Read kinyarwanda Yeremiya 6 Bible Online

Yeremiya 6 - kinyarwanda bible

Yeremiya 6

¹[17] Nimuve i Yeruzalemu, mwebwe bene Benyamini, mujye gushakira ubuhungiro ahandi. Nimuvugirize ihembe i Tekowa, kuri Betikeremu muhashinge ibendera: mu misozi yo mu majyaruguru, hari icyago kibubikiye, ishyano ry’icyorezo!

²Umwiza Siyoni, uteye ubwuzu akaba n’ihoho, ararimbutse!

³Ni we abashumba baje basanga n’amatungo yabo. Bamugose impande zose, bahashinze amahema, buri wese yaragiye ahe.

⁴Nimushoze intambara ntagatifu, tumutere! Nimuhaguruke! Tumutere ku manywa y’ihangu! Turagowe, kuko umunsi uciye ikibu, ibicu by’umugoroba bikaba byiyongeranya.

⁵Nimuhaguruke, tumutere igicuku kinishye, dusenye ingoro ze nziza!

⁶Avuze atya Uhoraho Umugaba w’ingabo: Nimutsinde ibiti, mukore umuhanda ugana i Yeruzalemu. Uwo mugi wangabijwe; ntugire ikindi kiwurangwamo kitari urugomo.

⁷Nk’uko iriba ribika amazi yaryo, ni ko na wo ubundikira ubugome bwawo. Muri wo nta kindi kiharangwa, kitari amahane n’ubwambuzi. Imibabaro n’ibikomere byawo, nabibona iteka bikanshavuza.

⁸Isubireho, Yeruzalemu! Naho ubundi nzitandukanya nawe, maze nguhindure ubutayu, igihugu kidatuwe.

⁹Uhoraho, Umugaba w’ingabo, avuze atya: Nibahumbahumbe abasigaye muri Israheli nk’uko bahumba imizabibu! Ikiganza cyawe cyongere gufata ku mashami, nk’umusaruzi w’imizabibu! (Yeremiya:)

¹⁰Ni nde nzabwira amagambo yanjye, n’ubuhamya bwanjye akabyumva? Dore amatwi yabo yarapfuye, ntibashobora kumva, ijambo ry’Uhoraho barigize igitutsi, ntibarishaka. (Uhoraho:)

¹¹Nuzuye uburakari, jyewe Uhoraho singishoboye kubuzinzika. Bucuranurire ku bana bari mu nzira, no ku ikoraniro ryose ry’abasore, buzagere no ku bagabo, n’abagore, ku bakuru n’abasaza.

¹²Amazu yabo azahabwa abandi, hamwe n’imirima yabo, n’abagore babo, kuko ndamburiye ikiganza ku baturage b’iki gihugu. Uwo ni Uhoraho ubivuze!

¹³Kuva ku muto kugera ku mukuru, bose bararuwe n’inyungu zabo, abahanuzi n’abaherezabitambo bose bakifata nabi.

¹⁴Barazinzika ishyano ry’umuryango wanjye, bavuga ngo «Ni amahoro, byose bimeze neza!» Nyamara ariko nta mahoro ariho.

¹⁵Bakozwe n’ikimwaro kubera amarorerwa bakora, nyamara nta mpungenge bibatera, ngo bazirikane ko bitesheje agaciro! Kubera iyo mpamvu, bazarimbuka nk’abandi bose, bakazatemba, igihe nzaba mbahagurukiye. Uwo ni Uhoraho ubivuze.

¹⁶Uhoraho avuze atya: Nimuhagarare ku mihanda mutekereze, mubaririze inzira abasokuruza banyuzemo. Inzira y’amahirwe ni iyihe? None rero, nimuyikurikire, bityo muzabona aho muruhukira. Ariko baravuga bati «Ntituzayikurikira!»

¹⁷Nashyizeho abarinzi[18] kugira ngo babarinde, none rero, muritonde nimwumva ihembe! Ariko baravuga ngo «Nta bwo dushaka kuryitaho.»

¹⁸None rero, mahanga, nimwumve! Nawe wa koraniro we, menya ibigiye kukugwirira.

¹⁹Isi na yo niyumve! Jyewe ngiye guterereza uyu muryango ibyago; ari byo ngaruka y’ibitekerezo bibi byabo. Nta bwo bitondera amagambo yanjye, amategeko yanjye barayasuzugura.

²⁰Umubavu uvuye i Saba, cyangwa urubingo ruhumura rwo mu gihugu cya kure, bimbwiye iki? Ibitambo byanyu bitwikwa, simbishaka; amaturo yanyu, ntanezeza.

²¹None rero, Uhoraho avuze atya: Imbere y’uyu muryango mpateze umutego bazasitaraho: umuhungu na se, abaturanyi n’incuti, bakazashirira icyarimwe.

²²Uhoraho avuze atya: Umuryango uturutse mu gihugu cyo mu majyaruguru, ihanga rikomeye, rihagurutse mu mpera z’isi.

²³Bitwaje imiheto n’amacumu, ni abagome ntibagira impuhwe; umuriri wabo ni nk’uw’inyanja isuma. Baje ku mafarasi, bari kuri gahunda y’ingabo ziri ku rugamba, baraguteye wowe, umwiza Siyoni. (Rubanda:)

²⁴Twumvise iyo nkuru ducika intege, dukuka umutima, tugira n’ububabare nk’ubw’umugore uramutswe.

²⁵Ntujye ku gasozi cyangwa ngo ugere mu mihanda, kuko inkota y’umwanzi hose yahakwije iterabwoba. (Uhoraho:)

²⁶Wowe muryango wanjye, ambara ibigunira, kandi wiziringe mu mukungugu! Rangiza imihango yose y’uri mu cyunamo, ucure umuborogo nk’uwiraburiye umuhungu w’ikinege, kuko mu kanya gato umurimbuzi araba atugezeho. (Uhoraho:)

²⁷Ngushyiriyeho kugerageza umuryango wanjye. Uzawumenye kandi usuzume imyifatire yawo, nk’umucuzi usuzuma icyuma. (Yeremiya:)

²⁸Bose ni ibirara birenze ihaniro, ni abanyamagambo asebanya; bakomeye nk’umuringa n’icyuma, bose ni abarimbuzi.

²⁹Umuvuba urahuhera, umuriro ukavana imyanda ku cyuma, ariko nta kamaro gukomeza kugitwika, niba imyanda itacyomokaho.

³⁰Bazabita «Feza igayitse», kuko Uhoraho yabagaye!