Read kinyarwanda Yeremiya 10 Bible Online

Yeremiya 10 - kinyarwanda bible

Yeremiya 10

¹Nimutege amatwi ijambo Uhoraho ababwira, bantu ba Israheli!

²Uhoraho avuze atya: Ntimugakurikize imico y’abanyamahanga; ibimenyetso byo mu kirere ntibikabakangaranye, amahanga ni yo akangaranywa na byo.

³Ni koko, imigenzo yayo ni amanjwe: baratema igiti mu ishyamba, umunyabukorikori akakigegenesha icyuma,

⁴akagitakisha feza na zahabu, maze akagitera imisumari, akoresheje inyundo, kugira ngo kitajegajega.

⁵Ibyo bigirwamana bimeze nk’ibishusho bikanga inyoni mu murima w’imyungu; ntibivuga kandi bagomba kubyikorera kuko bidashobora kugenda. Ntibizabatere ubwoba, kuko nta kibi byabakorera, ariko na none nta n’akamaro byabagirira!

⁶Uhoraho, nta n’umwe muhwanye! Uri igihangange, n’izina ryawe ni ikirangirire, kubera ibigwi byaryo.

⁷Ni nde utakubaha, mwami w’amahanga? Ibyo ni wowe bikwiye, kuko mu bahanga bose b’amahanga no mu bihugu byose, nta n’umwe muhwanye.

⁸Bose, nta n’umwe usigaye, bihinduye ibicucu maze bata ubwenge. Inyigisho bahabwa muri ubwo bucucu, ni zo zatumye bamera batyo.

⁹Ibyo bigirwamana ni feza isennye ituruka i Tarishishi, cyangwa zahabu yo muri Ufazi; byakozwe n’umunyabukorikori hamwe n’umucuzi, babitakisha ibara ry’isine n’iritukura. Nyamara ariko ntibibibuza kuba bikozwe n’abanyabukorikori.

¹⁰Ariko Uhoraho Imana ni umunyakuri, ni Imana nzima, akaba n’umwami ubuziraherezo. Iyo arakaye, isi ihinda umushyitsi, amahanga ntashobora guhangara uburakari bwe.

¹¹(Dore ibyo muzababwira: imana zitaremye isi n’ijuru, zigomba gucibwa ku isi no mu nsi y’ijuru!)

¹²Uhoraho ni we waremesheje isi ububasha bwe, ibiyituye abihangana ubuhanga, ubwenge bwe aburamburisha ijuru.

¹³Iyo avuze wagira ngo ni amasumo y’amazi mu ijuru, ni we ukoranya ibicu nyamunini mu mpera z’isi, akarekura imirabyo imvura ikagwa, kandi agakura imiyaga mu ndiri zayo.

¹⁴Umuntu wese arumirwa, bikamubera urujijo, umucuzi wese agaterwa isoni n’ikigirwamana cye: rwose amashusho ye ni ibinyoma, nta mwuka uyarimo.

¹⁵Byose ni ubucucu n’amanjwe baseka, igihe cyo guhanwa nikigera, bizarimburwa.

¹⁶Naho Imana, yo mugabane wa Yakobo si uko iteye! Yo, ni umuremyi wa byose; Israheli ikaba ari umuryango yeguriweho umugabane; Uhoraho Umugaba w’ingabo, ni ryo zina rye. (Yeremiya:)

¹⁷Ngaho terura imitwaro yawe, wowe wugarijwe!

¹⁸Kuko Uhoraho avuze atya: Ubu noneho ngiye kujugunya ku gasi abaturage b’iki gihugu, kandi nkomeze mbabe hafi, kugira ngo batancika. (Yeruzalemu:)

¹⁹Ndagowe! Mbega amakuba! Igikomere cyanjye nticyomorwa! Jyewe naribwiraga nti «Ibyago byanjye ni ibyo, nzabyihanganira!

²⁰None ihema ryanjye ryasenyutse, imigozi yaryo yose yarandutse. Abana banjye ntibakiriho. Nta muntu ugihari ngo anshingire ihema ryanjye, ngo anyegurire ingando yanjye!» (Yeremiya:)

²¹Abashumba babaye ibicucu: ntibagishaka Uhoraho. Ni yo mpamvu nta cyo bagishoboye, amatungo akaba yaratereranywe.

²²Ndumva induru ivuga itugana, ni umuriri munini uturutse mu gihugu cy’amajyaruguru, uje guhindura imigi ya Yuda itongo, n’isenga y’imbwebwe.

²³Uhoraho, nzi ko umuntu atari we utegeka inzira ye; umugenzi ntagene ubwe iby’urugendo rwe.

²⁴Uhoraho, nkosora[27] ariko mu rugero, utabigiranye uburakari, kuko wahita unkuraho.

²⁵Homborera umujinya wawe ku mahanga adashaka kukumenya, ku bihugu bitiyambaza izina ryawe; kuko baconcomeye inzu ya Yakobo, barayiconcomera, bayitsembaho, igihugu cye barakiyogoza.