Read kinyarwanda Yeremiya 47 Bible Online

Yeremiya 47 - kinyarwanda bible

Yeremiya 47

¹Ijambo Uhoraho yabwiye umuhanuzi Yeremiya ryerekeye Abafilisiti, mbere y’uko Farawo atsemba Gaza:

²Uhoraho avuze atya: Amazi aturutse mu majyaruguru aruzuriranye, abaye umuvumba ukomeye, asendera igihugu n’ibikirimo byose: yuzura umugi no ku bawutuye. Abantu baratabaza, abaturage bo mu gihugu baravuza induru,

³bumvise umuriri w’amafarasi arimbura ubutaka n’ibinono byayo, urusaku rw’amagare y’intambara n’inziga zayo. Ababyeyi barata umutwe bagatererana abana babo,

⁴kubera ko umunsi wageze wo kuyogoza Abafilisiti bose, no gutsembera abacitse ku icumu i Tiri n’i Sidoni, abacitse ku icumu bose bashobora kubafasha. Ni koko, Uhoraho aje kuyogoza Abafilisiti, abacitse ku icumu bo mu kirwa cya Kafutori.

⁵Icyuma cyogosha kigiye kumyora ab’i Gaza, Ashikeloni iherukire aho kurevura. Bantu mwarokotse mutuye mu bibaya byabo, muzirasaga umubiri mugeze ryari?

⁶Mbega ibyago! Mbese, nkota y’Uhoraho, hari ubwo uzigera uruhuka? Subira mu rwubati, urekere aho maze utuze!

⁷Yaruhuka ite, kandi yoherejwe n’Uhoraho gutsemba Ashikeloni n’inkengero z’inyanja? Aho ni ho yayitumye.