Read kinyarwanda Amaganya 2 Bible Online

Amaganya 2 - kinyarwanda bible

Amaganya 2

¹[8] Mbega ngo Uhoraho ararakarira umwari w’i Siyoni, bigatuma amutera gusuherwa! Yahanantuye ikuzo rya Israheli ariroha hasi; ntiyibuka akabaho akandagizaho ibirenge bye[9], ku munsi w’uburakari bwe!

²Uhoraho yatsembye inzuri zose za Yakobo, atazibabariye; mu burakari bwe asenya ibigo by’umwari wa Yuda; yabirunze hasi, ahindanya igihugu n’abatware bacyo.

³Kubera uburakari bwe bukaze yatsembye ububasha bwose bwa Israheli, ayihina akaboko k’iburyo imbere y’abanzi; muri Yakobo ahacana umuriro ugurumana, uhatwika impande zose.

⁴Yafoye umuheto we nk’umwanzi, abangura ukuboko kw’iburyo nk’umubisha; atsemba abari bafite igikundiro bose. Yacuranuriye uburakari bwe ku ihema ry’umwari w’i Siyoni, nuko buragurumana nk’umuriro.

⁵Uhoraho yahindutse nk’umwanzi atsemba Israheli, yatsembye iminara yayo yose, asenya n’ibigo byayo; umwari w’i Siyoni amugwiriza amaganya n’umubabaro.

⁶Nk’uko bangiza ubusitani n’akazu kaburimo, ni ko yayogoje igihugu cyose n’umurwa wacyo, avanaho ahantu haberaga amakoraniro matagatifu. Uhoraho yatumye iminsi mikuru n’amasabato byibagirana muri Siyoni; kubera uburakari bwe bugurumana, yigizayo umwami n’umuherezabitambo.

⁷Uhoraho yahigitse urutambiro rwe, azinukwa Ingoro ye, inkike z’iminara azigabiza ibiganza by’umwanzi; none barasakuriza mu Ngoro y’Uhoraho nk’abari mu minsi mikuru!

⁸Uhoraho agambiriye kurimbura inkike y’umwari w’i Siyoni; agiye kuharinganiza ateyeho umugozi, kandi ntazahina akaboko atamaze kuhatsemba. Inkuta n’inkike azishyize mu cyunamo; zose zizasenyukira icyarimwe.

⁹Amarembo yayo yarigise mu butaka, ibihindizo yarabikuye, arabicagagura; umwami wayo n’abatware bayo bigaruriwe n’abanyamahanga, nta mategeko akiharangwa, n’abahanuzi bayo ntibakibonekerwa n’Uhoraho!

¹⁰Abakuru b’umwari w’i Siyoni bicaye hasi, bagwa mu kantu; none baritumurira umukungugu mu mutwe, bakenyeye ibigunira. Abari b’i Yeruzalemu bubitse umutwe ukora ku butaka.

¹¹Amaso yanjye yakobowe n’amarira, ndiho ndatengurwa; nacitse intege kuko umwari w’umuryango wanjye yarimbutse, abana b’ibitambambuga n’abakiri ku ibere, bakaba basambagurikira ku bibuga by’umurwa.

¹²Barabaza ba nyina, bati «Ingano na divayi biri he?» ari na ko barabirana nk’inkomere ku bibuga by’umurwa, basambagurika mu maboko ya ba nyina.

¹³Icyo nakuvugaho se ni iki? Nakugereranya n’iki se, mwari w’i Yeruzalemu? Uwagukiza akaguhumuriza, yaba ari nde, wa mukobwa we, mwari w’i Siyoni? Akaga urimo ko kangana n’inyanja, ni nde washobora kugukiza?

¹⁴Amabonekerwa abahanuzi bawe bakugejejeho, ni ibinyoma n’impfabusa! Ntibakugaragarije igicumuro cyawe, kugira ngo wirinde ibi byakugwiririye, ahubwo impanuro bakubwiye, zarakurindagije zirakuyobya.

¹⁵Abahisi n’abagenzi barakuryanira inzara, barakuvugiriza induru, bakakuzunguriza umutwe, wowe, mwari w’i Yeruzalemu, bagira bati «Mbese uyu ni wa mugi wavugwagaho ubwiza buhebuje, ukaba n’umunezero w’isi yose?»

¹⁶Abanzi bawe bose barakwasamiye, baravuza induru, bagahekenya amenyo, bavuga bati «Twaramuyongobeje! Koko uyu ni wo munsi twari dutegereje, none tuwugezeho, turawubonye!»

¹⁷Uhoraho yageze ku cyo yagambiriye, ashoje icyo ijambo rye ryagennye kuva kera; yatsembye nta mbabazi, atuma umwanzi akwishimaho, yongera ububasha bw’ababisha bawe.

¹⁸Takambira Uhoraho, umuganyire, mwari w’i Siyoni; reka amarira yawe yisuke amanywa n’ijoro, boshye amazi y’umugezi; ntiwigere uruhuka, n’amarira ntakame mu maso yawe!

¹⁹Haguruka, utakambe ijoro ryose, uhereye igihe izamu ritangirira; curanurira umutima wawe imbere y’uruhanga rw’Uhoraho nk’uko basuka amazi; mutegere amashyi kubera ibitambambuga byawe, byarabiraniye hose mu mayirabiri, bizize inzara.

²⁰«Uhoraho, reba kandi witegereze; abo wakoreye ibi ni bande? Byagenze bite kugira ngo ababyeyi barye abana babo, bya bitambambuga byabateraga ubwuzu? Byagenze bite kugira ngo abaherezabitambo n’abahanuzi bicirwe icyarimwe mu Ngoro y’Uhoraho?

²¹Umwana n’umusaza barambaraye mu mayira; abakobwa banjye n’abasore banjye bamazwe n’inkota, ku munsi w’uburakari bwawe warishe, usogota bose nta mbabazi.

²²Wampagurukirije abaterabwoba bankikije, mbese nk’abantu batumiriwe umunsi mukuru; ntihagira urokoka cyangwa ucika ku icumu, ku munsi w’uburakari bw’Uhoraho. Abo nirereye nkabakuza, umwanzi yabantsembyeho.»