uhoraho Imana yanyu.

²⁹Bityo rero, utazasiba kurya ku munsi nk’uwo, azacibwa mu muryango we.

³⁰Uzakora umurimo unaniza ku munsi nk’uwo, na we nzamuca mu muryango we.

³¹Ntimuzagire umurimo mukora, kandi kuva mu gisekuruza kugera mu kindi, iryo rizababere itegeko ridakuka aho muzaba mutuye hose.

³²Uwo munsi, muzirinde kurya. Kuri mwebwe ni nk’umunsi w’isabato, ukaba n’umunsi w’ikiruhuko. Kuva ku mugoroba w’umunsi wa cyenda w’uko kwezi, kugeza ku wundi mugoroba, muzubahirize icyo kiruhuko cy’isabato.»

³³[43] Uhoraho abwira Musa, ati

³⁴«Dore ibyo uzamenyesha Abayisraheli: Umunsi wa cumi n’itanu w’uko kwezi kwa karindwi, ni umunsi mukuru w’amahema. Ni igihe cy’ibirori byo guhesha ikuzo Uhoraho, kigomba kumara iminsi irindwi.

³⁵Ku munsi wa mbere, ntimuzagire umurimo unaniza mukora, ahubwo muzahamagaze ikoraniro ritagatifu.

³⁶Icyo cyumweru cyose, muzakimara mutura Uhoraho buri munsi igitambo cy’ibiribwa bikongejwe burundu. Ku munsi wa munani, muzahamagaza ikoraniro ritagatifu, maze nanone muture Uhoraho igitambo cy’ibiribwa bikongokeye Uhoraho burundu. Kuri uwo munsi ni ho muzasoza ibirori, ntimuzagire rero umurimo unaniza mukora.

³⁷Iyo ni yo minsi mikuru y’Uhoraho. Kuri iyo minsi ni ho muzahamagaza ikoraniro ritagatifu, maze mugatura Uhoraho ibi bikurikira: igitambo cy’ibiribwa bikongokeye Uhoraho burundu, igitambo gitwikwa cyangwa ibitambo biseswa, mukurikije imihango ya buri munsi.

³⁸Nanone kandi ibyo bizaza bisanga amaturo y’isabato y’Uhoraho, hamwe n’andi maturo asanzwe cyangwa ibitambo mumutura ku bushake bwanyu cyangwa kubera umuhigo mwahize.

³⁹Ku munsi wa cumi n’itanu w’ukwezi kwa karindwi nanone, nimumara gusarura imyaka mu mirima yanyu, muzasanga Uhoraho mu Ngoro ye, ngo mumukorere ibirori by’iminsi irindwi. Umunsi wa mbere n’uwa munani izaba iy’ikiruhuko.

⁴⁰Mu ntangiriro z’ibyo birori, muzitwaze imbuto ziryoshye cyane, amashami y’imikindo, ay’ibiti bisagambye kandi binini, hamwe n’ingemwe z’imikinga yo ku mugezi, kandi muzamara iminsi irindwi mwishimira imbere y’Uhoraho.

⁴¹Buri mwaka muzasanga mutyo Uhoraho kugira ngo mumwizihize mu gihe cy’iminsi irindwi. Ibyo birori bizajya biba mu kwezi kwa karindwi. Kuva mu gisekuruza kugera mu kindi, iryo rizababere itegeko ridakuka.

⁴²Umuyisraheli wese kavukire azamara iminsi irindwi aba mu mahema.

⁴³Uko ibisekuruza bizagenda bisimburana, ibyo bizatuma mwiyibutsa ko igihe nakuraga Abayisraheli mu gihugu cya Misiri nabatuje mu mahema[44]. Ndi Uhoraho, Imana yanyu.

⁴⁴Nuko rero Musa amenyesha Abayisraheli uburyo bazajya babonana n’Uhoraho mu bihe by’iminsi mikuru.