Read kinyarwanda Yeremiya 51 Bible Online

Yeremiya 51 - kinyarwanda bible

Yeremiya 51

¹Uhoraho avuze atya : Babiloni n’abaturage ba Kalideya, nzabaterereza inkubi y’umuyaga ubarimbure.

²Nzayiterereza abayitera hejuru nk’umurama banayisahure. Bazayituruke impande zose ku munsi w’amakuba.

³Ntimuzagire uwo musiga, yaba umurashi utwaye umuheto we, cyangwa uwambaye umwambaro w’icyuma, habe n’ingabo ze z’insoresore. Abarwanyi bayo bose muzabatsembe!

⁴Inkomere ziragwirirana mu gihugu cya Kalideya, naho abahinguranyijwe n’amacumu bandagaye mu mayira,

⁵kuko igihugu cyabo cyasagutswe n’ibicumuro bagiriye Nyir’ubutagatifu wa Israheli. Nyamara ariko, ari Israheli, ari na Yuda, ntibaciwe ku Mana yabo, Uhoraho Umugaba w’ingabo.

⁶Nimuhunge Babiloni, buri wese akize amagara ye, naho ubundi muzarimbuka igihe izaryozwa ubugome bwayo. Ni igihe cy’Uhoraho cyo kwihorera akayigenera icyo ikwiye.

⁷Babiloni yahoze ari nk’inkongoro ya zahabu mu biganza by’Uhoraho, ikanezeza isi yose. Amahanga yanyoye kuri divayi yayo, ata umutwe.

⁸Dore mu kanya gato Babiloni iraguye, irasenyutse. Nimuyiririre, mwomore ibikomere byayo, ahari wenda izakira!

⁹Twagerageje gukiza Yeruzalemu, ariko ntishobora gukizwa. Nimuyivemo, buri wese atahe mu gihugu cye, kuko ibyago byayo byasumbye ijuru, bikaba byakoze ku bicu.

¹⁰Uhoraho yatugaragarije umukiro, nimuze turate muri Siyoni, ibikorwa by’Uhoraho Imana yacu.

¹¹Nimutyaze imyambi, mufate ingabo; Uhoraho akanguye abami b’Abamedi. Ni koko, Uhoraho yagiriye Babiloni umugambi wo kuyisenya. Uhoraho arihoreye, ni ko Nyir’ijuru yihimura.

¹²Nimushinge ibendera ku nkike za Babiloni, mwongere abarara irondo, mushyireho abararirizi, muteganye n’abantu mu bico. Ni byo, Uhoraho agiye kuzuza umugambi afitiye abaturage ba Babiloni.

¹³Wowe uhora hafi y’amazi magari, ukagira umutungo utubutse, umunsi wawe urageze, ibyawe byakurangiriyeho.

¹⁴Uhoraho Umugaba w’ingabo, ubwe yarahiye agira ati «Nzakuzuzamo abantu banganya ubwinshi n’inzige, bakuvugirize induru y’intambara.»

¹⁵Uhoraho ni we waremesheje isi ububasha bwe, ibiyituye abihangana ubuhanga, ubwenge bwe aburamburisha ijuru.

¹⁶Iyo avuze wagira ngo ni amasumo y’amazi mu ijuru, ni we ukoranya ibicu nyamunini mu mpera z’isi, akarekura imirabyo imvura ikagwa, kandi agakura imiyaga mu ndiri zayo.

¹⁷Umuntu wese arumirwa, bikamubera urujijo, umucuzi wese agaterwa isoni n’ikigirwamana cye: rwose amashusho ye ni ibinyoma, nta mwuka uyarimo!

¹⁸Byose ni ubucucu n’amanjwe baseka, igihe cyo guhanwa nikigera, bizarimburwa.

¹⁹Naho Imana, yo mugabane wa Yakobo si uko iteye! Yo, ni umuremyi wa byose; Israheli ikaba ari umuryango yeguriweho umugabane; Uhoraho Umugaba w’ingabo, ni ryo zina rye.

²⁰Wahoze uri inyundo yanjye, ukambera intwaro y’intambara. Ni wowe najanjagurishije amahanga, ndimbura ibihugu.

²¹Ni wowe najanjagurishije amafarasi n’abayagenderaho, njanjagura amagare y’intambara n’abayagenderaho.

²²Ni wowe najanjagurishije abagabo n’abagore, njanjagura abasaza n’abasore, abahungu n’abakobwa.

