Read kinyarwanda Yeremiya 37 Bible Online

Yeremiya 37 - kinyarwanda bible

Yeremiya 37

¹Sedekiya mwene Yoziya, yasimbuye Koniyahu mwene Yoyakimu ku ntebe y’ubwami, ari we Nebukadinetsari, umwami w’i Babiloni, yari yarimitse mu gihugu cya Yuda.

²Ariko, ari we, ari abagaragu be, ari n’abaturage b’icyo gihugu, bari barimye amatwi amagambo Uhoraho yavuze yifashishije umuhanuzi Yeremiya wari waratorewe uwo murimo.

³Umwami Sedekiya yohereza Yukali mwene Shelemiya n’umuherezabitambo Sefaniyahu mwene Maseya, abatuma kuri Yeremiya kumubwira bati «Ndakwinginze, dutakambire kuri Uhoraho Imana yacu!»

⁴Icyo gihe Yeremiya yarishyiraga akizana mu muryango we; yari atarafungwa.

⁵Icyo gihe, ingabo za Farawo zari zihagurutse mu Misiri; nuko Abakalideya bari bagose Yeruzalemu, bamenye iyo nkuru, bajya kubatanga imbere.

⁶Uhoraho ni ko kubwira umuhanuzi Yeremiya, ati

⁷«Uhoraho, Imana ya Israheli avuze atya: Umwami wa Yuda wabohereje ngo mungishe inama, muzamubwire muti ’Ingabo za Farawo zahagurutse mu Misiri zije kubatabara, zizasubira mu gihugu cyazo cya Misiri.

⁸Abakalideya bazagaruka gutera uyu mugi, bawufate maze bawutwike.

⁹Uhoraho avuze atya: «Ntimwibeshye mukeka ko Abakalideya bavuye iwanyu ubutazagaruka; nta ho bagiye.

¹⁰N’iyo mwaba mwatsembye ingabo z’Abakalideya zibugarije, inkomere zarokoka zava mu mahema yazo, zigatwika uyu mugi.’»

¹¹Igihe ingabo z’Abakalideya zavaga mu mugi wa Yeruzalemu zikanze iza Farawo,

¹²Yeremiya yasohotse i Yeruzalemu ashaka kujya mu gihugu cya Benyamini, azinduwe no guhabwa umunani[91] mu muryango we.

¹³Ageze ku irembo rya Benyamini, ahasanga umutware w’abarinzi witwaga Yiriya mwene Shelemiya wa Hananiya. Uwo murinzi yataye muri yombi umuhanuzi Yeremiya, agira ati «Ugiye mu Bakalideya!»

¹⁴Yeremiya arasubiza ati «Urabeshya, singiye mu Bakalideya!» Nyamara ariko Yiriya ntiyashaka kumwumva, ahubwo aramufata amujyana imbere y’abatware.

¹⁵Abo batware baramurakarira, baramukubita, maze bamufungira mu nzu y’umunyamabanga Yehonatani yari yarahinduwemo uburoko.

¹⁶Ubwo rero Yeremiya afungirwa mu nzu iri hasi y’izindi, amaramo igihe kirekire.

¹⁷Hanyuma, umwami Sedekiya ategeka ko bamumuzanira[92]. Nuko amujyana iwe rwihishwa, aramubaza ati «Hari ijambo Uhoraho yakubwiye?» Yeremiya arasubiza ati «Rirahari», ndetse yongeraho ati «Ugiye kuzatabwa mu maboko y’umwami w’i Babiloni.»

¹⁸Yeremiya arongera abwira Sedekiya, ati «Ni ikihe cyaha nagukoreye wowe, n’abagaragu bawe, n’umuryango wawe, kugira ngo mube mwarandoshye mu buroko?

¹⁹Ese ba bahanuzi banyu bari he, bamwe bababwiraga ko mwebwe n’igihugu cyanyu mutagomba kwikanga igitero cy’umwami w’i Babiloni?

²⁰None rero, mwami, mutegetsi wanjye, wumve neza icyo ngusaba: ntunsubize mu nzu y’umunyamabanga Yehonatani, ntava aho mpapfira.»

²¹Umwami Sedekiya ategeka ko bafungira Yeremiya mu gikari cy’inzu y’imbohe, kandi bakajya buri munsi bamuha umugati uguzwe ku muhanda w’abayikora; kugeza ubwo imigati izashira mu mugi. Nguko uko Yeremiya yagumye mu gikari cy’imbohe.