Read kinyarwanda Yeremiya 34 Bible Online

Yeremiya 34 - kinyarwanda bible

Yeremiya 34

¹Dore ijambo Uhoraho yabwiye Yeremiya, igihe Nebukadinetsari umwami w’i Babiloni afatanije n’ingabo ze zose, n’ibihugu byose byo ku isi yatwaraga, n’amahanga yose, ateye Yeruzalemu n’imigi iyikikije yose.

²Uhoraho, Imana ya Israheli, aravuze ngo «Genda ubwire ukomeje Sedekiya, umwami wa Yuda, uti ’Uhoraho avuze atya: Uyu mugi, ngiye kuwugabiza umwami w’i Babiloni, maze awutwike.

³Nawe, ntuzamucika, azagufata, akwigarurire. Wowe n’umwami w’i Babiloni muzahangana amaso, akuvugishe imbonankubone, hanyuma ujyanwe i Babiloni.

⁴Nyamara ariko, Sedekiya, mwami wa Yuda, umva ijambo ry’Uhoraho: Uhoraho avuze ko utazazira inkota.

⁵Uzipfira neza, maze bazakose n’imibavu, nk’uko bosheje abakurambere bawe bakubanjirije ku ntebe ya cyami. Bazakuririra bagira bati ’Mbega ibyago, mutegetsi wanjye!’ Ni koko, ni jye ubikweruriye. Uwo ni Uhoraho ubivuze.»

⁶Ayo magambo yose, umuhanuzi Yeremiya ayavugira i Yeruzalemu, imbere ya Sedekiya, umwami wa Yuda.

⁷Icyo gihe ingabo z’umwami w’i Babiloni zarimo zigota Yeruzalemu n’imigi ya Yuda; naho iya Lakishi na Azeka[83], yari ikirwana inkundura, kuko ari yo yari isigaye ikomeye mu yindi yose ya Yuda.

⁸[84] Dore ijambo Uhoraho yabwiye Yeremiya, nyuma y’uko umwami Sedekiya arahije umuryango wari i Yeruzalemu, bakiyemeza kurekura abacakara babo.

⁹Buri wese yagombaga kurekura abagaragu be b’Abahebureyi, abagabo n’abagore, bityo ntihagire uwongera guhaka umuvandimwe we w’Umuyuda.

¹⁰Abatware bose n’abandi bose bari biyemeje kurekura abacakara babo, abagabo cyangwa abagore, ntibazongere kubahaka ukundi, barabyubahirije, maze barabarekura.

¹¹Nyamara ariko, nyuma yaho bisubiyeho, bisubiza abacakara bari barekuye, abagabo n’abagore, bongera kubakoresha nk’abacakara.

¹²Uhoraho abwira Yeremiya iri jambo:

¹³«Uhoraho, Imana ya Israheli avuze atya: Ni jyewe wagiranye iri sezerano n’abasokuruza banyu, igihe mbakuye mu gihugu cya Misiri, mu nzu y’ubucakara:

¹⁴’Nyuma y’imyaka irindwi, buri muntu muri mwe azarekura umuvandimwe we w’Umuhebureyi uzaba yarishyize mu maboko ye; azakubera umugaragu imyaka itandatu, hanyuma umurekure[85].’ Ariko abasokuruza banyu ntibabyumvise, nta bwo banteze amatwi.

¹⁵Ariko rero ubu mwebwe mwari mwarigaruye, mukora ibintunganiye: buri wese muri mwe yemera kurekura mugenzi we, bityo mwuzuza indahiro mwagiriye imbere yanjye, mu Ngoro yitiriwe izina ryanjye.

¹⁶Nyuma ariko, mwageze aho mwisubiraho, musuzugura izina ryanjye, buri muntu asubirana abacakara be, abagabo n’abagore mwari mwararekuye, murongera mubakoresha nk’abacakara banyu.

¹⁷None rero, Uhoraho avuze atya: Nta bwo mwanyumvise ngo buri muntu asubize ubwigenge umuvandimwe, cyangwa mugenzi we. Ubu rero jyewe — uwo ni Uhoraho ubivuze — ngiye kubateza inkota, icyorezo n’inzara, maze mbagire ikintu giteye ubwoba ibihugu byose by’isi.

¹⁸Naho abo bantu barenze ku ndahiro bangiriye, nzabatererana, kuko batakurikije amagambo y’isezerano twagiranye, igihe basaturaga cya kimasa mo kabiri bakanyura[86] hagati yacyo.

¹⁹Abategetsi ba Yuda n’aba Yeruzalemu, abatware b’ibwami, abaherezabitambo n’abatuye igihugu bose, mbese abantu bose banyuze hagati y’ibice bibiri bya cya kimasa,

²⁰nzabagabiza abanzi babo n’ababisha bashaka kubambura ubuzima; intumbi zabo zizaribwa n’inyoni zo mu kirere n’inyamaswa zo mu ishyamba.

²¹Naho Sedekiya, umwami wa Yuda, hamwe n’abatware be, nzabagabiza abanzi babo n’ababisha bashaka kubambura ubuzima; mbateze ingabo z’umwami w’i Babiloni umaze kubitarura gato.

²²Ngiye guca iteka — uwo ni Uhoraho ubivuze — maze bagaruke kurwanya uyu mugi, bawugote, bawufate, banawutwike. Imigi ya Yuda nzayihindura amatongo, abaturage bayo bayicikemo.»