Read kinyarwanda Yeremiya 4 Bible Online

Yeremiya 4 - kinyarwanda bible

Yeremiya 4

¹(Uhoraho:) Israheli, nuramuka ushatse kugaruka, ni jyewe ugomba gusanga. Nuvana ibigirwamana byawe mu maso yanjye, ntuzongera kubungera ukundi.

²Niba kandi urahiye mu izina ry’Uhoraho muzima, ukabikora mu kuri, mu buryo butunganye no mu butabera, ubwo amahanga yose azamperwamo umugisha kandi azakurizwa muri jye.

³Dore ibyo Uhoraho abwira abantu ba Yuda n’ab’i Yeruzalemu: Nimuteme ishyamba, muhinge umurima mushya, mureke gukomeza kubiba mu mahwa!

⁴Bantu ba Yuda, namwe ab’i Yeruzalemu, nimwiyegurire Uhoraho, nimwiyorosoreho ibyugarije umutima wanyu. Nimutagenza mutyo, uburakari bwanjye buzavubuka nk’umuriro; buzatwika ku buryo nta we ushobora kubuzimya, kubera imigenzereze yanyu mibi.

⁵[13]Nimubitangaze muri Yuda, mubyamamaze muri Yeruzalemu, nimuvuze ihembe hose mu gihugu, murangurure amajwi muti «Nimukoranire hamwe mwese, twinjire mu bigo bikomeye.

⁶Ibendera ryanyu muryerekeze i Siyoni ; muhunge, nta guhagarara mu nzira! Kuko mbateje ibyago, biturutse mu majyaruguru; ishyano rikaba riguye!

⁷Intare yavumbutse mu kibira ; umurimbuzi w’amahanga arahagurutse, avuye iwe azanywe no guhindura igihugu cyawe itongo. Imigi yawe izatwikwa, abayituye bayicikemo.»

⁸Kubera ibyo rero, nimwambare ibigunira, nimuganye kandi mucure imiborogo, kuko uburakari bukaze bw’Uhoraho butaratuvirira!

⁹Uhoraho avuze atya: Kuri uwo munsi nyine umwami n’abatware bazacika intege, abaherezabitambo basuherwe, n’abahanuzi bahinde umushyitsi. Uwo ni Uhoraho ubivuze. (Yeremiya:)

¹⁰Ubwo ndavuga nti «Nyagasani Mana, mu by’ukuri wabeshye[14] uyu muryango na Yeruzalemu, igihe uvuze uti ’Muzagira amahoro’, none ngaha twamazwe n’inkota.»

¹¹Icyo gihe Uhoraho azabwira uwo muryango na Yeruzalemu, ati «Ngaha umuyaga ugurumana uturutse mu butayu, unyura mu mpinga z’imisozi ugana umuryango wanjye. Nta bwo ari umuyaga wo kugosora cyangwa gusukura:

¹²ahubwo ni umuyaga w’inkubi, nohereje uturutse aho ngaho. Ubu rero nanjye ngiye kubacira urubanza.» (Rubanda:)

¹³Dore umwanzi atwahutsemo nk’ibicu biyagara, amagari ye y’intambara ni nk’ishuheri y’umuyaga, naho amafarasi ye araguruka kurusha kagoma. Turagatoye! Turashize! (Uhoraho:)

¹⁴Yeruzalemu, tsemba ubugome mu mutima wawe, maze ukunde urokoke. Mbese iyo migambi mibi ikurimo, uzayibundikira kugeza ryari?

¹⁵Ijwi rirangururiye i Dani no ku musozi wa Efurayimu, rimenyesha amakuba agiye gutera.

¹⁶Nimuburire amahanga, muhururize Yeruzalemu! Ababisha baturutse mu gihugu cya kure, baje bavugiriza induru mu migi ya Yuda.

¹⁷Bayigose impande zose nk’abarinzi b’umurima, kuko yanyiteruyeho. Uwo ni Uhoraho ubivuze.

¹⁸Imyifatire yawe n’ibikorwa byawe, ni byo byagukururiye ibyo byose. Ngicyo igihano cyawe, wumve n’uko gikarishye, ndetse n’ukuntu kigushegesha umutima! (Yeremiya:)

¹⁹Ayiwe we, ayiwe, ndashize! Mfite ubwoba, nkutse umutima, uradiha, sinahora, kuko numvise impuruza y’ihembe n’akamu k’intambara!

²⁰Haravugwa ibyago by’inkurikirane! Ni koko, igihugu cyose kirarimbutse. Dore ingando yanjye yarimbutse, amahema yanjye yasenyutse mu kanya gato.

²¹Nzahereza he kureba ibendera ry’intambara, nzumva impuruza y’ihembe ngeze ryari? (Uhoraho:)

²²Umuryango wanjye ni ibigoryi, koko nta bwo banzi. Ni abana badatekereza, nta cyo bashobora kwiyumvisha. Bashoboye kugira nabi, ariko kugira neza byo ntibabizi. (Yeremiya:)

²³Nitegereje isi, nsanga ari ikivangitirane, yambaye ubusa; naho ku ijuru, urumuri rwazimiye.

²⁴Nitegereje imisozi, nsanga ihinda umushyitsi; n’udusozi twose tunyeganyega.

²⁵Nitegereje, nsanga nta muntu ukiriho, n’inyoni zose zarahunze.

²⁶Nitegereje, nsanga igihugu cyari gitoshye, cyarahindutse ubutayu, n’imigi yose yarakongotse, itwitswe n’uburakari bukaze bw’ Uhoraho.

²⁷Uhoraho avuze atya: Isi yose izaba umwirare, nyamara ariko, sinyitsembye buheriheri.

²⁸Kubera ibyo, isi izagwa mu cyunamo, mu kirere ijuru ricure umwijima, kuko nabitegetse, ukaba ari wo mugambi niyemeje. Sinjya nivuguruza, kandi sinsubira inyuma!

²⁹Urwamo rw’abanyamafarasi n’abanyamiheto ngo ruvuge, rutera umugi wose guhunga. Bamwe baracengera mu bihuru, abandi barurira amabuye y’ibitare. Imigi yose isigaye ubusa, nta muturage ukiyirangwamo.

³⁰Wowe se, ubwo uragokera iki? Wambara imihemba n’imitako ya zahabu, n’amaso yawe ukayasiga ibiyahindura ukundi! Urarushywa n’ubusa wigira mwiza, kuko abakurarikiraga bakuzinutswe, ahubwo bakaba bashaka kukurimbura.

³¹Ndumva igisa nk’iminiho y’umugore uramutswe; mbese nk’iy’ububabare bw’umugore ukibyara ubwa mbere. Iyo ni induru y’umwari mwiza Siyoni, uganya, agatakamba arashya amaboko, ati «Ndagowe, ndapfuye, nzira abishi banjye!»