Read kinyarwanda Yeremiya 42 Bible Online

Yeremiya 42 - kinyarwanda bible

Yeremiya 42

¹[101] Abatware bose b’ingabo, barimo Yohanani mwene Kareya na Azariya mwene Hoshaya, n’imbaga yose, abakuru n’abato,

²begera umuhanuzi Yeremiya, baramubwira bati «Ibyo tugusaba ubyumve! Dutakambire kuri Uhoraho Imana yawe, twebwe abacitse ku icumu — ni koko, dore dusigaye turi mbarwa kandi twarahoze turi benshi nk’uko nawe ubyirebera —

³kugira ngo Uhoraho Imana yawe, atwereke inzira twakurikira, n’icyo twakora.»

⁴Umuhanuzi Yeremiya arabasubiza ati «Numvise! Ngiye kubatakambira kuri Uhoraho Imana yanyu, nk’uko mubyifuza. Ijambo ryose Uhoraho azansubiza nzaribagezaho nta cyo mbahishe.»

⁵Na bo baramwemerera bati «Uhoraho azadushinje atabereye: tuzakurikiza ijambo Uhoraho Imana yawe azakudutumaho.

⁶Ryaba ritunyuze cyangwa ritatunyuze, tuzumva ijwi ry’Uhoraho Imana yawe tukoherejeho; kandi byose bizaba mahire, kuko tuzumva ijwi ry’Uhoraho Imana yacu.»

⁷Nyuma y’iminsi cumi, ijambo ry’Uhoraho ribwirwa Yeremiya.

⁸Na we ahamagara Yohanani mwene Kareya, hamwe n’abatware b’ingabo bose bari kumwe na we, n’imbaga yose, abakuru n’abato,

⁹arababwira ati «Uhoraho Imana ya Israheli, we mwanyoherejeho kugira ngo mbatakambire, avuze atya:

¹⁰Nimwemera kuguma muri iki gihugu, nzabubaka, ubutazongera kubarimbura; nzabatera noye kuzabarandura ukundi, kuko nicujije ikibi nabagiriye.

¹¹Ntimutinye umwami w’i Babiloni ubatera gukangarana! Ntimuzongera kumutinya — uwo ni Uhoraho ubivuze — kuko ndi kumwe namwe kugira ngo mbagobotore mu maboko ye.

¹²Nzabagira abaterambabazi kugira ngo abagirire impuhwe, maze abarekere mu gihugu cyanyu.

¹³Ariko nimwanga kumva ijwi ry’Uhoraho, Imana yanyu, muvuga ngo ’Ntidushaka kuguma muri iki gihugu,

¹⁴ahubwo turashaka kujya mu Misiri, aho tutazongera ukundi guhura n’intambara, ntituzongere no kumva ijwi ry’ihembe, cyangwa ngo tubure umugati; ni ho dushaka gutura’ . . .

¹⁵niba rero, bantu ba Yuda mwacitse ku icumu, ari uko muvuze, nimwumve uko Uhoraho Umugaba w’ingabo, Imana ya Israheli ababwira nimuramuka mugenje mutyo: Niba koko mwiyemeje gushyira nzira mukajya mu Misiri ngo ni ho muhungiye,

¹⁶inkota mutinya izabasanga aho mu gihugu cya Misiri, inzara ibakangaranya izabagendaho kugera mu Misiri, ndetse ni na ho muzapfira!

¹⁷Abantu bose biyemeje guhungira mu Misiri, bazahapfira bishwe n’inkota, inzara, ndetse n’icyorezo. Nta n’umwe uzacika ku icumu cyangwa ngo arokoke icyago ngiye kuboherereza.

¹⁸Ni koko, Uhoraho Umugaba w’ingabo, Imana ya Israheli avuze atya: Nk’uko umujinya wanjye n’uburakari bwanjye byivunduriye ku baturage ba Yeruzalemu, ni na ko bizabavunduriraho nimugera mu Misiri. Muzaba ibivume, mube ibicibwa, muhore munegurwa kandi musekwa, n’iki gihugu ntimuzongera kukibona ukundi.

¹⁹Bantu ba Yuda mwacitse ku icumu, Uhoraho arabihanangirije agira ati ’Ntimujye mu Misiri!’ Mumenye ko uyu munsi mbaburiye ku mugaragaro.

²⁰Mwikozeho, igihe munyohereje kuri Uhoraho Imana yanyu, mugira muti ’Dutakambire kuri Uhoraho Imana yacu, maze utubwire ibyo azaba yategetse, tuzabikora.’

²¹Maze kubibabwira, ariko ntimwumva ijwi ry’Uhoraho Imana yanyu, nta n’icyo mwumva mu byo yanyohereje kubabwira.

²²Ubu rero nimumenye neza ko muzicwa n’inkota, inzara, ndetse n’icyorezo, mukagwa aho mugiye guhungira.»