²³Ni wowe najanjagurishije abashumba n’amashyo yabo, njanjagura abahinzi n’ibimasa byabo, abatware n’abategetsi.

²⁴Mu maso yanyu, nzaryoza Babiloni n’abaturage ba Kalideya ubugome bwose bagiriye Siyoni, uwo ni Uhoraho ubivuze.

²⁵Tuzabonana nawe, Musozi w’icyorezo, wowe urimbura isi yose, uwo ni Uhoraho ubivuze. Nzaguhagurukira, nguhananture hejuru y’urutare, maze nguhindure umuyonga.

²⁶Ntuzongera gucukurwamo ukundi ibuye ry’insanganyarukuta cyangwa iry’imfatizo, uzahinduka itongo ubuziraherezo — uwo ni Uhoraho ubivuze.

²⁷Nimuzamure ibendera ku isi, muvuze ihembe mu mahanga! Nimukoranye amahanga ayirwanye, muyiteze ibihugu bya Ararati, Mini n’Ashikenazi. Mushyireho n’abatware b’ingabo, muzane amafarasi menshi acukiranye nk’inzige.

²⁸Nimukoranye amahanga ayirwanye; ari abami b’Abamedi, abatware babo n’abategetsi babo, mbese igihugu cyabo cyose.

²⁹Isi yose iratengurwa n’ubwoba, kuko imigambi Uhoraho yagiriye Babiloni igiye kuzuzwa: igihugu cya Babiloni kigiye guhinduka amatongo, abaturage bayo bayicikemo.

³⁰Intwari z’i Babiloni zatinye kurwana, zigungiye mu bwihisho, zacitse intege; zahindutse nk’abagore b’inyanda! Amazu yayo bayatwitse, inzugi zayo barazisandaza.

³¹Ujyanye inkuru arahura n’undi uyijyanye, intumwa igahura n’indi, bajya gutangariza umwami w’i Babiloni ko umugi wafashwe impande zose,

³²amayira akaba yafunzwe, ibigo bikomeye bigatwikwa, naho ingabo ze zigakwirwa imishwaro.

³³Uhoraho, Umugaba w’ingabo Imana ya Israheli, avuze atya: Babiloni imeze nk’imbuga bariho batunganya, ni akanya gato bagahura umusaruro.

³⁴Nebukadinetsari, umwami w’i Babiloni yarandiye, aranyunyuza, ansiga ndi igikanka. Yaranconshomeye nk’igisimba, amaze guhaga umusokoro wanjye, aranjugunya.

³⁵Abatuye Siyoni baravuga bati «Ibyago n’amakuba twagiriwe nibiryozwe Babiloni!» n’ab’i Yeruzalemu bati «Amaraso yacu naryozwe Abakalideya!»

³⁶None rero, Uhoraho avuze atya: Ngiye kukurwanirira, maze nguhorere. Nzakamya inyanja yayo n’amasoko yayo;

³⁷Babiloni izahinduka ikirundo cy’amabuye, n’isenga y’imbwebwe, mbese bahinduke itongo riteye ubwoba; nta we uzahatura ukundi.

³⁸Igihe bo bazaba bakoranye, batontoma nk’intare z’ibisore, bagahuma nk’ibyana by’intare z’ingore,

³⁹ibyishimo byabo nibimara kuba byose nzabategurira ibirori: mbasindishe bamere nk’abapfuye, basinzire ubuticura, boye kuzakanguka ukundi, uwo ni Uhoraho ubivuze.

⁴⁰Nzabayobora mu ibagiro nk’amasekurume y’intama, cyangwa intama z’inyagazi n’amasekurume y’ihene.

⁴¹Bishoboka bite! Sheshaki yafashwe, iranyazwe ari yo yari ububengerane bw’isi yose! Byashoboka bite ko mu mahanga yose Babiloni yaba ari yo ihinduka itongo!

⁴²Inyanja yuzuriye kuri Babiloni imivumba yayo isuma iyirengaho.

⁴³Imigi yayo yabaye amatongo, ihindutse igihugu cy’amapfa n’amayaga, igihugu kitagira ugituye, ntikigire ukigenda.

⁴⁴Nzahagurukira Beli y’i Babiloni, nyikure mu kanwa ibyo iriho iconshomera. Amahanga ntazongera kubyigana ayisanga, inkike ya Babiloni na yo izasenyuka.

