Read kinyarwanda Amaganya 1 Bible Online

Amaganya 1 - kinyarwanda bible

Amaganya 1

¹[1][2] Mbega ngo umugi wari utuwe n’imbaga nyamwinshi urasigaramo ubusa! Uwahoze ari igikomerezwa mu mahanga n’umwamikazi w’ibihugu, ameze nk’umupfakazi, arakoreshwa imirimo y’uburetwa!

²Arara arira ijoro ryose, amarira akamutemba ku matama; mu bamukundaga[3] bose nta n’umwe umuhoza, incuti ze zose zaramutereranye, zihinduka abanzi be.

³Yuda yajyanywe bunyago, irasuzugurwa kandi ishikamirwa n’ubucakara; ituye mu mahanga ntihagira uburuhukiro, abari bayikurikiranye bayifatiye mu mfutanwa.

⁴Amayira y’i Siyoni ari mu cyunamo, nta muntu n’umwe ukiza mu minsi mikuru; amarembo yayo yose yabaye amatongo, abaherezabitambo bayo baraganya, n’abari bayo baguye mu kantu: mbega agahinda gakomeye ka Siyoni!

⁵Abayirwanyaga barayinesheje, abanzi bayo baranezerewe, kuko ari Uhoraho wayibabaje, ayiryoza ibicumuro byayo bitagira ingano. Ibitambambuga byayo byajyanywe bunyago, umwanzi abijya inyuma.

⁶Ikuzo ry’umwari wa Siyoni[4] ryarayoyotse, abatware bayo bamera nk’impara zitagira urwuri; bagendaga nta kabaraga, imbere y’ababashoreye.

⁷Yeruzalemu iribuka ya minsi y’umubabaro n’agahinda, ubwo abantu bayo bagwaga mu biganza by’umwanzi kandi itagira kirengera; abanzi bayo babibonaga, bishimira irimbuka ryayo.

⁸Yeruzalemu yaracumuye bikomeye, none yahindutse nk’ikintu cyahumanye, abahoze bayirata basigaye bayinnyega, kuko babona ubwandure bwayo; na yo ubwayo iraganya, ikabahisha amaso.

⁹Ingutiya yayo yahomyeho umwanda, ibyayibayeho, nta na rimwe yigeze ibitekereza mbere; yacishijwe bugufi bitangaje, ibura n’uyihumuriza, none iravuga iti «Uhoraho, itegereze umubabaro wanjye, urebe ukuntu umwanzi wanjye anyishimaho!»

¹⁰Umwanzi yaramburiye ikiganza ku byiza byayo byose, maze abanyamahanga binjira mu rusengero rwayo, ibyirebera, kandi warategetse ngo «Ntibazinjire mu ikoraniro ryawe!»

¹¹Imbaga yayo yose uko yakabaye iraganya, bariho barashakashaka umugati; baragurana ibyiza byabo ibyo kurya ngo bagarure ubuyanja. Yeruzalemu iratakamba igira iti «Uhoraho, itegereze, urebe ukuntu nasuzuguritse!

¹²«Yemwe, bahisi n’abagenzi mwese, nimurebe, mwitegereze, niba hari akababaro kamera nk’aka kanjye, ari na ko natejwe n’Uhoraho, ku munsi w’uburakari bwe bukaze.

¹³Yankongejemo umuriro uturutse hejuru, utwika amagufa yanjye; yanteze umutego aho nyura maze arambirindura, yangize nk’umugore w’intabwa, buri gihe mba merewe nabi.

¹⁴Yagenzuye ibibi nkora byose, abicigatira mu kiganza; umutwaro wabyo awungereka ku bitugu, ugahungabanya imbaraga zanjye. Uhoraho yangabije ibiganza by’abanzi, kandi ndashoboye guhangana na bo!

¹⁵Uhoraho yirukanye intwari zose zari iwanjye, yarankomanyirije kugira ngo bavunagure abasore banjye. Uhoraho yaribatiye umwari mu rwengero[5], ari we mukobwa wa Yuda[6].

¹⁶Ngibyo ibyatumye mpogora, amaso yanjye agasesa amarira, koko rero uwari kumpumuriza akandema agatima, andi kure. Abana banjye barihebye, kuko umwanzi yabarushije amaboko.»

¹⁷Siyoni iteze ibiganza, ariko nta we uyihumuriza. Uhoraho yategeje Yakobo abamushikamira impande zose; Yeruzalemu yahindutse umwanda rwagati muri bo.

¹⁸«Uhoraho ni umunyakuri, koko nasuzuguye amategeko ye. Nimutege amatwi, miryango mwese, mwitegereze umubabaro wanjye, kuko abakobwa banjye n’abasore banjye bajyanywe bunyago.

¹⁹Natakambiye amacuti[7] yanjye, yo arantererana; abaherezabitambo n’abakuru banjye baguye mu mugi, bariho bashaka ibyo kurya ngo bagarure ubuyanja.

²⁰Uhoraho, itegereze amakuba ndimo! Ndatengurwa nkabunza umutima, kuko nagusuzuguye bikabije. Ku gasozi inkota yancuje abana, no mu rugo hameze nk’ahatashywe n’Urupfu.

²¹Tega amatwi amaganya yanjye, kuko nta n’umwe umpumuriza! Abanzi banjye bose bumvaga amakuba ndimo, bakishimira ibyago wanteje. Na bo urakabateza umunsi nk’uwo wangeneye, maze bapfe urwanjye!

²²Ubugome bwabo nibwigaragaze imbere yawe, ubahane nk’uko wampannye, umpoye ibicumuro byanjye byose, kuko amaganya yanjye ari menshi, kandi ngahora nsuhuza umutima.