Read kinyarwanda Abalevi 3 Bible Online

Abalevi 3 - kinyarwanda bible

Abalevi 3

¹Umuntu natura igitambo cy’ubuhoro agikuye mu matungo maremare, cyaba ikimasa cyangwa inyana, ajye amurikira Uhoraho itungo ridafite inenge.

²Arambike ikiganza ku mutwe w’icyo gitambo, akicire ku muryango w’ihema ry’ibonaniro, nuko abaherezabitambo ari bo bene Aroni bamishe amaraso yacyo impande zose z’urutambiro.

³Ibizava kuri icyo gitambo cy’ubuhoro babiture Uhoraho bibe igitambo cy’ibiribwa gikongotse burundu, n’ibinure biri ku mara, ibinure byose bitwikiriye amara

⁴n’impyiko zombi hamwe n’ikinure kizifasheho n’igifashe ku byaziha, urugimbu rwo ku mwijima na rwo bazarwomoreho rusange impyiko.

⁵Hanyuma, ibyo byose bene Aroni bazabitwikire ku rutambiro, babigeretse ku gitambo gitwikwa kiri hejuru y’inkwi bashyize ku muriro. Icyo ni igitambo cy’ibiribwa gikongotse burundu, kandi gifite impumuro yurura Uhoraho.

⁶Umuntu natura igitambo cy’ubuhoro agikuye mu matungo magufi, azamurike itungo ridafite inenge, ryaba isekurume cyangwa inyagazi.

⁷Niba ari umwana w’intama ashaka gutangaho ituro, azawuzanire Uhoraho,

⁸awurambikeho ikiganza ku mutwe, maze awicire imbere y’ihema ry’ibonaniro. Nuko bene Aroni bazamishe amaraso yawo mu mpande zose z’urutambiro.

⁹Kuri icyo gitambo cy’ubuhoro, ibizaba ituro ry’ibiribwa rikongokeye Uhoraho burundu, ni inyama zose ziriho ibinure. Ni ukuvuga umurizo wose bazacira mu nguge, n’ibinure byoroshe amara, ikinure cyose gitwikiriye amara

¹⁰hamwe n’impyiko zombi n’urugimbu rwazo rufatanye n’ibyaziha. Urugimbu rwo ku mwijima na rwo barwomoreho rusange impyiko.

¹¹Hanyuma, ibyo byose umuherezabitambo azabitwikire ku rutambiro, bibe igitambo cy’ibiribwa bikongokeye Uhoraho burundu.

¹²Niba ari ihene ashaka gutura, azayizane imbere y’Uhoraho,

¹³ayirambikeho ikiganza ku mutwe, maze ayicire ku muryango w’ihema ry’ibonaniro. Nuko rero, bene Aroni bamishe amaraso yayo impande zose z’urutambiro.

¹⁴Ibizaba ituro ry’ibiribwa bikongokeye Uhoraho burundu ni ikinure kiri ku mara, ikinure cyose gitwikiriye amara,

¹⁵n’impyiko zombi hamwe n’urugimbu ruzifasheho n’urufashe ku byaziha. Urugimbu rwo ku mwijima barwomoreho rusange impyiko.

¹⁶Izo nyama zose, umuherezabitambo azazitwikire ku rutambiro. Ni igitambo cy’ibiribwa bikongotse burundu, kandi gifite impumuro yurura. Ibinure byose bizajya biba umugabane w’Uhoraho.

¹⁷Iryo ni itegeko ridakuka kuri mwebwe, kuva mu gisekuru kugera mu kindi, aho muzaba mutuye hose. Icyitwa ikinure cyose, hamwe n’icyitwa amaraso cyose, ntimuzabirye.»