⁴⁵Mwebwe abo mu muryango wanjye, nimuyivemo, buri wese arwane ku magara ye, muhunge umuriro w’uburakari bw’Uhoraho.

⁴⁶Nzabarinda gucika intege no guterwa ubwoba n’impuha zizakwira mu gihugu; mu mwaka umwe bavuga ibi, mu wundi bakavuga biriya, ubwo kandi ariko urugomo ruca ibintu mu gihugu, umunyamaboko akirukana undi nka we.

⁴⁷None rero, mubimenye, igihe kiregereje, maze mpagurukire ibigirwamana by’i Babiloni. Igihugu cyose kizakozwa isoni, n’intumbi zacyo zicyararikwemo.

⁴⁸Ubwo rero, ijuru n’isi n’ibiyiriho byose, bizayikine ku mubyimba. Koko rero, ngabo abarimbuzi bayiteye baturutse mu majyaruguru, uwo ni Uhoraho ubivuze.

⁴⁹Ku isi yose hapfuye abantu batabarika, bazize Babiloni; ubu na yo ubwayo izarimbuka, izize abo yishe muri Israheli.

⁵⁰Mwebwe abarokotse inkota nimufate inzira, ntimuhagarare. Nimutakambire Uhoraho mukiri kure, kandi mujye mwibuka Yeruzalemu!

⁵¹Nta bwo twishimiye gutukwa, isoni zaradukoze, kuko abanyamahanga bacengeye ahantu hatagatifu mu Ngoro y’Uhoraho.

⁵²None rero, igihe kiregereje — uwo ni Uhoraho ubivuze — nzahagurukire ibyo bigirwamana byayo, maze mu gihugu cye cyose inkomere zenda gupfa ziboroge.

⁵³N’iyo Babiloni yakwiyubakira inkike zikomeye, zigera hejuru mu birere, ndamutse mbitegetse abarimbuzi bayishyikira, uwo ni Uhoraho ubivuze.

⁵⁴I Babiloni haturutse induru y’impuruza, mu gihugu cya Kalideya ibintu byadogereye!

⁵⁵Ni Uhoraho urimbura Babiloni, agacubya urwo rusaku rukabije. N’iyo induru yabo yaba isumbye kure amasumo y’amazi magari, ntiyabura kuyicecekesha.

⁵⁶Ni koko, umurimbuzi ateye Babiloni: intwari zayo yazifashe mpiri, imiheto yazo yavunaguritse, kuko Uhoraho ari Imana yihorera, ikamenya no kwihimura.

⁵⁷Nzasindisha ibikomangoma byayo, abahanga bayo, abategetsi bayo, abatware bayo n’intwari zayo. Bazasinzira nk’abapfuye, boye kuzakanguka ukundi. Uwo ni Uhoraho ubivuze, izina rye rikaba Uhoraho Umugaba w’ingabo.

⁵⁸Uhoraho Umugaba w’ingabo avuze atya: Inkike ngari ya Babiloni yarimbutse burundu, amarembo yayo maremare asenyurwa n’umuriro. Ibihugu biravunwa n’ubusa, amahanga aragokera umuriro!

⁵⁹Dore amabwiriza umuhanuzi Yeremiya yahaye Seraya, mwene Neriya wa Mahiseya, igihe ajyanye n’umwami Sedekiya i Babiloni, mu mwaka wa kane w’ingoma ye. Seraya ni we wari umufasha w’umwami mu ngando.

⁶⁰Yeremiya akaba yari yarakomatanyirije mu gitabo kimwe amakuba yose yari kuzagwirira Babiloni; mbese harimo amagambo yose yavuzwe haruguru yerekeye Babiloni.

⁶¹Yeremiya ni ko kubwira Seraya, ati «Nugera i Babiloni uzihutire gusoma aya magambo yose mu ijwi riranguruye,

⁶²maze uzavuge uti ’Uhoraho, ni wowe wemeje ko aha hantu uzahatsemba ntihazagire ikinyabuzima kihasigara, ari abantu, ari amatungo; hakazahinduka itongo ubuziraherezo.’

⁶³Nurangiza gusoma iki gitabo, uzagihambireho ibuye, maze ukijugunye rwagati muri Efurati,

⁶⁴ugira uti ’Nguko uko Babiloni izarohama, ntizongere kubyutsa umutwe ukundi, kubera amakuba yose nyiterereje.’» Amagambo ya Yeremiya ni hano arangiriye.