Read kinyarwanda Yeremiya 9 Bible Online

Yeremiya 9 - kinyarwanda bible

Yeremiya 9

¹(Yeremiya:) Ubonye ngo mbe ndafite akaruri k’abagenzi mu butayu, maze ngo ntererane umuryango wanjye njye kuhatura! Bose ni abasambanyi, ni agatsiko k’abagambanyi. (Uhoraho:)

²Ururimi rwabo ni umuheto ureze, baganje mu gihugu atari ukubera ukuri, ahubwo ibinyoma. Bakorera ibyaha ku bindi, naho jyewe, ntibamenya. Uwo ni Uhoraho ubivuze.

³Murabe maso, buri wese yitondere mugenzi we; ntihazagire umuvandimwe wanyu n’umwe mwizera, kuko buri muvandimwe ari umuhendanyi, na buri mugenzi wanyu akaba umubeshyi.

⁴Buri wese aryarya mugenzi we, nta jambo ry’ukuri rikibaho! Ururimi rwabo barumenyereje amagambo y’ibinyoma. Baguye mu bugizi bwa nabi, ku buryo batagishoboye kwisubiraho.

⁵Ngurwo urugomo rudasiba, ngicyo ikinyoma kidahwema! Bahakanye kunyoboka! Uwo ni Uhoraho ubivuze.

⁶None rero, Uhoraho Umugaba w’ingabo avuze atya: Ngiye kubahana, mbagerageze. Mbega ukuntu ngiye guhagurukira ubugome bw’umuryango wanjye!

⁷Ururimi rwawo rusa n’umwambi kirimbuzi, bakwirakwiza ibinyoma. Mugenzi wabo bamwifuriza amahoro ku munwa gusa, ariko mu mutima bamushandikira umutego.

⁸Ubwo se si ngomba kubahana, nkihimura igihugu giteye gityo? Uwo ni Uhoraho ubivuze. (Yeremiya:)

⁹[25] Ndaririra mu mpinga y’imisozi, nkaganya, nkaborogera no mu biraro byo ku gasi, kuko byose byakongotse, hakaba nta muntu n’umwe ukihacaracara, habe n’amatungo ngo aracyahumvikana. Ari inyoni, ari n’amatungo, byose byarahunze, nta gisigaye! (Uhoraho:)

¹⁰Yeruzalemu, nzayigira ikirundo cy’amabuye, isenga y’imbwebwe, naho imigi ya Yuda nyihindure amatongo atagira abayatuye. (Yeremiya:)

¹¹Niba hari umuhanga uriho, niyumve, kandi yamamaze ijambo yabwiwe n’Uhoraho. Ni kuki igihugu cyayogojwe, kigakongoka nk’ubutayu butagendwa?

¹²Uhoraho aravuze ati «Birengagije inyigisho zanjye nabahaye; aho kumva ijwi ryanjye ngo barikurikire,

¹³bakomeje kunangira umutima, bizirika kuri za Behali batojwe n’abasekuruza babo.»

¹⁴None rero, Uhoraho Umugaba w’ingabo, Imana ya Israheli, aravuze ati «Ngiye kubanywesha uburozi bukaze, kandi mbuhire amazi aroze;

¹⁵mbatatanyirize mu bihugu batigeze bamenya ari bo ubwabo, cyangwa abasekuruza babo, kandi mbakurikize inkota kugeza ubwo mbatsembye.»

¹⁶Uhoraho Umugaba w’ingabo avuze atya: Nimubaririze, mutumire abagore bo kurira! Muhamagare ababizobereyemo, maze baze!

¹⁷Nibatebuke, baduterere indirimbo y’amaganya! Amaso yacu nazengemo amarira, naho ingohe zacu zitembemo amazi! (Yeremiya:)

¹⁸Induru y’amaganya iturutse i Siyoni igira iti «Turashize, ikimwaro kiradukoze! Tugomba kwimuka mu gihugu: ingo zacu barazishenye.»

¹⁹Bagore, nimwumve ijambo ry’Uhoraho! Amatwi yanyu niyakire ijambo rivuye mu kanwa ke! Nimutoze abakobwa banyu iyi ndirimbo y’amaganya, maze namwe muyigishe bagenzi banyu, mugira muti

²⁰«Urupfu rwuriye ku madirishya yacu, rugacengera mu mazu yacu meza, ruje gutsemba abana mu mayira n’abasore ku bibuga.

²¹Intumbi zandagaye nk’ifumbire mu mirima, cyangwa nk’imiba inyuma y’umusaruzi, kandi nta muntu uhari ngo azandurure!»

²²Uhoraho avuze atya: Umuhanga ntaziratane ubuhanga bwe! Umunyembaraga ntaziratane ingufu ze! Umukungu ntaziratane ubukire bwe!

²³Uzashaka kwirata, aziratane ko anzi bihagije, jye Uhoraho, ushyigikira ubufatanye, ubutungane n’ubutabera ku isi. Ni koko, ibyo ni byo binshimisha. Uwo ni Uhoraho ubivuze.

²⁴[26] Iminsi iregereje — uwo ni Uhoraho ubivuze — maze nzahagurukire uwagenywe ku mubiri wese.

²⁵Nzahagurukira Misiri na Yuda, Edomu n’Abahamoni, Mowabu n’Abogoshe imisaya batuye mu butayu, kuko abo banyamahanga bose, kimwe n’Abayisraheli ubwabo, batagenywe ku mutima.